Moḅeton Jizọs Sịphe Aḍuugh Phọ

Mem mọ a Jizọs amhugh bọ, oniin oye dị ạmhoogh eboom ẹela dị oghol mọ a Josẹf ạghi ni ạteeny Pạịlet ạḅenhi mọ ạngo nyọdi ḍizu phọ a Jizọs. Kụ a Josẹf ạsighe elo agbul ḍizu phọ a Jizọs, kụ aphurughiom ịma ukpe kụ ạghi aḍi oḍi dị kőḍi ghan oye. Kụ ạsighe ḍiboom aḍighiigh akpereghiom oḍi phọ. Aruwo ẹmhu ạbupinyon rịkia phọ ụḅenhi Pạịlet mọ: ‘Yoor rokiilaan ni mọ abutelhedom mọ ọdi kọki ọsighe ḍizu phọ a Jizọs pạ oḍi bọ bịn ọḅem mọ ọdi maḅetenhu esi aḍuugh.’ Esi ịduon phọ, ạ Pạịlet ạḅenhi bịdi mọ: ‘Ịmaar ẹḅirighi oḍi phọ kụ ẹsighe we ẹgham eseere pịdi opogh oḍi phọ.’

Eḅon ạḍiroor, sịphe omhunhenhiom ịraar aḍughul otu phọ, abuniin ạnmariir ụghi ni ẹpe oḍi bọ Jizọs, kụ ọmhiin mọ mookilhemhi ọsighe ḍighiigh phọ okpereghiom bọ oḍi phọ. Kụ sịphe olhoghi oḍi phọ, ọokpaany Ẹnhaan ạḅenhi nmạriir phọ mọ: ‘Kẹ́moogh oghiilaan. Moḅeton Jizọs esi aḍuugh. Ịki ẹḅenhi bụmatuan phọ ọdi mọ bịdi ọghi ẹpe Gạlili ọteeny nyọdi.’

A Meri Mạgdạlin aagborion ni ạghi ạmhiin Pita rạ Jọn, kụ ạḅenhi bịdi mọ: ‘Oye mạsighe ḍizu phọ a Jizọs!’ A Pita rạ Jọn ughiil li onyeenhe ẹpe oḍi bọ Jizọs. Ọghi bọ osi, bịdi ụmhiin dị oḍi phọ apokoro kụ oḅula ilhoghi aruutu ạbidi.

A Meri Mạgdạlin ạḅilhe ni aḅula ẹpe oḍi phọ kụ ạmhiin ịyal ạruukpaany Ẹnhaan pạ olhoghi oḍi phọ, kụ ạḅenhi bịdi mọ: ‘Mị úlegheri ekpisi dị ọsighe Uwo ẹmhoogh phọ ạmhi ọghimom.’ Ọdi ạḅilhe ni ạmhiin oye dị ọdi ạsighe mọ oye dị rapogh ghan esi phọ, kụ ạḅenhi mọ: ‘Oye phọ, ụḅenhi ịmhi ekpisi phọ nạ ạsighe bọ Uwo ẹmhoogh phọ ạmhi ạghi aseere.’ Kụolo mem dị oye phọ ạmhagh nyọdi mọ, “Meri!” bịn ọdi alhegheri mọ a Jizọs. Kụ a Meri ạlo mọ: ‘Ọtughemhia!’ kụ ạghi aḅol nyọdi. Kụ a Jizọs ạḅenhi nyọdi mọ: ‘Kịa ạḅenhi bumor phọ ạmhi mọ nạ mụmhiin ịmhi.’ Eginha amem bịn a Meri aghiil li ạghi ạteeny bụmatuan phọ kụ ạḅenhi bịdi mọ ọdi mạmhiin Jizọs.

Ḍiniin phọ aḍio phọ ạḍiphe phọ, mem dị ịyal ạbumatuan a Jizọs ọḍua Jeruselem rọki Ẹmạọs, oniin oye arelhe ni ạghi ạteeny bịdi kụ apuru mọ: ‘Nyinha rẹkaaph ghan eeghe?’ Bịdi ụphagharanhaan mọ: ‘Nạ kọ̋naghan aani mọ ịraar aḍughul otu ẹpe ọmhan, aruwo ẹmhu ạbupinyon rịkia phọ ughiigh ni Jizọs? Kụ nyịidipho abuniin ạnmariir rọḅem ghan mọ moḅeton nyọdi esi aḍuugh phọ!’ Oye phọ apuru bịdi mọ: ‘Nyinha ị̋itughian ịpe ariil phọ ọghaaph bọ? Ariil phọ ụḅem mọ ạ Krạịst phọ kamugh ni kụ ọḅilhe oḅeton.’ Ọdi ạghiom ni ghisigh ạḅenhi bịdi ịpe Ạḍinya Iigbia phọ ẹghaaph bọ. Bịdi osi bọ Ẹmạọs, ạbumatuan phọ ụḅenhi oye phọ mọ ạdaph bịdi. Mem dị bịdi rọwa olhe eḍien adulhe, oye phọ ạaḅereghi ni kụ bịdi olhegheri mọ oye phọ a Jizọs. Mem mem mọ bịn ọdi aphe sịphe phọ.

Ịyal phọ ạbumatuan phọ uugborion ni oḅula Jeruselem, kụ ọghi pạ otu phọ abutelhedom mọ ookpomhoghan bọ ọghaaph ịpe emite bọ. Sịphe phọ a Jizọs amitenhaan ni bịdi. Ẹḅel amem mọ abutelhedom mọ úmeeraam mọ a Jizọs kụ ạmheera bọ sịphe phọ. Kụ ọdi ạḅenhi bịdi mọ: ‘Ipogh rịghaagh phọ ạmhi, ẹḅilhe ẹḅogh ẹmhiin. Ọge ni mọ ạ Krạịst phọ kaḅetenhu ni esi aḍuugh.’