Elizạbẹt Ạmhar Mọony

Oniin ọpinyon rịkia dị oghol mọ Zẹkạrạyạ r’ạnhir ọdi Elizạbẹt ụrol li otuman Jeruselem. Mem mọ ạmuphe phọ, mepel li 400 ạsia egbi k’amem mọ ọḅilhe bọ ọlhogh iikpe phọ a Jeruselem. Apinien phọ ạbidi mabia ni, kụolo ọbumoony kọ̋mhoogh. Ḍiniin aḍio dị a Zẹkạrạyạ aḍigh ẹpe otu ịiḅereghi phọ ọsu insẹns, ọokpaany dị oghol mọ a Gebrịẹl amitenhaan ni ạ Zẹkạrạyạ kụ ọdi ạmhoogh oghiilaan. Kụolo a Gebrịẹl ạḅenhi nyọdi mọ: ‘Kạ́moogh oghiilaan. A Jehova urom ịmhi ọḅenhi ạna iiḅi ịinhaghan. Elizạbẹt ạnhir phọ ạna kạmar ri mọony, kụ kokol ḍien ọdi mọ ạ Jọn. A Jehova mạsaḅar Jọn oḍighinhaan ọdi oḍighi dị ạgbatanhaan.’ Ạ Zẹkạrạyạ apuru mọ: ‘Ika kụ ẹdi mị katue bọ ameeraam ịphen phọ? Ạnhir phọ ạmhi r’ạmhi moḍighi ikumor awe dị kótue mụn ọmar ọbumoony.’ Kụ a Gebrịẹl ạḅenhi nyọdi mọ: ‘Ẹnhaan r’aloor kụ urom ịmhi oru ọḅenhi ạna iiḅi ịinhaghan phọ ịphen phọ. Kụ loor ịduon nạ úmeeraam bọ, nạ kaḍighi ekpom ọka tụtu ọmhar ọbumoony phọ.’

Ịpe emite bọ iḍighi ni ịdi ạ Zẹkạrạyạ ạrol ẹpe olhoghi phọ abia. Kụ mem dị ọdi amite ạteeny we phọ ọrol bọ erugh okori ghan nyọdi, awe phọ ụwa ni olhegheri ịyaar phọ ẹkar bọ emite. Kụolo ạ Zẹkạrạyạ órue ọḅa, ạmaaghian ghan bịn. Kụ awe phọ olhegheri mọ Ẹnhaan marom nyọdi dom.

Ẹsighe rẹki bịn ạnhir phọ ọdi aamor kụ ạmhar olhephiri ọony ịdipho ọokpaany phọ ạḅem bọ. Asiya Elizạbẹt r’ạrighiri ọdi ụghi ni ọmhiin ọony phọ, kụ olhoghi ạbidi ạḅaal. Elizạbẹt ạḅenhi we phọ mọ: ‘Aḍien ọbumoony phọ ạmhi okol mọ Jọn.’ Kụolo awe phọ ụḅem mọ: ‘Oye ólho dị oghol mọ Jọn sịen eghun phọ anyinha. Kol nyọdi ḍien ọde phọ ọdi.’ Kụolo ạ Zẹkạrạyạ ạge esi mọ: ‘Aḍien ọdi ạ Jọn.’ Mem mem mọ bịn ạ Zẹkạrạyạ ạḅilhe amhiigh ọḅa. Awe ụghaaph ni olheenye oomo phọ a Judia ịphen emite bọ. Kụ awe phọ ọotughian ghan mọ: ‘Ọony phọ ọphon phọ kaḍighi eeghe ọdo oye mem lọ ạmhanham?’

Uwaloor iigbia phọ amuza ni loor ạ Zẹkạrạyạ kụ ọdi ạmhiin ịmiin kụ ạḅem mọ: ‘Ạḍiseph ẹrolhonhaan a Jehova. Ọdi aguanhaan Ebrạhạm mọ ọdi katom ni a Mesạyạ phọ oru ọphel ayira. Ạ Jọn kaḍighi oyil a Jehova, kụ ọdi kụ kạkaaph ịlo a Mesạyạ phọ ạḅenhi we phọ.’

Ịyaar dị kémite ghan imitenhaan ni siya Elizạbẹt dị oghol mọ a Meri. Yira kọmiin ni ịyaar phọ sịphe esi ịtuugha phọ etum bọ sịen.