ESI ỊTUUGHA PHỌ 83
A Jizọs Ạngo Eḍien Sịmuunir Awe
Kụ egbi bọ ọteeny amem mọ olhe bọ Ẹyaal Ọphel Otenhe phọ ọpham bọ lhạ phọ 32 C.E., abutelhedom mọ ụḅua ni ẹpe bịdi ọghi bọ ọghaaph iiḅi ịinhaghan phọ oḅula r’aloor dị medugh. Esi ịduon phọ, a Jizọs ạpham ni bịdi aḍighom oghuugh, kụ ọghi ekpisi dị oghol mọ Bẹtseidạ pịdi bịdi opooghian. Kụolo tụtu bịdi kosul bọ oghuugh phọ, a Jizọs ạmhiin ni sịmuunir awe dị mosi ẹpe phọ rokori ghan bịdi. Ghạlhamo r’ịduon a Jizọs ạwa bọ mọ abutelhedom mọ ọdi r’ọdi bịn kụ ọrol, ọdi amhiigha ni loor ạḅaanhaan we phọ. Kụ aakonhom we dị úmoonhogh, kụ ạḅilhe amhiigh ọtughemhi ạbidi. Oomo ẹmhu aḍio phọ, a Jizọs ạtughemhi ghan we phọ ịlo ọmhar phọ Ẹnhaan. Kụ mem dị aḍughul rekul, abutelhedom mọ ụghi ni ọteeny nyọdi kụ ọḅenhi mọ: ‘Ọkoony rasiph we phọ. Ḅẹnhi bịdi ọghi ọwa ịyaar olhe.’
A Jizọs ạḅenhi butelhedom mọ ọdi mọ: ‘Bịdi kụ́ḍua. Ịngo bịdi ịyaar olhe.’ Abutelhedom mọ upuru Jizọs mọ: ‘Nạ rạwa mọ yoor ụki ẹpe ạramha phọ uko ịyaar dị bịdi kole?’ Kụ oniin otelhedom dị oghol mọ Filip ạḅem mọ: ‘Ghạlhamo yira ụmhoogh ni iboom ikpoki, bịn yira kótue ọmiin eḍien dị kẹper we phọ ạbuen phọ oko.’
A Jizọs apuru bịdi mọ: ‘Yira ọmoogh ni eḍien sịen phọ ḍụghum?’ Ạndrụ ạphagharanhaan mọ: ‘Yira ọmoogh oogh iiḅoghoḍi ạ brẹd r’ịyal ịbam ina. Kụ ịphen phọ kẹ́kasian.’ Kụolo a Jizọs ạḅenhi mọ: ‘Ịsighe ạ brẹd phọ r’ina phọ iruom ịmhi.’ Kụ ạḅilhe ạḅenhi we phọ mọ ọrolhoghu ude sịphe ạroogho phọ. Kụ awe phọ ookpomhoghan kịrokiro ariisi, iniin ariisi 50 awe kụ uukpomhoghan, kụ ịnhon ariisi 100 awe kụ uukpomhoghan. Kụ ọdi ạsighe iiḅoghoḍi ạ brẹd phọ r’ina phọ kụ aphogh ẹpe k’ạke phọ ạaḅereghi. Kụ ạngo butelhedom mọ kụ abutelhedom mọ odiighi we phọ. Kụ 5,000 awe phọ r’ạnmariir phọ r’ịbam ạnmuny phọ olhe ẹpherogh. Bịdi rolhe rọmhan kụ abutelhedom mọ ookpomhoghi ịpe esugha bọ pịdi ịyaar képe. Ịpe bịdi ookpomhoghi bọ ịmhan 12 arugunhum. P’eeghe ịikia ịiḍaany dị a Jizọs aḍighi!
Ịiḍaany phọ a Jizọs aḍighi bọ ịḅaal li olhoghi awe phọ kụ ọwa oḍighi a Jizọs uwo ẹmha. Kụolo a Jizọs alhegheri ni mọ kẹ́teeny mem mọ a Jehova kaḍighi bọ nyọdi uwo ẹmha. Esi ịduon phọ, ọdi ạḅenhi ḍita awe phọ mọ ogheel kụ ạḅenhi butelhedom mọ ọdi mọghi ḍịeripho ạga Ọphiiny phọ ạ Gạlili. Ạbumatuan phọ uḍigh ni oghuugh phọ onyeenhe kụ ọdi ạghi ẹpe ẹeḅaraph phọ. Eeghe kụ iḍighi kụ a Jizọs ạghi bọ ẹpe phọ? Ọdi ạghi ẹpe phọ pịdi ọdi ạmoogh mem ọoḅereghi Ọde phọ ọdi. Ghạlhamo r’amem dị a Jizọs ạmhoogh ni ịbadi ạraraar oḍighi, ọdi amiteom ghan ni mem ạaḅereghi.
‘Kẹ́tuan ghan mụn eḍien phọ ẹpe kẹḅor bọ kụ ekumuan, ịtuan ghan eḍien phọ ẹpe kẹtol bọ ẹteeny ghuḍum k’agee-pọ phọ kụ ekumuan ghan. Eḍien phọ ẹphen Ọony phọ Oye kụ kịngo inyinha.’—Jọn 6:27