Eru Phọ Ịdegh Jizọs Ephogh

A Jizọs aḍiiny bọ mụum mọ, uwaloor iigbia phọ ạpham ni nyọdi ạghimom ẹpe ẹdala phọ. Kụ ọdi ạrol ọkoony esi 40 aḍughul otu. Mem mọ ạmuphe phọ, Eru phọ ịghi ni ẹdegh Jizọs kụ ẹḅenhi mọ: ‘Eḍighi mạar dị nạ ạkar ri aḍighi Ọony Ẹnhaan, ḅẹnhi ikpo phọ ịphen phọ eten iiḅoghoḍi ạ brẹd.’ Kụ a Jizọs ạphagharanhaan esi ọghaaph oghol ịpe Ịge Iigbia phọ ẹḅem bọ mọ: ‘Ọge ni mọ oginha eḍien bịn kẹ́ngo oye ghuḍum. Ịyaar dị kẹngo oye ghuḍum pọ oḍighi ghan ạtorobo ịyaar dị a Jehova ạḅem.’

Ịpe reten kụ Eru phọ ẹḅilhe ẹdegh Jizọs. Ọdi ạḅenhi Jizọs mọ: ‘Eḍighi mạar dị nạ ạkar ri aḍighi Ọony Ẹnhaan, pọ pel sịen eekunha ạnyu otu ịiḅereghi phọ akuruph. Ọge ni mọ Ẹnhaan katom ni rụukpaany phọ ọdi okoph ạna.’ Kụolo a Jizọs ạḅilhe ạghaaph aghol ịpe Ịge Iigbia phọ ẹḅem bọ mọ: ‘Ọge ni mọ kạ́degh a Jehova apogh.’

Kụ a Setạn ạḅilhe aḍeenhaan Jizọs oomo ịtooghi aḅirinhi phọ r’igbogh phọ ạbidi, kụ ạḅenhi mọ: ‘Mị kạngo ni nyịnha oomo ịtooghi aḅirinhi phọ r’igbogh phọ ạbidi, eḍighi mạar dị nạ akpuḍian mem bịn uuseeny ịmhi.’ Kụ a Jizọs ạphagharanhaan mọ: ‘Ḍụa sịen Setạn! Ọge ni mọ oginha a Jehova bịn kụ ẹdi nạ kaaseeny ghan.’

Kụ Eru phọ ẹwilhe nyọdi ẹḍua, kụ ạruukpaany phọ eru ẹngo Jizọs eḍien olhe. Emhiigh mem mọ ạmuphe phọ kụ rẹki, a Jizọs agbeelhom ghan iiḅi ịinhaghan ịlo Ọmhar phọ. Ọpo kụ oḍighi phọ orom bọ nyọdi oru ịsien ade phọ oḍighi. Ịtughemhi phọ a Jizọs ịḅeraan ni we igey kụ bịdi ọdaph ghan nyọdi tọrobo ekpisi dị rạki.