Ẹstạ Ạphel Li We Phọ Ọdi

Oniin ọnyanhi ọlo a Ju ạrol li dị oghol mọ Ẹstạ. Ọnyo asiya ọdi dị oghol mọ Mọdẹkạị kụ aakonhom nyọdi. Bịdi ụrol ghan ẹmha ạ Pạsịạ dị oghol mọ Susạn. Kụ ạ Mọdẹkạị aḍighinhaan ghan oḍighi Uwo ẹmha phọ ạ Pạsịạ, oghol bọ mọ Ạhạsuirọs.

Uwo ẹmha phọ Ạhạsuirọs ạwa ni omhoom ukuenhi. Esi ịduon phọ, ạrebenhe phọ ọdi ụsaḅar nmạnyaan dị ọkar ọnhighe sịphe ẹmha phọ kụ ọghi ọngo nyọdi. Igbo ạnmanyaan phọ ọsaḅar bọ, Ẹstạ ạrolhom aani ni. Kụ uwo ẹmha phọ ạsaḅar Ẹstạ oḍighi ukuenhi. Kụolo ạ Mọdẹkạị ạḅenhi Ẹstạ mọ kụ́ḅenhi oye mọ ọdi ọnyo a Ju.

Oniin oye dị aphoophe loor dị oghol mọ a Hemạn kụ aḍiemhiom ghan oomo ikpolhom awe phọ uwo ẹmha phọ ạmhoogh bọ. Kụ ọdi ạwa ghan dị tọrobo oye kakpuḍian ghan ạngo nyọdi. Mem dị ạ Mọdẹkạị úmeera ukpuḍian ụngo Hemạn, a Hemạn ạghagh ni olhoghi iboom dị tụtu amhiigh ọwa areten oghiigh ạ Mọdẹkạị. Mem dị a Hemạn alhegheri mọ ạ Mọdẹkạị ọnyo a Ju, ọdi ạatughian ni ịlo oḍighi kụ ọze oomo a Ju phọ odi bọ ẹeḍian ịtooghi ạ Pạsịạ. Ọdi ạghi ạḅenhi uwo ẹmha phọ mọ: ‘Ạbuo a Ju phọ rọ́daph ghan iilhogh phọ ạna. Esi ịduon phọ, ẹwa mọ ọze bịdi.’ Ạhạsuirọs ạḅenhi nyọdi mọ: ‘Kịa aḍighi tọrobo ịlo nạ rạwa.’ A Hemạn ạngo ni ịto mọ ọze we a Ju phọ ụnwanyu Edạ, ḍughul otu dị emhunhenhiom 13. A Jehova ạmhiin ghan ni oomo ịpe remite bọ.

Ẹstạ ólhegheri ịpe remite bọ. Esi ịduon phọ ạ Mọdẹkạị arom ni mọ ọsighe ḍịnya phọ ọge bọ olhogh phọ ọghi oḍeenhaan Ẹstạ. Kụ ọḅenhi Ẹstạ mọ ạghi ạḅaanhaan uwo ẹmha phọ. Kụolo Ẹstạ ạphagharanhaan ạ Mọdẹkạị mọ: ‘Tọrobo oye dị ạghi ạteeny uwo ẹmha phọ dị uwo ẹmha phọ kụ́magh nyọdi, pọ kokiigh ni. Kụ uwo ẹmha phọ ịmhi kụ́mhagh sịen 30 aḍughul otu! Kụolo mị kạki ni. Eḍighi mạar dị ọdi aphoophe ịkpara ọdaam mọ ọdi, pọ mị kạtol li. Kụolo ịdipho kụ ílo, pọ mị kamugh ni.’

Ẹstạ ạghi ni aḍigh sịphe ogiga uwo ẹmha phọ kụ anyeenhe ọghi ọteeny ọdi. Mem dị uwo ẹmha phọ ạmhiin bọ Ẹstạ, ọdi aphoophe ni ịkpara ọdaam mọ ọdi. Ẹstạ rosi sịphe uwo ẹmha phọ ạrol bọ, kụ uwo ẹmha phọ apuru mọ: ‘Nạ rạwa mọ mị uḍighinhaan nyịnha eeghe?’ Ẹstạ ạḅenhi nyọdi mọ: ‘Mị rạwa dị a Hemạn r’ạna ketu ele male dị mị aakolhobian.’ Mem dị bịdi olhe eḍien phọ ọmhan, Ẹstạ ạḅilhe ni ạḅenhi bịdi mọ oru ḍịeripho aḍio phọ olhe ẹnhon eḍien dị ọdi kaakolhobian. Sịphe omhunhenhiom ịyal amale phọ, uwo ẹmha phọ ạḅilhe ni apuru nyọdi mọ: ‘Nạ rạwa mọ mị uḍighinhaan nyịnha eeghe?’ Ẹstạ ạḅenhi nyọdi mọ: ‘Ẹmoogh ni oye dị rạwa oghiigh ạmhi r’awe phọ ạmhi. Seseeny, ụphel iyoor.’ Uwo ẹmha phọ apuru nyọdi mọ: ‘Ạnhian kụ rạwa bọ oghiigh ạna?’ Kụ Ẹstạ ạḅenhi nyọdi mọ: ‘Ọḅaghama phọ a Hemạn.’ Ịphen phọ ịghagh ni olhoghi Ạhạsuirọs iboom dị ạngo ịto mọ oghiigh Hemạn mem mem mọ.

Kụolo ghạlhamo r’uwo ẹmha phọ bịn, kátue anme olhogh phọ a Hemạn. Esi ịduon phọ, uwo ẹmha phọ ạsighe ni Mọdẹkạị aḍighi oḍiemhiom ikpolhom awe phọ, kụ ạngo nyọdi ịikpo ọlhogh omhoom olhogh. Ạ Mọdẹkạị ạlhogh ni olhogh dị amheera mọ awe a Ju phọ eenhan ni mụlhogh ḍien phọ ạbidi ọphelha asiloor. Awe a Ju phọ ụkpar ri opu mụlhogh ḍien phọ ạbidi sịphe omhunhenhiom 13 aḍughul otu ụnwanyu phọ Edạ. Kụ emhiigh mem mọ ạmuphe phọ kụ rẹki, bịdi ulhe ghan ẹyaal ọotughianham ọkpar opu phọ ọphon phọ tọrobo ạlha.