Ạnhir Phọ Ạghi Bọ Ọkpa Ạmuum Mọ

Mem dị Ẹyaal Ọphel Otenhe phọ eten, a Jizọs r’ạbumatuan phọ ọdi uugo ni eten ạ Sạmeria roḅula Gạlili. Kụ mem dị otuman ẹmha dị oghol mọ Sạịkạ, a Jizọs ạmheera ni esi dị oghol mọ aghuḍia a Jekọb ophooghian. Sịphe phọ abutelhedom mọ ọdi ụwilhe ni nyọdi ọghi ogho eḍien.

Oniin ạnhir ạghi ni sịphe aghuḍia phọ ọkpa ạmuum. Kụ a Jizọs ạḅenhi ạnhir phọ mọ: ‘Ụngaanhi mụum mị ụpughol.’ Ạnhir phọ ạḅenhi nyọdi mọ: ‘Uḍighi ika kụ nạ rụḅaanhaan bọ ịmhi? Mị ọlo ạ Sạmeria. Kụ awe a Ju r’awe ạ Sạmeria rọ́kaaph ghan.’ A Jizọs ạḅenhi ạnhir phọ mọ: ‘Mọ nạ ulhegheri ni ọdo oye phọ mị aru bọ, nạ mụlhom ni ịmhi mụum ọphughol, kụ mị mụngo nyịnha mụum aghuḍum.’ Ạnhir phọ ạḅenhi Jizọs mọ: ‘Nạ rụḅenhi ghan ịmhi eeghe? Nạ phọ ụ́moogh bọ ịyaar ọkpaam ạmuum mọ.’ Kụ a Jizọs ạḅenhi nyọdi mọ: ‘Oye lọ ạphughol mụum mọ mị kạngo bọ nyọdi, ạmuum kạ́pu mụn ni bịn k’agee-pọ.’ Kụ ạnhir phọ ạḅem mọ: ‘Oye phọ, ụngaanhi ịmhi mụum mọ ạmuen phọ.’

A Jizọs ạḅenhi ạnhir phọ mọ: ‘Kịa ạmhagh olom ạna.’ Kụ ạnhir phọ ạḅenhi nyọdi mọ: ‘Mị ụ́moogh olom.’ Kụ ọdi ạḅenhi ạnhir phọ mọ: ‘Ịphen nạ ạghaaph bọ igey ni. Nạ m’ạal ghan bọ oogh ilhom, kụ ọpo r’ạna edianhaan bọ nyịidipho kólom ạna.’ Kụ ạnhir phọ ạḅenhi nyọdi mọ: ‘Ẹkigh mụdi nạ oyil Ẹnhaan. Yoor awe ạ Sạmeria omeeraam mọ kotu ghan sịen ẹeḅaraph phọ ẹphen phọ kụ ọoḅereghi Ẹnhaan. Kụolo awe a Ju phọ rọḅem ghan mọ kọki ẹpe Jeruselem kụ ogbi ọoḅereghi Ẹnhaan. Mị ameeraam mọ a Mesạyạ phọ katu ni, kụ mem dị ọdi aru, ọdi kụtughemhi ni iyira ịlo ọoḅereghi Ẹnhaan.’ Ọpo kụ amem dị a Jizọs ạḅenhi ạnhir phọ ịyaar dị ọdi kọ́ḅenhi ghan ọnhon oye. Ọdi ạḅem mọ: ‘Mị kụ a Mesạyạ phọ.’

Ạnhir phọ aghiil li aḍigh olhoghi ạ Sạmeria, kụ ạḅenhi we phọ mọ: ‘Ẹkigh mụdi mị mạmhiin a Mesạyạ phọ. Ọdi alegheri tọrobo ịyaar ịlo ạmhi. Itu ẹmhiin!’ Awe ạ Sạmeria phọ ụdaph ni ạnhir phọ ọghi ẹpe aghuḍia phọ a Jizọs odi bọ, kụ a Jizọs ạtughemhi bịdi.

Awe ạ Sạmeria phọ ụḅenhi ni Jizọs mọ aḍigh ẹpe olhoghi ẹmha phọ ạbidi ạtughemhi bịdi. Kụ esi ịyal aḍughul otu, a Jizọs ạrol ẹpe phọ ạtughemhi ghan we phọ kụ ịbadi ọmhoogh omheeraam esi ọdi. Bịdi ụḅenhi ạnhir phọ mọ: ‘Ạraraar phọ yoor mọnhaghan bọ meḍighi ịdi yoor mọkar olhegheri mọ ọdi kụ ọpelia aḅirinhi phọ.’