A Jizọs Aḍighi Ịbadi Ịiḍaany

A Jizọs aru sịen ade phọ ogbeelhom iiḅi ịinhaghan ịlo Ọmhar phọ Ẹnhaan. A Jehova ạngo ni Jizọs uwaloor iigbia phọ oḍighinhom ghan ịiḍaany, pịdi aḍighi aḍeenhaan rạraar dị ọdi kaḍighi mem dị ọdi aḍighi Uwo ẹmha. Ẹzegh ị́tol dị ọdi útue uukonhom. Kụ tọrobo ekpisi dị ọdi ạghi, awe lọ úmoonhogh ụghi ghan ni ọteeny nyọdi mọ ọdi ạlhoghonhaan bịdi ḍịghaagh. Kụ ọdi aakonhom ni oomo phọ ạbidi. Ọdi aakonhom we dị eten rọ́miin ghan, we dị ọḅaaghaph yogh, r’awe dị útue utelhe. Kụ we dị ịkaraph aruwaloor rẹeḅaghamhi, ọdi aphorogh ni ịkaraph aruwaloor phọ bịn omoonhogh. Kụ ọlo ạḅogh ạsuoma ọdi bịn amoon ghan ni. Awe ụdaph ghan ni nyọdi tọrobo ekpisi dị ọdi ạghi, kụ ghạlhamo r’amem dị ọdi ạwa ni ophooghian, ọdi óphorogh ghan we dị oru ọteeny nyọdi.

Ḍiniin aḍio awe ụpham ni oye dị rátue ghan karelhe ọghimom esi dị a Jizọs odi pịdi aakonhom. Kụolo ịkparanhaan ni we phọ ọteeny a Jizọs loor esi aḍita awe phọ. Esi ịduon phọ, bịdi ugbonyon ạnyu otu phọ kụ ọkpaaghi ẹmhinha phọ oye phọ ạmhinha bọ oseere risigh a Jizọs. Kụ a Jizọs ạḅenhi oye phọ mọ: ‘Ḅetenhu arelhe.’ Iḍighi ni iikia esi oomo awe phọ mem mọ oye phọ aḅetenhu bọ ratelhe.

Ẹnhon aḍio a Jizọs aḍigh ni eniin ẹmha, kụ ḍioph awe dị ọmhoogh ẹzegh ọku ufe ọmheera ekpisi dị ẹkel kụ ọlooghi ghan mọ: ‘Jizọs, ụlhoghonhaan iyoor ḍịghaagh!’ Mem mọ ạmuphe phọ, awe dị ọmhoogh ẹzegh ọku ufe útuman ghan bụnhon awe. A Jizọs ạḅenhi bịdi mọ ọghi ẹpe otu ịiḅereghi phọ oḍighi ịpe olhogh phọ a Jehova ạghaaph bọ mọ oye dị ookonhom ẹzegh ọku ufe ọdi aḍighi ghan. Ịduon bịdi rọki bọ bịn ẹzegh ọku ufe phọ ẹḍua. Oniin ọnyo ạbuen phọ aḅula ni ạseph Jizọs ạḅilhe aboom Ẹnhaan. Sịphe aḍioph awe phọ a Jizọs aakonhom bọ, oniin bịn kụ aḅula ạseph nyọdi.

Oniin ạnhir dị ạrol émoon esi 12 ạsia ạkar kụ ạwa ghan oye dị kaakonhom nyọdi. Mem dị a Jizọs r’aḍita awe orelhe rọki esi, ạnhir phọ amhiigha ni loor ạghi ạḅogh eekunha ạsuoma phọ a Jizọs, kụ eginha amem bịn amoon. Ịphen phọ iḍighi ni ịdi a Jizọs apuru mọ: ‘Ạnhian kụ ụḅogh bọ ịmhi?’ Ạnhir phọ amhiigh ni oghiilaan kụolo ạghi ni ghisigh a Jizọs ạghaaph ịpe emite bọ. A Jizọs ạadereghi ni nyọdi kụ ạḅenhi mọ: ‘Nhịr phọ, keel r’ẹepho.’

Oniin oye dị oghol mọ a Jeirọs dị aḍighi uwo ẹmhu oniin obughotu ạghi ni ạteeny Jizọs kụ ạḅenhi mọ: ‘Seseeny, tue k’ạmhi! Aloor ọbam ọnyanhi ạmhi ị́nighe.’ Kụolo ọnyanhi phọ amhugh ni mem dị a Jizọs odi eten rạki. A Jizọs asi bọ ka Jeirọs, ạmhiin ịbadi awe dị romoghi kụ ạḅenhi we phọ mọ: ‘Kémoghi, ọnyanhi phọ rạnaanhi ni.’ Kụ ọdi ạpham ḍịghaagh ọnyanhi phọ kụ ạḅenhi mọ: ‘Nyạnhi phọ, ḅetenhu!’ Eginha amem bịn ọnyanhi phọ aḅetenhu, kụ a Jizọs ạḅenhi ọde r’onhiin ọnyanhi phọ mọ ọngo ọnyanhi phọ ịyaar olhe. Nạ ragbi mọ ịrol ika esi ọde r’onhiin ọnyanhi phọ mem mọ oḅeton bọ ọnyanhi phọ ạbidi?