Ạ Jọn Aakolhobian Eten Phọ

Mem mọ ạ Jọn ạmhanham bọ, ọdi aḍighi oyil Ẹnhaan. Ạ Jọn phọ ọony ạ Zẹkạrạyạ ra Elizạbẹt. A Jehova arom Jọn ọtughemhi awe phọ mọ a Mesạyạ phọ ratu. Kụolo ạ Jọn ọ́ghi ẹpe arubughotu phọ r’ạramha phọ ọtughemhi awe phọ ịdipho awe ọotughian bọ mọ ọdi kaḍighi, ọdi ạghi ghụn ẹpe ẹdala phọ. Awe ụḍua ghan ni ẹpe Jeruselem ra Judia ọghi ọteeny Jọn dị kạtughemhi bịdi. Kụ ọdi ạtughemhi ghan ni bịdi mọ orue oḍighi ịdi kẹḅeraan Ẹnhaan, ẹwa mọ bịdi ọwilhe oḍighi ghan ịkaraph ạraraar. Ịbadi awe dị ọnhaghan ịtughemhi phọ ạ Jọn ukiton ni, kụ ạ Jọn aḍiinye bịdi mụum Ọphiiny ạ Jọdạn.

Ạ Jọn ọ́wa ọmhoogh iboom ạraraar sịphe aghuḍum mọ ọdi. Ọdi ạkpolhoghian ghan ạsuoma dị oḍighinhom ozu ạ kạmẹl. Kụ eḍien ọdi iḍighi igurubia r’ẹnhuum aḍiowo. Awe ụkar ghan ni ọwa olhegheri ọdo oye phọ ạ Jọn aru bọ. Ghạlhamo r’ịduon awe ạ Fạrisi phọ rạ Sạdusi phọ ophoophe bọ ni loor, bịdi ụghi ni ọmhiin ọdi. Kụ ạ Jọn ạḅenhi bịdi mọ: ‘Ikiton, ẹwilhe oḍighi ghan ịkaraph ạraraar. Kẹ́tuan mọ nyinha ạnmuny Ebrạhạm bịn eḍighi ghan ịkaraph ạraraar. Ịduon nyinha eḍighi bọ nmụny Ebrạhạm ị́ma imiteom mọ nyinha ạnmuny Ẹnhaan.’

Ịbadi ụghi ni ọteeny Jọn kụ opuru mọ: ‘Yoor koḍighi eeghe kụ olhoghi Ẹnhaan ạḅaal?’ Ạ Jọn ạḅenhi bịdi mọ: ‘Eḍighi mạar dị nạ ạmhoogh ịyal ạrusuoma, ngọ nyoniin ọlo ụ́moogh aani.’ Nạ alegheri ni ịyaar phọ eḍighi bọ kụ ạ Jọn ạḅem bọ ịduon phọ? Ọdi ạwa mọ awe phọ olhegheri mọ eḍighi mạar dị bịdi rọwa oḍighi ịdi olhoghi Ẹnhaan kạḅaal, pọ bịdi kọpomhoghian we.

Ọdi ạḅenhi bụphe ọbonyi ghan bọ iisogh phọ mọ: ‘Kéegbegheḍiom ghan we.’ Kụ bụo ẹgham mọ ọdi ạḅenhi mọ: ‘Kẹ́sighe ghan oti ọmhan ḅịlhe kẹ́gba ghan ọkpe.’

Ạbupinyon rịkia phọ r’ạbuo a Livạị phọ ụghi kẹn ni ọteeny Jọn kụ ọḅenhi mọ: ‘Ụḅenhi iyoor ọdo oye phọ nạ aru bọ. Ịdi eḍighi bọ oomo awe rọwa ni olhegheri ọdo oye phọ nạ aru bọ.’ Kụ ạ Jọn ạḅenhi bịdi mọ: ‘Mị ẹḍogh dị edi ẹdala phọ retorori ghan we kẹngo a Jehova ịdipho oyil phọ Ạịzạyạ ạghaaph bọ.’

Ịtughemhi phọ ạ Jọn ịḅeraan ni we phọ. Kụolo ịbadi ụwa ghan ni olhegheri mụghumo ạ Jọn kụ a Mesạyạ phọ. Esi ịduon phọ ọdi ạḅenhi bịdi mọ: ‘Oye dị upu ịmhi ratu ni. Kụ mị ụ́man ọokpo iḍigh arokoro ọdi. Mị riḍiinye ghan inyinha mụum, kụolo ọdi kiḍiinyeom inyinha uwaloor iigbia phọ.’