Ẹzrạ Ạtughemhi Olhogh Phọ Ẹnhaan

Rẹki ni ọmhan 70 ạsia awe phọ Izrẹl ọmhoogh bọ ẹereegh oḅula a Jeruselem, kụolo abuniin ạbidi ụrol li kịrokiro arikpisi dị ẹrol ẹeḍian ịtooghi phọ ạ Pạsịạ. Oniin oye dị ạrol aani ẹeḍian ịtooghi phọ ạ Pạsịạ pọ Ẹzrạ. Ẹzrạ aḍighi oye dị ạtughemhi ghan we iilhogh phọ a Jehova. Ḍiniin aḍio ụḅenhi ni Ẹzrạ mọ awe phọ odi bọ Jeruselem róoko ghan mụn iilhogh phọ a Jehova, kụ ẹphu nyọdi ọghi ọlhoghonhaan ạbidi ḍịghaagh. Uwo ẹmha phọ ạ Pạsịạ, Ạtạzạkzịs ạḅenhi Ẹzrạ mọ: ‘Ẹnhaan mạngo nyịnha ọsu olhoghi ọtughemhiom awe phọ ọdi iilhogh phọ ọdi. Kịa Jeruselem ạtughemhi bịdi iilhogh phọ. Kụ tọrobo oye lọ rạwa atue ni ạdaph nyịnha.’ Ẹzrạ ạghi ni ạteeny we dị rọwa oḅula a Jeruselem, kụ oomo phọ ạbidi ọoḅereghi ọlhom dị a Jehova kạaḅaki bịdi kụ onyeenhe Jeruselem.

Ịsighe bịdi inya ạrunwanyu osi a Jeruselem. Ẹpe Jeruselem, ikpolhom awe phọ ụḅenhi Ẹzrạ mọ: ‘Awe phọ Izrẹl úuko mụn iilhogh phọ a Jehova. Bịdi mophinhogh nmạriir dị rọoḅereghi ghan ịkaanheen ạrumhugh.’ Kụ Ẹzrạ akpuḍian risigh oomo awe phọ kụ ạaḅereghi ạḅenhi a Jehova mọ: ‘Jehova, nạ muḍighinhaan iyoor ịbadi ạraraar, kụolo yoor mọpioman nyịnha.’ Ịiḅereghi phọ itir ri we phọ kụ okiton, kụolo ạraraar ịrol li dị ẹwa dị bịdi koolemhi. Ẹzrạ ạma ni ikumor awe r’abuugboom ịiruen dị kọloghonhaan ḍịghaagh we phọ oolemhi ạraraar. Tụtu ịraar ạrunwanyu reten, awe phọ uphorogh ni oomo awe phọ ạbuphe rọ́oḅereghi bọ a Jehova.

Kụ tụtu aḍioph r’ịyal ạsia reten, bịn ọlhogh iikpe phọ a Jeruselem ọmhan. Esi ịduon phọ, Ẹzrạ aakpomhoghi ni oomo awe phọ sịphe egbogh erugh ẹmha phọ ạal ekpo ọnhu phọ Ẹnhaan ọḅenhi ạbidi. Mem dị Ẹzrạ akpegheron ḍịnya phọ ọge bọ iilhogh phọ a Jehova, awe phọ ụmheregha ni. Kụ ọdi aboom a Jehova kụ awe phọ ophoophe rạghaagh ạbidi omheeraam. Kụ Ẹzrạ ạal olhogh phọ kụ ạḅilhe ạgba, kụ awe phọ olher rụru ọnhaghan. Bịdi umheeraam ni mọ bịdi mọwilhe ooko iilhogh phọ a Jehova kụ omhoghi yogh. Ḍịeripho aḍio phọ, Ẹzrạ ạḅilhe ni ạal iilhogh phọ Ẹnhaan ạḅenhi we phọ kụ bịdi ọmhiin mọ ẹkpe ni dị bịdi kole Ẹyaal Arogbogo phọ. Mem mem mọ bịn, bịdi omhiigh ookolhobian ịlo olhe ẹyaal phọ.

Sịphe oḍual aḍughul otu phọ awe phọ olhe bọ ẹyaal phọ, bịdi ubo ni kụ ọseph ghan a Jehova loor ịduon ạseph bọ ịizupha phọ ạbidi. Awe phọ Izrẹl kólhe ghan Ẹyaal Arogbogo dị ẹrol ịduon phọ emhiigh k’amem mọ ạ Jọsụạ. Ẹyaal phọ eten bọ, awe phọ uukpomhoghan ni kụ ọoḅereghi ọḅenhi a Jehova mọ: ‘Jehova, nạ ụphel iyoor ạsighe dọl ạrebenhe, kụ ụngo iyoor eḍien ẹpe ẹdala phọ kụ ạḅilhe ụngo iyoor ḍịma ade phọ ạḍien. Kụolo ẹgba gbạ amem yoor roḍighi ghan rạraar dị nyịnha ị́ḅeraan. Nạ urom ni riil phọ ạna ọphur ayoor rụru kụolo yoor ụ́naghan. Ghạlhamo r’ịduon phọ, nạ ụkparam ni, kụ nạ aḍighi ịpe nạ aguanhaan bọ Ebrạhạm. Nyịidipho yoor moguanhaan ọnhaghanhan ghan ạna.’ Bịdi ụge ni oguan phọ oseere kụ ikpolhom awe phọ, r’ạbuo a Livạị phọ r’ạbupinyon rịkia phọ ọviilhom rạghaagh ạbidi.