Mosiph Jizọs

A Jizọs r’abutelhedom mọ ọdi uugo ni eḍiiny a Kidrọn osi Ẹeḅaraph Olivs. Mem mọ ạmuphe phọ meten ogbo aḍughul kụ ụnwanyu phọ maaghiraan. Mem dị bịdi osi oghoony ạ Gẹtsẹmạni, a Jizọs ạḅenhi bịdi mọ: ‘Ịtol sịen egon ghan.’ Kụ a Jizọs arelhe ạghi ghisigh ẹnum kụ akpuḍian kụ amhiigh ọoḅereghi r’oboom ọto mọ: ‘Ogbi ạna kụ amite Jehova.’ A Jehova ạnhaghan ni ịiḅereghi phọ ọdi kụ arom ọokpaany dị ạghi ạkparamhi Jizọs. Mem dị a Jizọs ạghi ạteeny butelhedom mọ, ọdi ạmhiin dị bịdi rọnaanhi, kụ ạḅenhi bịdi mọ: ‘Ịsuma! Ạmuen phọ kámem ọnhaanhi! Amem mọ mẹteeny dị kụḅogh ịmhi ọngo ẹ́pomhoghian phọ ạmhi.’

Mọony amem bịn a Judas asi r’aḍita awe dị ọpham rolhool r’ạraḅam. Ọdi alhegheri ni mọ a Jizọs kạtol ẹpe phọ, loor esi dị bịdi ugbor ghan ni ọghi oghoony ạ Gẹtsẹmạni. A Judas mạḅenhi ni we ẹgham mọ, mọ ọdi kạma ni Jizọs aḍeenhaan bịdi. Esi ịduon phọ, ọdi arelhe ni ạghi ạteeny Jizọs kụ ạmhagh mọ: ‘Ọtughemhia,’ kụ ạkpun nyọdi. Kụ a Jizọs ạḅenhi nyọdi mọ: ‘Judas, nạ ụkpun ịmhi pịdi otu usiph ịmhi?’

A Jizọs arelhe ni ạghi ạteeny we phọ kụ apuru mọ: ‘Nyinha rẹwa ghan ạnhian?’ Kụ awe phọ ọphagharanhaan mọ: ‘A Jizọs ọpo ạ Nạzạrẹt phọ.’ Kụ ọdi ạḅenhi bịdi mọ: ‘Mị kụ ọdi phọ.’ Kụ awe phọ oḅulholhom ọmhan kụ omhelheghu. A Jizọs ạḅilhe ni apuru bịdi mọ: ‘Nyinha rẹwa ghan ạnhian?’ Kụ bịdi ọḅilhe ọphagharanhaan mọ: ‘A Jizọs ọpo ạ Nạzạrẹt phọ.’ Kụ ọdi ạḅenhi bịdi mọ: ‘Mị mịḅenhi ni inyinha mọ mị kụ ọdi phọ, ịbilhe butelhedom mọ ạmhi.’

Mem dị a Pita alhegheri ịpe remite bọ, ọdi amiteom ni elhool ọdi kụ asoph aḅeri ẹbenhe uwo ẹmhu ạbupinyon rịkia phọ dị oghol mọ Mạlkụs. Kụolo a Jizọs ạḅogh ni aḅeri oye phọ, kụ aakonhom. Kụ ạḅenhi Pita mọ: ‘Ḅulhemhi elhool ẹgham mọ ạna sịphe ẹrol bọ. Eḍighi mạar dị nạ akoph elhool ẹgham, nạ kamugh ḍuugh elhool ẹgham.’ Kụ awe ẹgham mọ osiph Jizọs kụ ọphaḍi rịghaagh phọ, kụ ọsighe ọghi osiemhi kụ uwo ẹmhu ạbupinyon rịkia phọ, Ạnạs. Kụ Ạnạs aapuru Jizọs sipuru, kụ ạḅilhe ạsighe nyọdi ạghimom ka Keyạfạs aḍighi bọ uwo ẹmhu ạbupinyon rịkia phọ lhạ phọ ạḍiphe phọ. Kụolo eeghe kụ imitenhaan butelhedom mọ?