A Jizọs Aḅeton Lạzạrọs Esi Aḍuugh

A Jizọs ạmhoogh ni ịraar ạrighiri dị ọrol ghan ẹmha dị oghol mọ Bẹtạni. Siḍien ạbidi ughol mọ Lạzạrọs, Meri rạ Mạtạ. Ḍiniin aḍio dị a Jizọs odi ẹpe Pẹria, a Meri rạ Mạtạ urom ni dom ọghiomaan nyọdi. Bịdi ụḅenhi mọ: ‘Aloor ạ Lạzạrọs ị́nighe. Seseeny nụun aru!’ A Jizọs ạnhaghan bọ dom mọ, ọ́ghi mem mem mọ. Ọdi ạḅilhe ni ạrol ẹpe phọ ịyal aḍughul otu kụ agbi ọḅenhi abutelhedom mọ ọdi mọ: ‘Ọghi Bẹtạni. Ạ Lạzạrọs rạnaanhi kụ mị rạwa ọghi ọsumeeny ọdi.’ Kụolo mem mọ ạmuphe phọ, ạ Lạzạrọs mamhugh. Abutelhedom mọ ọdi ụḅenhi ni nyọdi mọ: ‘Eḍighi mạar dị ạ Lạzạrọs rạnaanhi, pọ ẹnighe ni, loor esi dị ọdi kạmaar amoon loor.’ Ọpo kụ amem dị a Jizọs ạḅenhi bịdi onyen mọ: ‘Ạ Lạzạrọs mamhugh.’

A Jizọs asi bọ Bẹtạni, moḍi Lạzạrọs inya aḍughul otu eten. Kụ aḍita awe moru ọodereghi ạ Mạtạ ra Meri oḍighi bọ bumaranhi ạ Lạzạrọs. Mem dị ạ Mạtạ ạnhaghan bọ mọ a Jizọs ratu, ọdi ạghi ni ạteeny Jizọs kụ ạḅenhi mọ: ‘Uwo ẹmhoogh, mọ nạ ụrol li sịen ọbo umor phọ ạmhi múmugh.’ A Jizọs ạḅenhi nyọdi mọ: ‘Umor phọ ạna kaḅetenhu ni. Nạ ameeraam ni ịphen phọ Mạtạ?’ Ạ Mạtạ ạphagharanhaan mọ: ‘Mị ameeraam ni mọ ọdi kaḅetenhu ni mem mọ koḅerion bọ we esi aḍuugh phọ.’ Kụ a Jizọs ạḅenhi nyọdi mọ: ‘Mị kụ raḅerion ghan bọ we esi aḍuugh kạngo ghuḍum.’

Ọpo kụ amem dị ạ Mạtạ ạghi ạteeny Meri kụ ạḅenhi mọ: ‘A Jizọs maru.’ A Meri aghiil li ạghi ạteeny Jizọs kụ aḍita awe phọ ọdaph nyọdi. Ọdi akpuḍian ni sịphe aruwol phọ a Jizọs kụ amhiigh emoghi. Ọdi ạḅenhi Jizọs mọ: ‘Uwo ẹmhoogh, mọ nạ ụrol li sịen ọbo umor phọ ạmhi múmugh.’A Jizọs ạmhiin bọ emoghi phọ a Meri, ạmhoogh ni igbiririph ạghi esi ọdi, kụ amhiigh omhoghi aani. Mem dị aḍita awe phọ ọmhiin bọ dị a Jizọs ramoghi, bịdi ụḅem ni mọ: ‘P’eeghe ịdi ọdi ạphomhoghian Lạzạrọs.’ Kụolo buniin awe phọ ụḅem ghan mọ: ‘Eeghe kụ iḍighi kụ ọdi óokonhom bọ ọyaghiri phọ ọdi?’ Nyịidipho a Jizọs kaḍighi eeghe?

Mem mọ a Jizọs ạghi bọ asi sịphe oḍi bọ Lạzạrọs, ọdi ạḅenhi we phọ mọ: ‘Iikilhemhi ḍighiigh phọ ẹsighe.’ Kụ ạ Mạtạ ạḅenhi nyọdi mọ: ‘Mẹmhan sịen inya aḍughul otu! Kụ ọdi mamhiigh rapur.’ Ghạlhamo r’ịduon phọ, bịdi uukilhemhi ni ḍighiigh phọ ọsighe kụ a Jizọs ạaḅereghi ạḅem mọ: ‘Ọde, maḍighi ịduon nạ mụnhaghanhan bọ ịmhi. Mị alegheri ni mọ nạ rạnaghan ghan ni tọrobo ịlo mị ạghaaph. Kụolo mị ạkaaph ịphen phọ ramiteom pịdi awe phọ ạbuen phọ olegheri mọ nạ kụ urom ịmhi.’ Ọdi rọmhan kụ ạlo mọ: ‘Lạzạrọs, ḅetenhu!’ Kụ ẹekia ịyaar imite ni. Ạ Lạzạrọs amite ni sịphe oḍi phọ r’arukpe phọ ophurughiom bọ nyọdi. Kụ a Jizoṣ ạḅem mọ: ‘Ịkarion rukpe phọ, ọdi agheel.’

Ịbadi awe dị ọmhiin ịphen phọ ụmhoogh ni omheeraam esi a Jizọs. Kụolo abuniin ụghi ni ọḅenhi Fạrisi phọ ịpe emite bọ. Kụ emhiigh mem mọ ạmuphe phọ kụ rẹki, ạ Fạrisi phọ ụwa ni reten oghiigh ạ Lạzạrọs ra Jizọs. Oniin otelhedom a Jizọs dị oghol mọ, Judas Iskạrịọt, amhian ni ạghi ạteeny Fạrisi phọ kụ apuru mọ: ‘Nyinha kịkpe ịmhi ika ikpoki eḍighi mạar dị mị ịloghonhaan inyinha ḍịghaagh osiph a Jizọs?’ Kụ bịdi omheera ọkpe ọdi 30 ipoḍi asilva. Kụ a Judas amhiigh ọwa eepoogh ọsighe a Jizọs ọngo ạ Fạrisi phọ.