Ịge Dị Ọge Loor Iikpe

Ẹsighe rẹki bịn a Bẹlsạzạ aḍighi uwo ẹmha ạ Bạbịlọn. Ḍiniin aḍughul, a Bẹlsạzạ ạamaghagh ni sịmuonir ikpolhom awe sịphe ẹmha phọ oru olhe ẹyaal r’ọdi. Ọdi arom rẹbenhe phọ ọdi mọ omiteom sịmogo phọ a Nebukạdneza ạsigheogh bọ ẹpe otu ịiḅereghi phọ a Jehova. Kụ ọdi r’aruuruen phọ ọdi ọsighe sịmogo phọ ọphugholhom miim, kụ ooseeny ghan rụmhugh phọ ạbidi. Ekperenhom bịn ạḍighaagh oye emite sịphe bịdi role bọ eḍien phọ kụ ẹge sịphe iikpe phọ ịyaar dị bịdi úlegheri ẹmhu phọ.

A Bẹlsạzạ aghiilhaan ni kụ ạamaghagh we idike phọ ọdi ạḅenhi mọ: ‘Mị kaḍighi tọrobo ọnyo anyinha dị arue ạghaaph ẹmhu ịge phọ ịphen phọ omhunhenhiom ịraar oye dị ạmhoogh ịikpo sịen Bạbịlọn.’ Bịdi uḍighi ni oomo ịpe bịdi kotue bọ ọgba ẹmhu ịge phọ kụolo útue. Ukuenhi phọ aḍigh sịphe bịdi odi bọ kụ ạḅem mọ: ‘Oye odi ni dị oghol mọ ạ Dạnịẹl, dị ạgba ghan rạraar ạḅenhi a Nebukạdneza. Ọdi katue ni ạḅenhi nyịnha ẹmhu ịge phọ.’

Ụmhagh ni Dạnịẹl ọsighe orumom, kụ a Bẹlsạzạ ạḅenhi nyọdi mọ: ‘Eḍighi mạar dị nạ katue ni ạbal ịge phọ, kụ ạḅilhe ạkaaph ịyaar phọ rẹma ghan bọ, mị kạngo nyịnha ọla orum dị oḍighinhom gol. Kụ aḍighi nyịnha omhunhenhiom ịraar oye dị ạmhoogh ịikpo apelheghiom sịen Bạbịlọn.’ Ạ Dạnịẹl ạḅenhi nyọdi mọ: ‘Mị ụ́wa ruunmo ạna. Mị kạḅenhi ni nyịnha ẹmhu ịge phọ. A Nebuchadnezza ọde phọ ạna, aphoophe ni loor, kụ a Jehova asooromhi nyọdi. Nạ alegheri ni oomo ịphen phọ, kụolo nạ asopha oḍighi ạraraar dị a Jehova ị́ḅeraan. Nạ ạsighe sịmogo a gol phọ ọde phọ ạna ạsighe bọ sịphe otu ịiḅereghi phọ a Jehova rạpugholhom miim. Kụ Ẹnhaan kụ irom bọ mọ ọge mọ: Mini, Mini, Tikẹl, rạ Pạsịn. Ikpo ọnhu phọ ịphen phọ rẹma ghan mọ awe a Midia rạ Pạsịạ kọkpar ri opu Bạbịlọn, kụ nạ káḍighi mụn uwo ẹmha.’

Mem mọ ạmuphe phọ, ịghigh mụdi awe úlo dị kotue ọkpar opu Bạbịlọn, loor esi dị iikpe ẹmha phọ iphoph kụ ẹḅilhe ẹbugh kụ ọphiiny aaghironhom ẹmha phọ. Kụolo ḍughul phọ ạḍiphe phọ, awe a Midia rạ Pạsịạ uzuom ni Bạbịlọn. Uwo ẹmha ạ Pạsịạ dị oghol mọ Sạịrọs aḍighi ni ịdi ạmuum ọphiiny phọ akil ạghi ẹnhon ạga kụ awe ẹgham mọ ọdi ọguph ọḅeeny. Mem dị bịdi osi sịphe eghuugh phọ, bịdi ụmhiin mọ ụ́kasi! Kụ awe ẹgham mọ ọdi oḍigh olhoghi kụ ọkpar opu Bạbịlọn, kụ ọḅilhe oghiigh a Bẹlsạzạ. Kụ ạ Sạịrọs aḍighi uwo ẹmha ạ Bạbịlọn.

Ạ Sạịrọs rọtooghi dị rẹki ọmhan ạlha bịn ạḅem mọ: ‘A Jehova ụḅenhi ịmhi mọ mị ụki ụḅilhe ụlogh otu ịiḅereghi phọ ọdi ẹpe Jeruselem. Tọrobo ọlo Izrẹl dị rạwa ọghi ọlhoghonhaan ạḍighaagh atue ni ạki.’ Kụ ịdipho a Jehova aguan bọ, ịbadi awe Izrẹl uḅula ni ẹpe Jeruselem mem dị 70 ạsia meten egbi k’amem mọ ophiemhi bọ. Ạ Sạịrọs aḅulhemhi ni sịmogo a gol ra silva phọ r’ịpheripho ạraraar phọ a Nebukạdneza ạsigheogh bọ sịphe otu ịiḅereghi phọ a Jehova. Nạ ạmiin ni ịdi a Jehova ạsighe Sạịrọs ạphelhom we phọ ọdi?