Ughiigh Jizọs Sịphe Gọlgọtạ

Aruwo ẹmhu ạbupinyon rịkia phọ ụpham ni Jizọs ọghimom kạ Pạịlet kụ ạ Pạịlet apuru bịdi mọ: ‘Eeghe olhogh kụ ẹdi nyinha ẹḅem bọ mọ oye phọ ọphon phọ asoor?’ Kụ bịdi ọḅem mọ: ‘Ọdi rạḅem ghan mọ ọdi uwo ẹmha!’ Ạ Pạịlet apuru ni Jizọs mọ: “Nạ uwo ẹmha ạbuo a Ju phọ ni?” Kụ a Jizọs ạphagharanhaan mọ: “Ịtooghi phọ ạmhi kị́lo ịsien aḅirinhi phọ.”

Ạ Pạịlet ạsighe ni Jizọs ạghimom kạ Hẹrọd, ọpo rạtooghi bọ Gạlili, ophogh mụghumo ạ Hẹrọd kạmiin ni olhogh dị a Jizọs asoor. Kụolo ạ Hẹrọd ọ́mhiin olhogh dị a Jizọs asoor, esi ịduon phọ, ạsighe ni nyọdi aḅulhemhi kạ Pạịlet. Kụ ạ Pạịlet ạḅenhi we phọ mọ: ‘Ạ Hẹrọd r’ạmhi ụ́miin olhogh dị oye phọ ọphon phọ asoor. Esi ịduon phọ mị kaseere nyọdi.’ Kụolo aḍita awe phọ ụlo mọ: ‘Kiigh nyọdi! Kiigh nyọdi!’ Awe ẹgham mọ ụgurogh ni Jizọs, ọsinhoghom nyọdi ịghor kụ ọḅilhe okuphogh. Bịdi ụsighe ni eghoony iitoor ozu nyọdi kụ ọnmoghoghoom ghan, bịdi ụḅem ghan mọ: ‘Yoor ọmagh ni oo, Uwo ẹmha ạbuo a Ju phọ.’ Ạ Pạịlet ạḅilhe ni ạḅenhi we phọ mọ: ‘Mị ụ́miin olhogh dị oye phọ ọphon phọ asoor.’ Kụolo awe phọ ụlo mọ: “Kạn nyọdi loor oreeny!” Kụ iḍighi kụ ạ Pạịlet ạḅogh ni Jizọs ạngo we phọ mọ ọghi oghiigh.

Awe ẹgham mọ ụpham ni Jizọs ọghimom ekpisi dị oghol mọ Gọlgọtạ, kụ ọkan nyọdi loor oreeny. Sịphe phọ kụ ẹdi a Jizọs ạaḅereghi mọ: ‘Ọde, sạr ịkaraph ạbidi ạwilhenhaan, loor esi dị bịdi úlegheri ịpe bịdi roḍighi bọ.’ Awe ụnmoghoghoom ni Jizọs kụ ọḅem ghan mọ: ‘Eḍighi mạar dị nạ aḍighi ni Ọony Ẹnhaan, pọ soor sịphe oreeny phọ! Pẹlha loor ạna.’

Oniin ọḅa dị ọkan otumeriom Jizọs ạḅenhi nyọdi mọ: “Ụutughian aani ịmhi mem dị nạ aḍigh ẹpe Ọmhar phọ ạna.” A Jizoṣ aguanhaan nyọdi mọ: “Nạ kạtol li r’ạmhi sịphe Pạrạdạịs.” Ogbo ootaany, bịn ufiri aḍigh oomo ẹmha phọ, kụ ẹrol esi ịraar ạwa. Buniin ạbumatuan a Jizọs ụmheera ni otuman sịphe ọkan bọ nyọdi. A Meri onhiin phọ ọdi ạrolhom aani ni. Kụ a Jizọs ạḅenhi Jọn mọ ạmhaar aphogh Meri mụdi onhiin ọdi.

Ekureriom mọ a Jizọs ạḅem ni mọ: “Memhunhughan!” Kụ azumeri ẹmhu ọdi bịn amhugh. Mem mọ ạmuphe phọ, ade phọ iphiigha ni. Kụ ukpe phọ odiom bọ esi iigbia phọ aalemhi ạphaaruan. Oniin ọnyo ẹgham dị ạrol sịphe phọ ạḅem ni mọ: ‘Ọkar agey, oye phọ ọphon phọ Ọony Ẹnhaan phọ ni.’