A Jizọs Aḍighi A Mesạyạ Phọ

Ạ Jọn agbeelhom ghan mọ: ‘Oye dị upu ịmhi ratu ni.’ Mem dị a Jizọs odi 30 ạsia, ọdi ạḍua ni Gạlili ạghi asi Ọphiiny ạ Jọdạn, ạ Jọn odi bọ raḍiinye we mụum mọ. A Jizọs ạwa mọ ạ Jọn aḍiinye aani nyọdi mụum, kụolo ạ Jọn ạḅenhi Jizọs mọ: ‘Mị ụ́kpe oḍiinye ạna. Nạ kụ ụkpe oḍiinye ạmhi.’ Kụ a Jizọs ạḅenhi Jọn mọ: ‘A Jehova rạwa mọ uḍiinye ịmhi.’ Esi ịduon phọ, ịyal phọ ạbidi usoor ri Ọphiiny ạ Jọdạn, kụ ạ Jọn aḍiinye Jizọs mụum mọ.

A Jizọs rọsoghoronhu sịphe ạmuum mọ, bịn ạaḅereghi. Mem mem mọ bịn okuaḍio phọ aghughuronhu, kụ uwaloor iigbia phọ Ẹnhaan asoorom nyọdi ịdipho okuru ghọzo. Kụ a Jehova ạrol ẹpe k’ạke phọ ạḅem mọ: ‘Nạ kụ oginha Ọony phọ ạmhi. Eḍighinhom ịyaar phọ ạna kụ ịḅeraan ịmhi iboom.’

Mem mọ ọpo uwaloor iigbia phọ asoorom bọ Jizọs, kụ ẹdi a Jizọs aḍighi a Mesạyạ phọ ọbobo ạ Krạịst. Nyịidipho ọdi kamiigh oḍighi phọ a Jehova arom bọ nyọdi oru ịsien ade phọ oḍighi.

A Jizọs roḍiiny mụum mọ bịn ạghi ẹpe ẹdala phọ ạrol 40 aḍughul otu. Kụ roḅula, kụ ạghi ọmhiin ạ Jọn. Ịdipho a Jizọs rạki bọ ọteeny ạ Jọn, ạ Jọn ạḅem mọ: ‘Ọphon phọ kụ Ọony Oyool Ọga phọ Ẹnhaan eseere bọ ọsighe ịkaraph aḅirinhi phọ.’ Ịphen ạ Jọn ạghaaph bọ iḍighi ịdi awe kolegheri mọ a Jizọs kụ a Mesạyạ phọ. Nạ alegheri ni rạraar dị emitenhaan Jizọs mem mọ ạrol bọ ẹpe ẹdala phọ? Ọghi ọmhiin sịphe esi ịtuugha phọ etum bọ sịen.