Iikpe Phọ A Jeruselem

Oniin ọnyo Izrẹl dị oghol mọ Nehimạyạ ạrol aani ni mem mọ Ẹzrạ. Ọdi aḍighi ẹbenhe Uwo ẹmha phọ Ạtạzạkzịs, kụ ạrol ghan ẹmha ạ Pạsịạ dị oghol mọ Susạn. Abumor a Nehimạyạ dị ọḍua Judia oru ụḅenhi ni nyọdi mọ: ‘Awe phọ odi bọ Jeruselem ụ́moogh oghoph. Ịdi eḍighi bọ, kọ́lhogh mụn iikpe ẹmha phọ r’arughuugh phọ awe phọ ạ Bạbịlọn olhereghi bọ.’ Ịkaraph ịinhaghan phọ ịphen phọ iḍighi ni ịdi olhoghi a Nehimạyạ ụ́ḅaal kụ ọdi ạwa reten ọlhoghonhaan awe phọ ḍịghaagh. Ọdi ạaḅereghi ni ạḅenhi a Jehova mọ aḍighi ịdi uwo ẹmha phọ kạngo nyọdi eepoogh oḅula a Jeruselem.

Ḍiniin aḍio uwo ẹmha phọ ạmhiin ni mọ olhoghi a Nehimạyạ ọ́ḅaal, kụ ạḅenhi nyọdi mọ: ‘Mị kọ́mhiin ghan dị olhoghi ạna eeph ịduon phọ. Eeghe kụ imite?’ A Nehimạyạ ạphagharanhaan mọ: ‘Olhoghi ạmhi ọ́ḅaal loor esi ịduon kọ́ḅilhe bọ ọlhogh ẹmha phọ ạmhi Jeruselem.’ Uwo ẹmha phọ apuru ni a Nehimạyạ mọ: ‘Nạ rạwa dị mị kaḍighinhaan nyịnha eeghe?’ Mem mem mọ bịn a Nehimạyạ ạaḅereghiom olhoghi ọdi, kụ ạḅenhi uwo ẹmha phọ mọ: ‘Seseeny, meera mị ụki ụḅilhe ụlogh iikpe phọ a Jeruselem.’ Uwo ẹmha phọ Ạtạzạkzịs amheera ni mọ a Nehimạyạ aḅula Jeruselem kụ ạḅilhe ạngo nyọdi rạraar ọghimom. Ọdi ạma kẹn ni a Nehimạyạ oḍighi opoghom a Judia kụ ạngo nyọdi ireeny ọlhoghom arughuugh ẹmha phọ.

Mem dị a Nehimạyạ asi Jeruselem, ọdi ạghi ni ạmhiin iikpe phọ molhereghi bọ. Kụ aakpomhoghi bụpinyon rịkia phọ r’ạbuphe ọpham bọ riisi ịtooghi, kụ ạḅenhi bịdi mọ: ‘Ịphen mị ạmhiin bọ eḍighi rạraar umugholoor. Itu ọḅilhe ọlhogh iikpe ẹmha phọ.’ Awe phọ umheeraam ni kụ omhiigh ọlhogh iikpe ẹmha phọ.

Abuniin awe dị ọlhogh ḍien we phọ Izrẹl ụmilhogh ni bịdi kụ ọḅem mọ: ‘Ẹekpa-ko ketue ni ekul iikpe phọ ịphen nyinha rẹlogh bọ elereghi.’ Kụolo ạbuphe roḍighi bọ oḍighi phọ úpogh rạghaaph phọ ạbidi. Bịdi ụghiom ni ghisigh ọlhogh iikpe phọ.

Ạbuphe ọlhogh bọ ḍien we phọ Izrẹl ụḅem mọ bụno kozuom we phọ Izrẹl ekperenhom. Kụ ịphen phọ eḍighi ịdi awe phọ Izrẹl ọmhoogh oghiilhaan, esi ịduon phọ a Nehimạyạ ạḅenhi bịdi mọ: ‘Kékiilhaan, a Jehova odi ni r’ayira.’ A Nehimạyạ ạma ni buniin awe Izrẹl oghoph ạbuphe roḍighi bọ oḍighi phọ, kụ ịphen phọ eḍighi ịdi ạbumulhogh ḍien phọ útue uzuom Jeruselem.

Esi 52 aḍughul otu bịn awe phọ ọlhogh iikpe phọ r’arughuugh phọ a Jeruselem ọmhan. A Nehimạyạ ạmhagh ni bụo a Livạị phọ kụ oru Jeruselem loor esi ịduon rọwa bọ ọḅogh iikpe phọ ọngo a Jehova. Ọdi aakpomhoghi ni ịyal arugu awe dị kọmoor ghan sụor. Eniin egu unyeenhe gạ ekeeny kụ ẹpheripho enyeenhe gạ elhiom. Kụ orelhe ooghironhom iikpe ẹmha phọ tụtu osi sịphe otu ịiḅereghi phọ. Bịdi ụmoor ri sụor oboom a Jehova r’ạrukuodu, ipoḍi ạsigbagba iitia r’ọne. Ẹzrạ ạrol r’eniin egu, kụ a Nehimạyạ ạrol r’ẹpheripho egu phọ. Oomo awe phọ ọrol bọ Jeruselem ụphighiron ni ẹkia ọngo a Jehova kụ obo. Ẹḍogh ibo phọ ạbidi isi ni rikpisi dị ẹkel.