Ạruukpaany Ugbeelhom Ẹmaria A Jizọs

Ọtooghia a Rom dị oghol mọ Siza Ọgọstọs, ạto ni mọ oomo awe a Ju oḅula rạmha ạbidi pịdi ọdi agbi we phọ. Esi ịduon phọ, a Josẹf ra Meri uḅula ni Bẹtẹlẹhẹm eḍighi bọ ẹmha a Josẹf. Mem mọ ạmuphe phọ rẹteeny dị a Meri kạmar.

Bịdi osi bọ Bẹtẹlẹhẹm, esi dị esugha ọrol pọ otu ịnham. Kụ ịpa phọ kụ ẹdi a Meri ạmhar bọ Jizọs. A Meri ạsighe ni rukpe aphurughiom ọony phọ ọdi kụ ạmunheen pạ roseere ghan bọ riiḍien ịnham mọ.

Ḍughul phọ ạḍiphe phọ abuniin abupoghom iyool ịga ụrol li elhegheḍum dị ị́kelhan Bẹtẹlẹhẹm ophogh ghan ịga ạbidi. Kụ ọokpaany Ẹnhaan amite risigh ạbidi, kụ ạḍiḅaal phọ a Jehova esoorom we phọ. Abupoghom iyool ịga phọ ughiilaan ni iboom, kụolo ọokpaany phọ Ẹnhaan ạḅenhi bịdi mọ: ‘Kékiilaan. Mị uru ọḅenhi anyinha rạraar dị kịngo inyinha ọḅaal olhoghi. Rodon phọ mọmar a Mesạyạ phọ ẹpe Bẹtẹlẹhẹm.’ Mem mem mọ bịn aḍita ạruukpaany omite kụ omhiigh oboom Ẹnhaan. Bịdi ụḅem ghan mọ: ‘Eghuan ẹrolhonhaan Ẹnhaan ẹpe k’ạke phọ, kụ ẹepho ẹrol sịen ade phọ.’ Bịdi roboom Ẹnhaan rọmhan, bịn ophe. Nạ ragbi mọ abupoghom iyool ịga phọ uḍighi eeghe?

Abupoghom iyool ịga phọ uupuruan mọ: ‘Oogborion ọghi Bẹtẹlẹhẹm ọmhiin aani.’ Bịdi osi bọ, ụmhiin Josẹf ra Meri r’ọbumoony phọ ọmhar bọ dị odi sịphe otu ịnham mọ.

Abupoghom iyool ịga phọ ụghaaph ni ịpe ạruukpaany phọ ọḅenhi bọ bịdi, kụ eḍigh ḍiigu esi awe phọ. Kụ a Meri ạsighe ịpe phọ ạlhogh olhoghi ọdi. Abupoghom iyool ịga phọ uḅula ni ophogh ịga phọ ạbidi, kụ ọseph ghan a Jehova loor esi ạraraar phọ bịdi ọnhaghan bọ ọḅilhe ọmhiin.