Inya Ạnmuny Dị Ọnhaghanhan A Jehova

Mem mọ a Nebukạdneza asiphi bọ we eghun phọ a Juda agheelhom Bạbịlọn, ọdi ạḅenhi oye dị raḍighinhaan ghan nyọdi oḍighi dị oghol mọ Ạspịnạz ophogh ghan ạbidi. A Nebukạdneza ạḅilhe kẹn ni ạḅenhi Ạspịnạz ọwa ạnmuny sịphe eghun phọ a Juda dị omhoon loor ọḅilhe ọsu olhoghi. Esi ịraar ạsia, kọtughemhi nmụny phọ ạbuen phọ ịlo ạal, r’ọge r’ọḅilhe ọḅa ọnhu ạ Bạbịlọn dị oghol mọ Ạkedịạn. Ịtughemhi phọ kẹloghonhaan nmụny phọ ḍịghaagh oḍighi ạtorobo oḍighi dị uwo ẹmha phọ kạngo bịdi. Bịdi kole ghan kẹn tọrobo eḍien dị uwo ẹmha phọ r’ikpolhom awe phọ ọdi role. Abuniin ạnmuny dị Ạspịnạz ạsaḅar ughol mọ Dạnịẹl, Hạnạnạyạ, Misẹl, rạ Ạzạrạyạ. Kụolo Ạspịnạz ạsighe ni siḍien ạ Bạbịlọn aghol bịdi. Ọdi aghol bịdi mọ: Bẹltịsạzạ, Sedạrạk, Misạk, rạ Ạbẹdnigo. Ịtughemhi phọ ịphen phọ keḍighi ni ịdi bịdi kọbilhe okumu a Jehova ḍụghum?

Inya phọ ạnmuny phọ ạbuen phọ usopha mọ bịdi kọ́bilhe a Jehova. Bịdi ulhegheri ni mọ bịdi kótue ole iniin ariiḍien uwo ẹmha phọ ịdi eḍighi bọ olhogh a Jehova ạḅem mọ bịdi kúle. Esi ịduon phọ, bịdi ụḅenhi Ạspịnạz mọ: ‘Yoor kóle riiḍien uwo ẹmha phọ.’ Ạspịnạz ạḅenhi bịdi mọ: ‘Eḍighi mạar dị nyinha íle eḍien phọ kụ uwo ẹmha phọ ạmhiin dị nyinha emiteghu, ọdi kughiigh ni ịmhi!’

Ạ Dạnịẹl ạatughian ni ịlo oḍighi. Ọdi ạḅenhi ọpo rapogh bọ bịdi mọ: ‘Seseeny, ụngo ghan iyoor ịikiripha r’iimhumha r’ạmuum bịn. Ḍioph aḍughul otu reten kụ aphogh mụghumo ạnmuny phọ role bọ eḍien uwo ẹmha phọ kọnighe ni ọḅilhe omoon loor upu iyoor.’ Kụ oye phọ amheeraam.

Olhoghi a Jehova ạḅaal li ịduon bịdi ọnhaghanhan bọ nyọdi. Mem dị ḍioph aḍughul otu eten, ạ Dạnịẹl r’ịraar phọ ạrighiri phọ ọdi umhoon ni loor ọḅilhe ọnhighe opu bụeripho ạnmuny phọ. Ọdi ạngo kẹn ni Dạnịẹl ọsu olhoghi ọgba ghan ạmalha r’uḍien.

Mem mọ ịtughemhi phọ ạbidi emhunheen bọ, Ạspịnạz ạpham ni oomo ạnmuny phọ ạghi aḍeenhaan uwo ẹmha phọ Nebukạdneza. Uwo ẹmha phọ apuru ni bịdi sipuru kụ ạmhiin mọ ạ Dạnịẹl, a Hạnạnạyạ, a Misẹl, rạ Ạzạrạyạ ọsu olhoghi ọḅilhe olegheri ịyaar opu bụeripho ạnmuny phọ. Kụ ọdi ạsaḅar bịdi oḍighinhaan ghan ọdi oḍighi. Uwo ẹmha phọ apuru ghan ni bịdi ịlo oḍighi mem dị ịyaar emite. A Jehova aḍighi ni ịdi bịdi ọsu olhoghi opu bụeripho awe phọ uwo ẹmha phọ apuru aani ghan bọ ịlo oḍighi, r’ạbuo idike phọ ọdi.

Ghạlhamo r’ịduon bịdi ọrol bọ ni Bạbịlọn, ạ Dạnịẹl, a Hạnạnạyạ, a Misẹl, rạ Ạzạrạyạ ulhegheri ni mọ bịdi ạrebenhe a Jehova. Eḍighi mạar dị nạ odi ekpisi dị ọde r’onhiin ạna úlo, nạ kạatughian ni mọ nạ ẹbenhe a Jehova ḍụghum?