A Jehova Aghoph Ni Jizọs

Awe dị odi ghan ekpisi dị ẹkelhan de phọ Izrẹl umheeraam mọ ạraanhaan phọ ketue ni ẹeḅaki bịdi. Ḍiniin aḍughul abuniin awe dị oḍighi bụo ekpisi phọ ẹpe phọ ụmhiin ni ẹenhaan dị rẹmu agey kụ ọdaph ẹenhaan phọ osi Jeruselem. Ẹpe phọ bịdi umhiigh ni opuru ghan awe mọ: ‘Ọony phọ ọmhar bọ dị kaḍighi uwo ẹmha awe a Ju phọ odi ẹghen? Yoor uru oghuenhi aani ọdi.’

Iphin ni olhoghi ạ Hẹrọd aḍighi bọ uwo ẹmha a Jeruselem, mem mọ ạnhaghan bọ mọ mọmhar omhoom uwo ẹmha. Esi ịduon phọ, ọdi apuru bụpinyon rịkia phọ mọ: ‘Ụḅem mọ kọmar uwo ẹmha phọ ọphon phọ ẹghen?’ Kụ bịdi ọḅenhi nyọdi mọ: ‘Ariil phọ ụḅem mọ kọmar nyọdi ẹpe Bẹtẹlẹhẹm.’ Ạ Hẹrọd ạmhagh ni we phọ ọdaph bọ ẹenhaan phọ kụ ạḅenhi mọ: ‘Ịki ẹpe Bẹtẹlẹhẹm ẹwa ọbumoony phọ ẹmhiin kụ eru ịḅenhi aani ịmhi esi phọ ọdi odi bọ, pịdi mị ạki akuenhi aani nyọdi.’ Kụolo ạ Hẹrọd ạgba ghan ọkpe.

Bịdi romite sịphe kạ Hẹrọd, kụ ọdaph ẹenhaan phọ osi Bẹtẹlẹhẹm. Kụ ẹenhaan phọ ẹmheera ạnyu otu phọ a Jizọs odi bọ. Kụ bịdi oḍigh olhoghi, kụ ọmhiin Jizọs ra Meri onhiin phọ ọdi kụ okpuḍian risigh ọbumoony phọ oghuenhi. Bịdi ụngo ni nyọdi gol rạ frạnkinsẹns rạ mạạ. Nạ ragbi ni mọ a Jehova kụ ạkar ri arom we phọ ạbuen phọ ọghi ọmhiin a Jizọs ḍụghum? Eeye.

Ḍughul phọ ạḍiphe phọ bịn a Jehova ạḅenhi Josẹf ụmalha mọ: ‘Ạ Hẹrọd rạwa oghiigh a Jizọs. Pạm ạnhir phọ ạna r’ọbumoony phọ esuma ẹghi Ijipt. Kụ ẹrol ẹpe phọ tụtu mị ạḅenhi nyịnha mem dị nạ kaḅula.’ Mem mem mọ bịn a Josẹf r’eghun otu phọ ọdi onyeenhe Ijipt.

Ẹpe ọmhan, a Jehova mạḅenhi ni we phọ ọdaph bọ ẹenhaan phọ mọ kúḅula mụn ẹpe kạ Hẹrọd. Mem mọ ạ Hẹrọd ạmhiin bọ mọ awe phọ úḅula mụn k’ọdi, ịghagh ni olhoghi ọdi iboom. Loor ịduon ạ Hẹrọd kátue bọ ạmiin Jizọs, ọdi ạto mọ ọghi Bẹtẹlẹhẹm ọze oomo alhephiri ạnmuny dị oḍighi aani oki phọ a Jizọs. Kụolo úkiigh aani Jizọs loor esi dị odi ẹpe Ijipt.

Ịduon amem mọ rẹki bọ ạ Hẹrọd amhugh ni, kụ a Jehova ạḅenhi Josẹf mọ: ‘Nyịidipho mẹteeny dị nạ kaḅula.’ Kụ a Josẹf ra Meri ọpham Jizọs oḅulhanham ẹmha Izrẹl dị oghol mọ Nạzạrẹt.