A Jizọs Ạsaḅar Ḍioph R’ịyal Abutelhedom

Mem dị a Jizọs mạghaaph ọghaaph iiḅi ịinhaghan phọ esi ạlha r’ạpakiri, ịwa ni dị ọdi kaḍighi eniin ịyaar dị ẹmhan mạar. Eeghe kụ ịyaar phọ? Ọsaḅar awe dị koḍighi butelhedom ọdi. Ọdi kạtughemhi we phọ ạbuen phọ ịlo ọghaaph iiḅi ịinhaghan phọ. Orue oḍighi ịduon phọ, a Jizọs ạwa ni ịiḅakiom a Jehova. Oginha ọdi ạghi ni esi ẹeḅaraph kụ ạaḅereghi oomo aḍughul phọ. Ạḍiroor rẹḅaal kụ ọdi ạmhagh buniin ạbumatuan ọdi kụ ạsaḅar 12 abutelhedom. Nạ ạatughian ni siḍien ạbidi? Siḍien ạbidi ughol mọ Pita, Ạndrụ, Jems, Jọn, Filip, Bạtọlọmiu, Tọmọs, Mạtiu, Jems ọony phọ Alfiọs, Tạdiọs, Sạịmọn, ra Judas Iskạrịọt.

Aḍioph r’ịyal phọ ạbidi kụ kọdaph ghan nyọdi tọrobo ekpisi dị ọdi rạki. Ọdi rọtughemhi bịdi kụ arom bịdi ọghi ogbeelhom iiḅi ịinhaghan phọ. A Jehova ạngo ni bịdi ịikpo ophorogh ịkaraph aruwaloor r’ookonhom awe dị úmoon.

A Jizọs ạmhagh ḍioph r’ịyal phọ ạbidi mọ ạrighiri ọdi, kụ ạkar aḍuom bịdi olhoghi. Awe ạ Fạrisi phọ ụsighe mọ abutelhedom mọ a Jizọs askul ụ́ki, ḅịlhe mọ ịyaar úlegheri. Kụolo a Jizọs ạtughemhi ni bịdi ịlo oḍighi oḍighi phọ. Bịdi kọtol li ra Jizọs mem dị ạraraar dị ẹmhan mạar remitenhaan nyọdi. Esi ọmaam bịdi kọtol li ra Jizọs kụ egbi ọteeny amem mọ ọdi kamugh bọ r’amem mọ koḅeton bọ nyọdi. Kụ ịdipho a Jizọs, ịbadi ạbidi uḍighi bụo ạ Gạlili. Kụ abuniin ạbidi uphinhogh ni nmạriir.

Abutelhedom mọ uḍighi we dị úmunhughan, esi ịduon phọ bịdi ụpioman ghan ni. Eeni amem bịdi ụghaaph ghan ni rạraar dị ụ́pur ụutughian ọḅilhe osopha ghan osopha dị ụ́nighe. Eeni amem kẹn bịdi uḍighi ghan ni rạraar dị eḍeenhaan mọ bịdi ụ́moogh ọkparam kụ ọḅilhe ọokonhoghian ghan oye dị ạmhan mạar apu sịphe igbo phọ ạbidi. Ghạlhamo r’ịduon phọ bịdi ụphomhoghian ni a Jehova. Kụ bịdi kụ koḍiemhiom oḍighi ọghaaph iiḅi ịinhaghan phọ mem dị a Jizọs agheel ẹpe k’ạke, kụ omiteom ookpomhoghan ạKristen phọ.