Ạraraar Dị A Jizọs Ạtughemhi Sịphe Ẹeḅaraph Phọ

A Jizọs rọsaḅar bọ 12 abutelhedom mọ ọdi, kụ ạḍua ẹpe ạnyu ẹeḅaraph phọ ạghi ạteeny ḍita awe dị ookpomhoghan. Awe phọ ạbuen phọ ụḍua Gạlili, Judia, Tạyạ, Sạịdọn, Siria, r’ạḍieripho ạga ạ Jọdạn phọ kụ oru. Awe phọ ụpham ni we dị ạreezegh r’ịkaraph aruwaloor rẹeḅaghamhi orumhom kụ ọdi aakonhom. Kụ ạrol sịphe ẹeḅaraph phọ amhiigh ọtughemhi ạbidi ịbadi ạraraar. Ọdi ạtughemhi ni we phọ mọ orue oḍighi ạrighiri Ẹnhaan, pọ ẹwa ọlhogh elhegh mọ yira omoghi ịiḅakiom a Jehova r’ọḅilhe ọphomhoghian a Jehova. Kụolo yira kótue ọpomhoghian Ẹnhaan eḍighi mạar dị yira ụ́pomhoghian bụnhon awe. Esi ịduon phọ ẹwa ni mọ ọzoom ghan tọrobo oye eten dị ẹnighe, ghạlhamo r’awe dị iyira rụ́zoom ghan egey eten.

A Jizọs ạḅilhe ni ạḅem mọ: ‘Ẹwa ni dị yira kọpomhoghian rịghiri ayira r’awe dị iyira rụ́zoom ghan egey eten, kụ ọḅilhe ọsar ghan ọbilhenhaan we r’oomo olhoghi ayira. Ḅịlhe mọ eḍighi ịyaar dị oye ạghagh olhoghi loor esi ịyaar dị nạ aḍighi, pọ kịa ạteeny oye phọ ạaḅereghian, kụ ẹphomhoghian. Ḅịlhe kẹn mọ ọzoom ghan we eten dị ụzoom iyira kẹnighe.’

A Jizọs ạḅilhe kẹn ni ạngo we phọ oromha dị agbolhomaam ruphua. Ọdi ạḅem mọ: ‘Oḍighi ọyaghiri a Jehova kụ ịnhighe epu ọmhoogh iboom ikpoki. Ọḅa katue ni ami ikpoki phọ ạna, kụolo oye kátue ami ḍịseph phọ nạ kạmoogh bọ mem dị nạ aḍighi ọyaghiri a Jehova.’ Ọdi ạḅenhi kẹn bịdi mọ: ‘Kẹ́eḅaghamhian loor ịlo ịyaar olhe, ọphughol ḅịlhe r’ịlo ọkpolhoghian. Ipogh ịnhun phọ. Ẹnhaan rạngo ghan ni bịdi rạraar olhe tọrobo amem. Ọoḅaghamhian aloor kạ́ḅaram ḍiniin aḍughul otu sịphe aghuḍum mọ anyinha. Ilegheri mọ a Jehova alegheri ni tọrobo ịyaar dị nyinha rẹwa.’

Aḍita awe phọ kọ̋nhaghan ghan dị oye ạtughemhi eten phọ ẹpe a Jizọs ạtughemhi ghan bọ. Abuḍiemhiom ạruuku ịiḅereghi phọ kọ̋tughemhi ghan bịdi rạraar phọ ịphen phọ. Eeghe kụ iḍighi kụ a Jizọs aḍighi bọ ogbogh ọtughemhia dị alheeny ịduon? Ọdi ạtughemhi ghan oginha ịpe a Jehova ạḅenhi bọ nyọdi.