ESI ỊTUUGHA PHỌ 82
A Jizọs Ạtughemhi Bụmatuan Phọ Ọdi Ịlo Ọoḅereghi
Tọrobo ịyaar dị ạ Fạrisi phọ oḍighi, uḍighi ghan pịdi awe ọsereghian bịdi. Bịdi oḍighi iiḅi, uḍighi ghan pịdi awe ọmiin. Bịdi ụuḅereghi ghan esi ogbo pịdi awe ọmiin. Ạbuo ạ Fạrisi phọ ụge ghan ịidoony ịiḅereghi kụ ooḅula ghan mem dị bịdi ọghi sịphe otu ịiḅereghi phọ r’ikol areten phọ pịdi ạbunhon awe ọnaghan ịpe bịdi rọoḅereghi bọ. Esi ịduon phọ, iḍighi ni iikia esi awe phọ mem mọ a Jizọs ạḅenhi bọ bịdi mọ: ‘Kẹ́kigh aani bụo ạ Fạrisi phọ. Bịdi rogbi ghan mọ ịidoony ịiḅereghi kụ rẹḅeraan ghan Ẹnhaan, kụolo kị́dipho. Ịiḅereghi edi igbo oye phọ ra Jehova. Mem lọ nyinha rẹeḅereghi, kéeḅula ghan eniin phọ ịyaar phọ. A Jehova rạwa mọ ḅẹnhi nyọdi ịpe nạ alhoghoma bọ.
‘Ịiḅereghi ghan ịduon: “Ọde phọ ayoor odi bọ ẹpe k’ạke, ọpham ni ḍien phọ ạna ọḅaalhamhi. Ọmhar phọ ạna aru ni. Oḍighi aani ogbi phọ ạna sịen ade phọ ịdipho roḍighi bọ ẹpe k’ạke phọ.”’ A Jizọs ạḅilhe kẹn ni ạḅenhi bịdi mọ bịdi ọoḅereghi ghan kẹn ni ọlhom eḍien dị bịdi kole ḍio phọ, ọlhom ọsar ọwilhenhaan, r’ịnhon ạraraar dị rẹeḅaghamhi bịdi.
A Jizọs ạḅilhe ni ạḅenhi bịdi mọ: ‘Inyinha kị́pher ọoḅereghi ghan. Ịkiom ghisigh ẹlhom Ọde phọ anyinha Jehova ọngo anyinha igey ạraraar. Tọrobo ọde rạwa ghan ni ọngo ọbumoony ọdi igey ạraraar. Eḍighi mạar dị ọony ạna ạlhom nyịnha eḍien, nạ kạ̋ngo ḍụghum? Eḍighi mạar dị ọony ạna ạlhom nyịnha ena, nạ kạngo ni ẹkaraph ịyaar?’
A Jizọs ạma ni amiteom ịyaar ịtuugha phọ esi opuru mọ: ‘Eḍighi mạar dị nạ alhegheri ni ịlo ọngo igey ạraraar nmụny phọ ạna, nạ ragbi mọ a Jehova ọde phọ ạna kạ̋ngo aani nyịnha uwaloor iigbia phọ ọdi? Ịyaar dị ẹwa pọ, lọm ghan.’ Nạ rạdaph ghan ni oromha phọ a Jizọs? Ịghen ạraraar kụ ẹdi nạ rạtuan ghan kạaḅereghi?
“Ịlom ghan, bịn kịngo ni inyinha; ịwa ghan, bịn nyinha kẹmiin ni; ikar ghan, bịn kighughuronhaan ni inyinha.”—Mạtiu 7:7