A Jizọs Arelhe Ạnyu Ạmuum

Epel ookonhom awe dị úmoon r’ọḅilhe oḅerion awe dị omhuughu, a Jizọs katue kẹn ni ạpamhaghan oghim r’ọlophia. A Jizọs ạrol bọ ẹpe ẹeḅaraph phọ ạaḅereghi ạmhan, ọdi ạmhiin ni mọ oboom oghim rakim ẹpe Ọphiiny phọ ạ Gạlili. Ọdi ạḅilhe kẹn ni ạmhiin dị ạbumatuan phọ ọdi rọkparagha ghan ọzoghi oghuugh phọ bịdi oḍigh bọ. Kụ a Jizọs asoor ẹeḅaraph phọ, kụ arelhe ạnyu ạmuum mọ anyeenhe ẹpe abutelhedom mọ ọdi odi bọ. Mem dị abutelhedom mọ ọmhiin mọ oye atelhe ạnyu ạmuum mọ ratu ọteeny ạbidi, aruugu amhiigh ni osiph ạbidi. Kụolo a Jizọs ạḅenhi bịdi mọ: ‘Kékiilhaan. Mị phọ ni.’

A Pita ạḅenhi Jizọs mọ: ‘Uwo ẹmhoogh, eḍighi mạar dị ẹkar ri eḍighi nyịnha, pọ ụḅenhi ịmhi mị utelhe utu ụteeny nyịnha.’ A Jizọs ạḅenhi Pita mọ: ‘Telhe aru.’ Kụ ịdipho oghim mọ rakim bọ ni, a Pita asoor ri sịphe oghuugh phọ, kụ arelhe ạnyu ạmuum mọ anyeenhe ẹpe a Jizọs odi bọ. Kụolo ịduon ọdi rạkpul bọ, ọdi aphogh ni oghim mọ kụ amhiigh oghiilhaan. A Pita ạmhiin ni mọ ọdi raḅi kụ ạlo mọ: ‘Uwo ẹmhoogh, ụphel ịmhi!’ A Jizọs ạpham ni ḍịghaagh a Pita kụ apuru mọ: ‘Uḍighi ika kụ nạ amhiigh bọ ọmhoogh iikia? Omheeraam mọ ạna odi ẹghen?’

A Jizọs ra Pita urelhe ni ọghi oḍigh sịphe oghuugh phọ, kụ mem mem mọ bịn oghim mọ ạpho. Nạ ragbi mọ ịrol ika esi ạbumatuan phọ mem mọ ọmhiin bọ ịphen phọ? Bịdi ụḅenhi Jizọs mọ: ‘Nạ ọkaraghi Ọony Ẹnhaan phọ ni.’

Ọphon kụ kóginha amem dị a Jizọs ạphoomhi oghim. Ẹnhon amem dị a Jizọs r’ạbumatuan phọ ọdi oḍigh oghuugh rọḅeeny ḍịeripho ạḍighaagh ọphiiny phọ, a Jizọs amhiigh ni ọnaanhi. Mem mọ a Jizọs rạnaanhi bọ, ọgbagara oghim aghim ni kụ oolhogh phọ aḍighi ịdi ạmuum amuza oghuugh phọ. Abutelhedom mọ ụghi ni ọsumeeny Jizọs kụ ọḅenhi mọ: ‘Ọtughemhia, yoor rope! Ụlhoghonhaan iyoor ḍịghaagh!’ A Jizọs aḅetenhu ni kụ ạḅenhi ọphiiny phọ mọ: “Pọ!” Kụ mem mem mọ, ọphiiny phọ r’oghim mọ ạpho. A Jizọs apuru ni butelhedom mọ ọdi mọ: ‘Omheeraam mọ anyinha odi ẹghen?’ Kụ oniin ạḅenhi ghan nyoniin mọ: ‘Ghạlhamo oghim mọ r’ọphiiny phọ bịn rẹnaghanhan ni nyọdi.’ Ịphen phọ ịtughemhi bụmatuan phọ mọ eḍighi mạar dị bịdi ọmhoogh omheeraam ọghi esi a Jizọs, pọ ị́wa mọ bịdi oghiilhaan ịyaar.