Eḍien Phọ A Jizọs Alhe Bọ Asughanham Ọmhan

Tọrobo ạlha, ụnwanyu ạ Nịsạn 14, awe a Ju phọ ulhe ghan ni Ẹyaal Ọphel Otenhe. Bịdi ulhe ghan Ẹyaal phọ ọotughianham ịpe a Jehova ạphel bọ bịdi ạsighe dọl ạrebenhe ẹpe Ijipt, r’ịpe ạsighe bọ bịdi ạlhogh De Oguan phọ. Lhạ phọ 33 C.E., a Jizọs r’abutelhedom mọ ọdi ụrol li oniin otu ạnyu ẹpe Jeruselem olhe Ẹyaal Ọphel Otenhe phọ. Mem dị bịdi olhe Ẹyaal phọ ọmhan, a Jizọs ạḅenhi bịdi mọ: ‘Oniin ọnyo anyinha kaal li ịmhi.’ Iḍigh ni iikia esi abutelhedom mọ kụ opuru Jizọs mọ: ‘Ạnhian kụ oye phọ?’ A Jizọs ạḅenhi bịdi mọ: ‘Tọrobo oye phọ ọpo mị kạngo bọ ạ brẹd phọ mọ alhe.’ Kụ ọdi aḅigh ạ brẹd ạngo Judas Iskạrịọt. Mem mem mọ bịn a Judas aḅetenhu amite esi phọ bịdi ọrol bọ.

A Judas r’ọḅua kụ a Jizọs ạaḅereghi kụ ạsighe ạ brẹd phọ ạparion ạngo butelhedom mọ ọdi osugha bọ. Kụ ạḅenhi mọ: ‘Ile ạ brẹd phọ. Ạ brẹd phọ rạma ghan ḍizu phọ ạmhi, mị kạḅogh bọ ạngo loor ẹmhu anyinha.’ Ọdi ạḅilhe ni ạsighe miim kụ ạaḅereghi kụ ạḅogh ạngo butelhedom mọ ọdi. Kụ ạḅenhi mọ: ‘Ịpughol miim mọ ạmuen phọ. Amiim mọ ạmuen phọ rạma ghan ịḅaal phọ ạmhi, mị kạngo bọ pịdi ọsar ịkaraph awe ọbilhenhaan. Mị riguanhaan inyinha mọ nyinha keḍighi ruwo ẹmha r’ạmhi ẹpe k’ạke phọ. Tọrobo ạlha iḍighi ghan ịduon phọ ịitughianham ịmhi.’ Tọrobo ạlha, ạbuphe rọdaph bọ Jizọs ọtuugh ni ịduon phọ roḍighi ghan. Rokol ghan eḍighieeny phọ ẹphen phọ nyịidipho mọ Eḍien Adulhe Uwo Ẹmhoogh phọ.

Bịdi olhe bọ eḍien phọ ọmhan, abutelhedom mọ umhiigh ni ọogbakian oye dị aḍighi ogbogh sịphe igbo phọ ạbidi. Kụolo a Jizọs ạḅenhi ni bịdi mọ: ‘Oye dị aḍighi ogbogh sịen igbo phọ anyinha pọ oye dị ạmhiin mọ ọdi kụ ọbam ḅịlhe mọ ọdi ọ́mhan mạar.

‘Nyinha ạrighiri ạmhi. Kụ mị mịḅenhi inyinha tọrobo ịyaar dị Ọde phọ ạmhi ạwa mọ mị ịḅenhi inyinha. Mọony amem mị kaḅula ni ẹpe k’ạke ạteeny Ọde phọ ạmhi. Kụolo nyinha kẹtol li sịen ade phọ, kụ awe kọsighe ẹphomhoghian phọ nyinha ẹmhoogh bọ sịen igbo phọ anyinha kụ olegheriom mọ nyinha ạbumatuan ạmhi. Oniin ạphomhoghian ghan nyoniin ịduon mị ịphomhoghian bọ inyinha.’

Ekureriom mọ a Jizọs ạḅilhe ni ạaḅereghi kụ ạlhom mọ a Jehova aghoph bụmatuan phọ ọdi. Ḅịlhe mọ a Jehova ạlhoghonhaan bịdi ḍịghaagh ọmhoogh ẹepho sịphe igbo phọ ạbidi. Ọdi ạḅilhe ni ạlhom mọ ọpham ḍien a Jehova ọḅaalhamhi. Kụ ọdi r’abutelhedom mọ ọdi ọmhoor sụor oboom a Jehova kụ omite erugh. Amem mọ mẹteeny dị kosiph Jizọs.