Ạmalha Ogbogh Oreeny

Ḍiniin aḍughul, a Nebukạdneza ạmalha ni mạlha dị aḍigh ḍiigu esi ọdi. Ọdi ạmhagh we ọsu olhoghi phọ ọdi kụ ạḅenhi bịdi mọ ọgba ẹmhu ạmalha phọ. Kụolo ọnyo ạbidi ọ́rol dị arue ạgba mạlha phọ, kụ ọdi ạghi ạteeny Dạnịẹl.

A Nebukạdneza ạḅenhi Dạnịẹl mọ: ‘Mị ụmalha ni ạmhiin oreeny dị aphoph asi ẹpe okuaḍio phọ, dị tọrobo oye katue ni ạmiin. Ạrinya oreeny phọ ịmhaar ẹnhighe r’iimumha dị ẹrol. Ịnham ịmhinha ghan ni ẹeḍian oreeny phọ. Kụ ịnhun ẹlhoghoḍi ruutu sịphe ịla phọ. Ọokpaany ạḍua ni ẹpe k’ạke asoor kụ ạlo mọ: “Iler oreeny phọ, eegbo ịla phọ. Kụolo ịbilhe egisi phọ sịphe ade phọ ẹkpooghi eeghironhom izime okuruon r’ọgiata. Esi oḍual ạsia, oreeny phọ kạ́moogh mụn olhoghi oye, kạmoogh ghụn olhoghi ẹnham. Kụ oomo awe phọ kolegheri ni mọ Ẹnhaan kụ Ọtooghia, ḅịlhe mọ ọdi katue ni ạngo ịikpo ịtooghi phọ tọrobo oye dị ọdi ạwa.”’

A Jehova aḍeenhaan ni Dạnịẹl ẹmhu ạmalha phọ a Nebukạdneza, kụ ẹeḅaghamhi Dạnịẹl. Kụ ọdi ạḅenhi uwo ẹmha phọ mọ: ‘Uwo ẹmha ạmhi, mịnighe ni eḍighi mạar dị ạmalha phọ agbolhomaam ẹ́pomhoghian ạna. Kụolo ạmalha phọ agbolhomaam nyịnha. Nạ kụ oreeny phọ olher bọ. Kạar ri nyịnha ịtooghi phọ ạna, kụ nạ ạtaal rọogho ịdipho ẹnham elhegheḍum. Kụolo loor ịduon ọokpaany phọ ạḅem bọ mọ ọwilhe egisi phọ sịphe ade phọ, kọḅilhe ni ọngo nyịnha ịtooghi phọ ạna.’

Ạmalha phọ a Nebukạdneza ạ Dạnịẹl ạgba bọ amhunhughan mem dị ạlha eten. Ḍio phọ ạḍiphe phọ, r’ophoophe aloor a Nebukạdneza arelhe ghan ạnyu otu ọdi kụ ạḅem ghan mọ: ‘Mịin egbogh ẹmha dị mị mạlhogh. Ịtooghi phọ ạmhi mẹbugh!’ Kụolo ịduon ọdi odi bọ rạkaaph, ẹḍogh ịḅa ni ẹpe k’ạke phọ, kụ ẹḅem mọ: ‘Nebukạdneza! Nyịidipho, mọ ạar nyịnha ịtooghi phọ ạna.’

Mem mem mọ bịn a Nebukạdneza aḍigh ẹlhaal kụ amhiigh oḅo ịdipho elhom ẹnham. Uphorogh ni nyọdi omiteom sịphe otu phọ ọdi kụ ọdi ạghi ạrol r’ịnham elhegheḍum mọ. Kụ ạsilhaal ọdi ẹdoony ịdipho asuphuugh uga, kụ ạraphaaph phọ ọdi ẹrol ịdipho ịlo ẹnhun.

Mem mọ oḍual ạsia phọ eten bọ, a Nebukạdneza amhoon ni, kụ a Jehova ạḅilhe ạngo nyọdi eepoogh oḍighi uwo ẹmha ạ Bạbịlọn. A Nebukạdneza ạḅem mọ: ‘Mị raaseeny ni a Jehova, Uwo ẹmha ẹpe k’ạke phọ. Nyịidipho mị malhegheri mọ nạ a Jehova kụ Ọtooghia phọ. Kụ nạ rasooromhi ghan ni we lọ ophoophe loor, kụ kạngo ịtooghi phọ tọrobo oye lọ nạ ạwa.’