A Pita Ạpharanhaan Jizọs

Mem mọ a Jizọs r’abutelhedom mọ ọdi ọrol bọ sịphe otu ạnyu phọ, ọdi ạḅenhi ni bịdi mọ: ‘Ḍughul phọ ạḍien phọ, oomo phọ anyinha kịwilhe ni ịmhi esuma.’ Kụ a Pita ạḅenhi nyọdi mọ: ‘Ghạlhamo ạbueripho awe phọ ụwilhe ni nyịnha osuma. Mị nyịnha kạ́wilhe.’ A Jizọs ạḅenhi ni Pita mọ: ‘Tụtu ạkenhegh kạlaay, nạ kạḅem ni mọ nạ ịmhi úlhegheri ịraar amem.’

Mem mọ osiph bọ Jizọs rọkimom olhoghi otu a Keyạfạs, ịbadi abutelhedom mọ usuma ni. Kụolo ịyal ạbuno ụdaph ni ḍita awe phọ ọpham bọ Jizọs rọḍuanham. Oniin ọnyo ạbuen phọ pọ a Pita. A Pita ạdaph ni we phọ aḍigh sịphe ogiga phọ a Keyạfạs kụ ạrol ọgbal ạanma ghan nịan. Sịphe ọdi rạanma bọ nịan phọ, oniin ẹbenhe ọnyanhi ạmhiin ni Pita kụ ạḅem mọ: ‘Mị alhegheri ni nyịnha! Nạ ụdaph aani ghan ni Jizọs!’

A Pita ạḅenhi ni ọnyanhi phọ mọ: ‘Tạa, mị ụ́daph ghan nyọdi! Kụ mị úlegheri kẹn ịyaar phọ nạ rạkaaph bọ!’ A Pita rọghaaph ịphen phọ kụ aḅetenhu anyeenhe ẹpe ọnhu aḍibuo phọ. Kụolo ịduon ọdi asi bọ ẹpe phọ bịn ọnhon ẹbenhe ọnyanhi ạmhiin nyọdi kụ ạḅenhi ḍita awe phọ mọ: ‘Oye phọ ọphon phọ ạrol aani ghan ni ra Jizọs!’ Kụ a Pita ạḅenhi nyọdi mọ: ‘Kékulha mị kolhegheri ghan oye dị oghol mọ a Jizọs!’ Kụ oniin oye ạḅenhi nyọdi mọ: ‘Nạ oniin ọnyo ạbidi phọ ni! Anem mọ ạna eḍeenhaan ni mọ nạ ọlo ạ Gạlili, ịdipho a Jizọs.’ Kụolo a Pita aghunya ni mọ: ‘Mị úlegheri oye phọ ọpo phọ!’

Mem mọ ạmuphe phọ bịn ạkenhegh ạlhaay. Kụ a Pita ạmhiin dị a Jizọs aaghiraan aphogh nyọdi. Kụ ọdi ạatughian ịpe a Jizọs ạḅenhi bọ nyọdi, kụ amite erugh amhoghi egey phọ emoghi.

Mem mọ ạmuphe phọ, ikpolhom awe phọ oḍighi bọ bụo ịiruen phọ uukpomhoghan ni olhoghi otu a Keyạfạs osophonhaan a Jizọs ọoruen. Ẹpe ọmhan, bịdi mosopha ni mọ bụno kokiigh Jizọs, kụ nyịidipho bịdi rọwa ghan ịyaar ọtuan kụ oghiigh ọdi, kụolo bịdi ụ́miin ịyaar. Ekureriom mọ, a Keyạfạs apuru Jizọs mọ: ‘Nạ kụ Ọony phọ Ẹnhaan phọ ni?’ Kụ a Jizọs ạphagharanhaan mọ: ‘Ii, mị kụ ọdi phọ ni.’ Ịphen phọ iḍighi ịdi a Keyạfạs ạḅem mọ: ‘Yira mọmhiin ịyaar ọsighe osiphom ọdi olhogh. Ọdi mạapu ḍien Ẹnhaan!’ Kụ ikpolhom awe ịiruen phọ omheeraam mọ: ‘Ii, ọdi ạkpe ni oghiigh.’ Bịdi ụkagh riḍien a Jizọs, ọsinhoghom nyọdi ịghor, kụ ooḅorogh nyọdi, kụ ọḅenhi ghan nyọdi mọ: ‘Eḍighi mạar dị nạ aḍighi oyil Ẹnhaan, pọ kol oye phọ aḅor bọ nyịnha!’

Mem dị ạḍiroor ẹḅaal, ikpolhom awe phọ ụḅilhe ni ọpham Jizọs oḍighom sịphe bịdi rookpomhoghan ghan bọ komite ezue phọ. Sịphe phọ ụḅilhe ni opuru Jizọs mọ: ‘Nạ phọ ni kụ Ọony phọ Ẹnhaan?’ Kụ a Jizọs ạphagharanhaan mọ: ‘Nạ r’aloor ạna kụ ụḅem.’ Kụ bịdi ọḅem mọ ọdi mạapu ḍien phọ Ẹnhaan kụ ọsighe nyọdi ọghimom kạ Pọntịọs Pạịlet, aḍighi bọ Ọtooghia a Rom. Eeghe ịyaar kụ ịḅilhe emite? Ọghi ọmhiin.