A Jizọs Aakonhom Oye Ḍio Ophooghian Phọ

Awe ạ Fạrisi phọ ụlhogh ni ḍien Jizọs kụ ọwa ghan reten osiph ọdi. Bịdi ụḅenhi nyọdi mọ kúukonhom ghan we Ḍio Ophooghian phọ. Ḍiniin a Ḍio Ophooghian a Jizọs ạmhiin ni oye ikpom ariḍien dị rạlomian ghan ẹpe eten phọ. Kụ ọdi ạḅenhi butelhedom mọ ọdi mọ: ‘Ịmiin ịdi ịikpo phọ Ẹnhaan kẹloghonhaan ḍịghaagh oye phọ ọphon phọ.’ A Jizọs ạsighe ịghor ọdi kụ ạtoghoḍiom ịisaar kụ agbul riḍien oye phọ, kụ ạḅenhi oye phọ mọ: ‘Kịa ẹpe ebaraph phọ ạ Siloạm aatolha.’ Oye phọ ạtuugh ni ịpe a Jizọs ạḅenhi bọ nyọdi aḍighi kụ amhiigh ọmhiin eten.

Ịphen emite bọ iḍigh ni iikia esi awe phọ kụ ọḅem mọ: ‘Ọphon kőye ikpom ariḍien phọ ạrol ghan bọ ẹpe eten phọ ạlhomian ghan? Ọbobo ọphon phọ oye dị ạghigh nyọdi ḍụghum?’ Oye phọ ạḅenhi we phọ mọ: ‘Mị phọ ni kụ oye phọ ọmharam bọ ikpom ariḍien phọ!’ Kụ awe phọ opuru mọ: ‘Ạnhian kụ aakonhom bọ nyịnha?’ Kụ oye phọ ạḅenhi bịdi ịpe emite bọ, kụ bịdi ọsighe oye phọ ọghi oḍeenhaan bụo ạ Fạrisi phọ.

Oye phọ ạḅenhi ni bụo ạ Fạrisi phọ ịpe emite bọ. Ọdi ạḅenhi mọ: ‘A Jizọs kụ ạtoghoḍi ịyaar agbul riḍien ạmhi kụ ụḅenhi ịmhi ọghi ootolha. Kụ mị rootolha, bịn mị amhiigh ọmhiin eten.’ Ịphen phọ iḍighi ịdi ạ Fạrisi phọ ọḅem mọ: ‘Eḍighi mạar dị a Jizọs aakonhom oye Ḍio Ophooghian phọ, pọ Ẹnhaan kụ ọ́ngo nyọdi ịikpo phọ.’ Kụ ạbueripho awe phọ ọḅem mọ: ‘Eḍighi mạar dị Ẹnhaan kụ ụ́ngo nyọdi ịikpo phọ, ọdi mútue uukonhom oye phọ.’

Ạbuo ạ Fạrisi phọ ụmhagh ni ọde r’onhiin ọony phọ kụ opuru mọ: ‘Ạnhian kụ aakonhom bọ ọony phọ anyinha?’ Ọde r’onhiin ọony phọ ughiilhaan ni ọghaaph ịyaar loor esi dị ạ Fạrisi phọ mọlhogh olhogh mọ kotoph ni ogbeph tọrobo oye dị ạmhoogh omheeraam esi a Jizọs. Loor ịduon phọ bịdi ụphagharanhaan mọ: ‘Yoor úlegheri. Ipuru nyọdi.’ Ạ Fạrisi phọ upuru ni oye phọ ịbadi asipuru tụtu oye phọ ạḅenhi bịdi mọ: ‘Mị mịḅenhi ni inyinha oomo ịpe mị alhegheri bọ. Uḍighi ika kụ nyinha ẹkiom bọ ghisigh riipuru ịmhi sipuru?’ Ạ Fạrisi phọ ụghagh ni olhoghi kụ oroph oye phọ omiteom.

A Jizọs ạwa ni oye phọ oroph bọ omiteom kụ apuru mọ: ‘Nạ ameeraam ni a Mesạyạ phọ?’ Kụ oye phọ ạphagharanhaan mọ: ‘Mị alhegheri nyọdi, mị kạmoogh ni omheeraam esi ọdi.’ A Jizọs ạḅenhi oye phọ mọ: ‘Mị kụ a Mesạyạ phọ.’ P’eeghe iiḅi dị a Jizọs aḍighi oye phọ! Ọdi óokonhom oye phọ bịn, ọdi ạlhoghonhaan ni oye phọ ḍịghaagh ọmhoogh omheeraam esi ọdi.