A Jizọs Ạḅaalhamhi Otu Ịiḅereghi Phọ

Rẹteeny bọ ụnwanyu April, lhạ phọ 30 C.E., ịduon phọ pọ sịen oghiil ạKristen phọ, a Jizọs ạghi ni Jeruselem. Mem mọ ạmuphe phọ, ịbadi awe mọghi Jeruselem olhe Ẹyaal Ọphel Otenhe phọ. Kụ ịdipho roḍighi ghan bọ mem Ẹyaal Ọphel Otenhe phọ, bịdi ụsighe ni ịnham ọphinyonhom rịkia sịphe otu ịiḅereghi phọ. Abuniin awe ugho ịnham mọ sịphe Jeruselem, kụolo ạbunhon ụpham ịnham mọ kụ ọghimom.

Mem dị a Jizọs aḍigh sịphe otu ịiḅereghi phọ a Jehova, ọdi ạmhiin dị awe odi sịphe phọ robolhoghi ghan ịnham kọmhoogh ikpoki. Ịphen phọ iphin ni olhoghi a Jizọs, kụ ọdi ạphur oḍigh aḍighi ịkpara kụ aphoroghom oomo iyool ịga phọ r’ạsinam mọ. Kụ ạḅilhe anyuughi alhereghi ịdaabilhi ạbuphe ronmeeghi ghan bọ ikpoki phọ kụ azuughi ikpoki phọ ạbidi. A Jizọs ạḅenhi we phọ robolhoghi bọ rukuru ghọzo phọ mọ: ‘Ịsighe rạraar anyinha ẹḍuanham sịen! Kẹ́sighe otu Ọde phọ ạmhi eḍighi esi aḍighi!’

Iḍigh ni ḍiigu esi awe phọ ọmhiin bọ ịphen a Jizọs aḍighi bọ. Ạbumatuan phọ ọdi ụutughian ni ịmiin ịlo a Mesạyạ phọ ẹḅem bọ mọ: ‘Ẹephua oḍighi ghan ịdi ẹnhighe sịphe otu phọ a Jehova keemor loor ạmhi ịdipho ạnian.’

Kụ lhạ phọ 33 C.E., a Jizọs ạḅilhe ni ạḅaalhamhi otu ịiḅereghi phọ. R’amem r’amem ọdi kámeera mọ oye aafolhomi otu Ọde phọ odị.