A Jizọs Agbeelhom Ịlo Ọmhar Phọ Ẹnhaan

A Jizọs aḍiiny bọ mụum mọ, íbia bịn amhiigh ogbeelhom mọ: ‘Ọmhar phọ Ẹnhaan matuman sịen.’ Ọdi ạmhoogh ni bụmatuan dị ọdaph ghan nyọdi ịduon ọdi ragbeelhom bọ iiḅi ịinhaghan phọ ẹpe Gạlili ra Judia. Mem dị ọdi aḅula Nạzạrẹt eḍighi bọ ẹmha ọdi, ọdi aḍigh ni obughotu phọ kụ akpegheron ḍikpooghineen ạḍinya phọ Ạịzạyạ kụ ạal amiteom ịpe ọge bọ mọ: ‘A Jehova mụngo ịmhi uwaloor iigbia phọ ọdi pịdi mị atue ạkaaph iiḅi ịinhaghan phọ.’ Ịduon phọ ọdi rạḅem ghan mọ eeghe? Ọdi rạḅem ghan mọ ghạlhamo r’ịduon awe rọwa bọ mọ ọdi aḍighi ịiḍaany, ẹkpanha ịyaar phọ ọtuan bọ ọngo nyọdi uwaloor iigbia phọ pọ ọghaaph iiḅi ịinhaghan phọ. Kụ ọdi ạḅilhe ạḅenhi we phọ mọ: ‘Ịmiin phọ ịphen phọ memhunhughan rodon.’

Ịpe reten kụ a Jizọs ạghi Ọphiiny ạ Gạlili. Ẹpe phọ ọdi ạmhiin ni inya awe dị rọkoni ghan ạkoni. Siḍien ạbidi ughol mọ Pita, Ạndrụ, Jems, rạ Jọn. A Jizọs ạḅenhi inya phọ ạbidi mọ: ‘Itu ịdaph ịmhi, mị kiḍighi inyinha bụkoniom awe.’ Kụ bịdi ọwilhe oḍighi ạkoni phọ ạbidi omhiigh ọdaph a Jizọs. Ẹpe Gạlili bịdi ugbeelhom ni ịlo Ọmhar phọ Ẹnhaan ẹpe arubughotu phọ, siḍighi, r’areten phọ ạbidi. Aḍita awe ụdaph ghan ni bịdi ọghi tọrobo ekpisi dị bịdi rọki. Kụ ịinhaghan ịlo a Jizọs elheeny oomo arikpisi ghạlhamo r’ẹpe Siria.

Ẹsighe rẹki bịn a Jizọs ạngo buniin abutelhedom mọ ọdi ịikpo ookonhom awe r’ophorogh ịkaraph aruwaloor. Kụ ạbunhon awe ụdaph aani ghan ni nyọdi ọghi tọrobo egbogh r’ẹbam ẹmha dị ọdi rạki. Ạnmariir dị ọmhoogh omheeraam esi ọdi ụdaph aani ghan ni kẹn nyọdi. Abuniin ạbidi pọ a Meri Mạgdạlin, Joạnạ, ra Suzạnạ. Ạnmariir phọ ạbuen phọ ụngo ghan ni Jizọs r’abutelhedom mọ ọdi tọrobo ịyaar lọ ọwa.

Ọdi rọtughemhi bụmatuan phọ ọdi ịlo ọghaaph iiḅi ịinhaghan phọ, kụ arom bịdi mọ ọghi ọghaaph iiḅi ịinhaghan phọ. Bịdi ụghaaph ni iiḅi ịinhaghan phọ ẹpe Gạlili, kụ ịbadi oḍighi aani bụmatuan a Jizọs kụ oḍiiny mụum. Ịbadi umite ni oḍighi ạbumatuan a Jizọs dị tụtu a Jizọs ạtomaam bịdi ịizupha dị mẹnhighe obugha. Ọdi ạḅenhi bụmatuan phọ ọdi mọ: ‘Ịiḅereghi ẹlhom mọ a Jehova amiteom bụnhon awe dị kọki aani ibugha phọ.’ Ẹsighe rẹki kụ ọdi ạsaḅar 70 ạbumatuan ọdi, kụ arom ghan ịyal yạl ạbidi ọghi ẹpe Judia ogbeelhom iiḅi ịinhaghan phọ. Bịdi ụtughemhi ni we kịrokiro ịlo Ọmhar phọ Ẹnhaan. Olhoghi ạbumatuan phọ ạḅaal li mem mọ oḅula bọ, kụ ọḅenhi Jizọs oomo ịpe emite bọ. Ịphen phọ eḍeenhaan mọ Eru phọ kátue ni bịn asophoghom ọghaaph iiḅi ịinhaghan phọ.

A Jizọs aḍighi ni ịdi ạbumatuan phọ ọdi kọkiom ghisigh ọkaaph ghan iiḅi ịinhaghan phọ ghạlhamo ọdi aḅula ni ẹpe k’ạke. Ọdi ạḅenhi bịdi mọ: ‘Ịkaaph iiḅi ịinhaghan phọ elheenye oomo ade phọ. Ẹtughemhi we Ekpo Ọnhu phọ Ẹnhaan, kụ eḍiinye bịdi mụum.’