Mem Dị A Jizọs Ạmhan Ḍioph R’ịyal Ạsia

Epel Jizọs, a Josẹf ra Meri ụḅilhe ni ọmhar bụnhon ịbam ạnmuny. Kụ oomo phọ ạbidi ụrol ghan ẹpe Nạzạrẹt. A Josẹf ạtughemhi ghan ni eghun otu phọ ọdi ịlo a Jehova r’iilhogh phọ ọdi. Kụ orue omiteom eḍien ọngo eghun otu phọ ọdi, ọdi aḍighi ghan oḍighi ọka ạmaka. A Josẹf agbor ghan ni ạpham eghun otu phọ ọdi ạghimom esi dị oghol mọ obughotu, ọtuugha ịlo a Jehova r’ọoḅereghi ọdi. Kụ tọrobo ạlha bịdi ụghi ghan ni Jeruselem olhe Ẹyaal Ọphel Otenhe phọ.

Mem dị a Jizọs ạmhan 12 ạsia, a Josẹf ạpham ni eghun otu phọ ọdi ạghimom Jeruselem olhe Ẹyaal Ọphel Otenhe phọ. Awe arikpisi kịrokiro ụghi aani ni Jeruselem olhe Ẹyaal phọ. Mem dị olhe Ẹyaal phọ ọmhan, eghun otu phọ a Josẹf unyeenhe ni ogheel ẹmha ạbidi, kụolo úlegheri mọ a Jizọs ọ́daph aani egu awe phọ roḅula bọ. Mem dị a Josẹf ra Meri olhegheri mọ a Jizọs ólho r’asiya ạbidi, bịdi umhiigh ni ọwa ọdi.

Bịdi ụḅilhe ni oḅula Jeruselem kụ ọwa Jizọs esi ịraar aḍughul otu. Eekunha phọ bịdi ụghi sịphe otu ịiḅereghi phọ kụ ọmhiin Jizọs dị ạrol igbo ạbutughemhia phọ rạnaghan ghan ịlo bịdi rọkaaph kạḅilhe apuru bịdi sipuru. Ịphen phọ ịkar kụ etir bụtughemhia phọ dị tụtu omhiigh opuru yogh a Jizọs sipuru. Eten phọ ọdi ạphanyanhaan ghan bọ bịdi ịkar kụ eḍighi iikia esi ạbidi. Bịdi ụmhiin mọ ọdi ạnaghanhan agey Iilhogh phọ a Jehova.

A Josẹf ra Meri ụmhoogh ni oboom ọoḅaghamhian aloor. Esi ịduon phọ a Meri ạḅenhi Jizọs mọ: ‘Mọo, yoor mọwa nyịnha oomo arikpisi!’ A Jizọs ạphagharanhaan mọ: ‘Nyinha ílegheri mọ mị kạtol sịen otu ọde phọ ạmhi?’

Kụ a Jizọs ạdaph ọde r’onhiin phọ ọdi aḅula Nạzạrẹt. A Josẹf ạtughemhi Jizọs oḍighi ọka ạmaka. Nạ ragbi mọ a Jizọs ạmhoogh ni ịma ạraaghara ịdipho ọnyo ịḍoogh ḍụghum? Ii. Ạ Bạịbul phọ ụḅenhi iyira mọ ịdipho a Jizọs rapoph bọ, olhegheri ịyaar phọ ọdi ạbugh ni, kụ ạḅeraan Ẹnhaan r’awe.