A Gebrịẹl Ạghi Olhoghi Otu A Meri

Elizạbẹt ạmhoogh ni ọnyo asiya dị oghol mọ Meri. A Meri ạrol ghan ẹmha dị edi Gạlili dị oghol mọ Nạzạrẹt. Oye dị oghol mọ a Josẹf dị aḍighi ọkaam ạmaka kụ aguan ophin a Meri. Mem dị eghun phọ Elizạbẹt mẹmhan odiiny ụnwanyu, a Gebrịẹl amitenhaan ni Meri kụ ạḅenhi mọ: ‘Ẹepho ẹrolhonhaan nyịnha Meri. A Jehova mạkar kụ ạseph nyịnha.’ A Meri ọ́nhaghanhan ịpe a Gebrịẹl ạghaaph bọ. Kụ a Gebrịẹl ạḅenhi nyọdi mọ: ‘Nạ kaamor ri kụ ạmar olhephiri ọony, kụ nạ kakol nyọdi mọ Jizọs. Ọdi kaḍighi Uwo ẹmha, kụ ạtooghi k’agee-pọ.’

A Meri apuru ni ọokpaany phọ mọ: ‘Mị kaamor bọ ika mem dị olhephiri ọony ịmhi kụ́rolhan ghan esi?’ A Gebrịẹl ạḅenhi nyọdi mọ: ‘Ịyaar dị ẹkparanhaan a Jehova oḍighi ílo. Uwaloor iigbia phọ kasoorom ni nyịnha, kụ nạ aamor ạmar olhephiri ọony.’ A Gebrịẹl ạḅilhe ni ạḅenhi Meri mọ: ‘Ọnyo asiya phọ ạna Elizạbẹt raamor.’ Kụ a Meri ạḅem mọ: ‘Mị ọnyanhi dị aḍighi ẹbenhe a Jehova. Ịpe nạ ạghaaph bọ kụ ẹtuugh imitenhaan ịmhi.’

A Meri ạghi ni ẹmha ạbuo Elizạbẹt ophogh ọdi. Mem mọ a Meri ạmhagh bọ Elizạbẹt, bịn ọbumoony phọ odi bọ ọkuruḅaka Elizạbẹt akuph. Uwaloor iigbia phọ amuza ni loor Elizạbẹt, kụ ọdi ạḅenhi Meri mọ: ‘A Jehova mạseph nyịnha. Eḍighi ni eboom eghuan dị onhiin Uwo ẹmhoogh phọ ạmhi aru olhoghi otu ạmhi.’ Kụ a Meri ạḅem mọ: ‘Mị ạkar kụ rạseph a Jehova r’oomo ekpom ạmhi.’ A Meri ạrol li ra Elizạbẹt esi ịraar ụnwanyu kụ agbi oḅula ạ Nạzạrẹt.

Mem mọ a Josẹf alhegheri bọ mọ a Meri raamor, ọdi ạwa ni ọwilhe a Meri. Kụolo ọokpaany Ẹnhaan amitenhaan ni nyọdi ụmalha kụ ạḅenhi mọ: ‘Kákiilaan ophin a Meri. Ọdi kóḍighi ịyaar dị eeph.’ Esi ịduon phọ, a Josẹf ạghi ni aphin Meri.