Ịtooghi Dị Kẹtol K’agee-pọ

Ḍiniin aḍughul, Uwo ẹmha phọ Nebukạdneza ạmalha ni mạlha dị aḍighi ịdi ọdi útue mụn ụnaanhi. Kụ ọdi ạmhagh we idike phọ ọdi, r’awe ọsu olhoghi phọ ọdi, kụ ạḅenhi mọ: ‘Ịgba ẹmhu ạmalha phọ ạmhi ịḅenhi ịmhi.’ Bịdi ụḅenhi nyọdi mọ: ‘Uwo ẹmha ayoor, ụḅenhi iyoor mạlha phọ ạna.’ Kụolo uwo ẹmha phọ Nebukạdneza ạḅenhi bịdi mọ: ‘Mị inyinha rị́ḅenhi! Nyinha kụ kẹkaaph mạlha phọ ạmhi ịḅenhi ịmhi. Nyinha ị́kaaph mạlha phọ ạmhi, mị kịze inyinha.’ Bịdi ụḅilhe ni ọḅenhi nyọdi mọ: ‘Ụḅenhi iyoor mạlha phọ ạna bịn yoor kọgba ni ẹmhu phọ ọḅenhi nyịnha.’ Uwo ẹmha phọ ạphagharanhaan bịdi mọ: ‘Nyinha rẹwa ookelheghi ạmhi. Ịḅenhi ịmhi mạlha phọ ạmhi!’ Bịdi ụḅenhi uwo ẹmha phọ mọ: ‘Oye ólho sịen ade phọ dị katue aḍighi ịphen nạ rạkaaph bọ.’

A Nebukạdneza ạghagh ni olhoghi kụ ạngo ịto mọ ọze oomo awe ọsu olhoghi phọ ọdi ẹḅaram bọ ni Dạnịẹl, Sedạrạk, Misạk, rạ Ạbẹdnigo. Ạ Dạnịẹl ạḅenhi ni uwo ẹmha phọ mọ ạngo bịdi mem. Kụ ọdi r’ịraar phọ ạrighiri phọ ọdi ọghi ọlhom ọlhoghonhaan ạḍighaagh a Jehova. A Jehova ạlhoghonhaan ni bịdi ḍịghaagh ḍụghum?

Dị eego esi uḍien, a Jehova aḍeenhaan ni Dạnịẹl mạlha phọ a Nebukạdneza r’ịyaar phọ rẹma ghan bọ. Ḍịeripho aḍio phọ, ạ Dạnịẹl ạghi ni ạteeny otelhedom uwo ẹmha phọ kụ ạḅenhi mọ: ‘Kạ́ze we idike phọ r’awe ọsu olhoghi phọ. Mị katue ni ạgba mạlha uwo ẹmha phọ.’ Kụ otelhedom uwo ẹmha phọ ạsighe Dạnịẹl ạghi aḍeenhaan a Nebukạdneza, kụ ạ Dạnịẹl ạḅenhi uwo ẹmha phọ mọ: ‘Ẹnhaan meḍeenhaan nyịnha ịdi kemite ghisigh. Sịphe ạmalha phọ ạna, nạ ụmhiin igbogh igbudu dị ẹmhu phọ eḍighi gol, kụ ekpolhoghi phọ r’ạrighaagh phọ eḍighi silva, kụ ọkuruḅaka phọ r’ạrugbo phọ eḍighi ọgiata, kụ aruwol phọ eḍighi okuruon, kụ ạrada phọ eniin ạpakiri eḍighi okuruon, eniin eḍighi ạḅay. Kụ aḍighiigh esophaany loor ẹeḅaraph emheelhom ruwol igbudu phọ. Kụ igbudu phọ emheel eetughuḍian. Kụ ookuugh aphulha ạsigheogh. Ekpo aḍighiigh phọ emheelhom bọ igbudu phọ iten egbogh ẹeḅaraph kụ elheeny oomo ade phọ.’

Ạ Dạnịẹl ạḅilhe ni ạḅenhi uwo ẹmha phọ mọ: ‘Ẹmhu ạmalha phọ ạna ịduon: Ịtooghi phọ ạna kụ ẹmhu a gol phọ. Kụ ịnhon ịtooghi dị kẹḅilhe emite kụ a silva phọ. Kụ ịnhon ịtooghi dị kẹḅilhe emite keleeny ni oomo aḅirinhi phọ, kụ ịtooghi phọ ịpe phọ kụ ọgiata phọ. Ịpe eten, ịnhon ịtooghi dị kẹḅilhe emite kẹkpar ịdipho okuruon. Kụ ịpe kesughanham bọ ọmhan phọ kẹkpar ri ịdipho okuruon kụ ẹḅilhe edugh ịdipho ạḅay. Ekpo aḍighiigh phọ eten bọ ẹeḅaraph phọ, ọmhar Ẹnhaan. Kụ ọmhar phọ ọpo phọ kapiemhi ni ịpheripho ịtooghi phọ kụ ẹtol k’agee-pọ.’

A Nebukạdneza akpuḍian ni ghisigh ạ Dạnịẹl kụ ạḅem mọ: ‘Ẹnhaan phọ ạna kụ aḍeenhaan nyịnha ịphen phọ. Ẹmhugh ílo dị ẹrol ịduon ọdi.’ Kpạripe r’oghiigh ạ Dạnịẹl, a Nebukạdneza aḍighi nyọdi oḍiemhiom awe ọsu olhoghi phọ ọdi, kụ ạḅilhe ạma nyọdi oḍighi oniin oye dị ạpham ịikpo ịtooghi sịphe Bạbịlọn. Nạ mạmhiin ịdi a Jehova ạphagharanhaan ịiḅereghi phọ ạ Dạnịẹl?