A Jizọs Ạḅilhe Amitenhaan Bụmatuan Phọ Ọdi

A Jizọs amitenhaan bọ butelhedom mọ ọdi eten, a Pita ạḅem mọ ọdi rạki ạkoni ẹpe Ọphiiny phọ ạ Gạlili. Ạ Tọmọs, Jems, Jọn, r’ạbunhon ạbumatuan phọ ụdaph ni nyọdi. Kụ bịdi ọkoni oomo aḍughul phọ kụ r’ịyaar úkiigh.

Ạḍiroor rẹḅaal bịdi ụmhiin ni oye dị ạmheera ẹpe oogbom ọphiiny phọ. Oye phọ ạlo ni apuru bịdi mọ: ‘Nyinha ekiigh ni ena ḍụghum?’ Kụ bịdi ọphagharanhaan mọ: ‘Eeye!’ Kụ oye phọ ạḅenhi bịdi mọ: ‘Izu ọzuguru phọ ẹghiom elhiom anyinha.’ Ịduon bịdi ozu bọ ọzuguru phọ, bịn ina emuza dị bịdi útue ụkpaaghi. Mem mem mọ bịn ạ Jọn ạlhogh elhegh mọ oye phọ a Jizọs, kụ ạḅem mọ: ‘Ọpo phọ Uwo ẹmhoogh phọ!’ Eginha amem bịn a Pita apel asuma sịphe ọphiiny phọ, kụ ạmhughi anyeenhe ẹpe oogbom ọphiiny phọ. Kụ ạbueripho ạbumatuan phọ ọzoghi oghuugh phọ.

Bịdi osi bọ ẹpe oogbom ọphiiny phọ, ụmhiin ina dị rọpoghi loor ạnian rạ ạ brẹd. Kụ a Jizọs ạḅenhi bịdi mọ ọsighe iniin ina phọ bịdi mọze bọ ọḅaram. Kụ ạḅilhe ạḅenhi bịdi mọ: ‘Itu elhe eḍien.’

Bịdi rolhe eḍien phọ rọmhan, kụ a Jizọs apuru Pita mọ: ‘Nạ ụphomhoghian ni ịmhi apu oḍighi ạkoni phọ ḍụghum?’ Kụ a Pita mọ: ‘Ii, Uwo ẹmhoogh, nạ alegheri ni mọ mị ạphomhoghian ni nyịnha.’ Kụ a Jizọs ạḅenhi nyọdi mọ: ‘Ngọ eḍien iyool phọ ạmhi.’ Kụ a Jizọs ạḅilhe apuru nyọdi mọ: ‘Pita, nạ ụphomhoghian ni ịmhi?’ Kụ a Pita ạḅem mọ: ‘Uwo ẹmhoogh, nạ alegheri ni mọ mị ạphomhoghian ni nyịnha.’ Kụ a Jizọs ạḅenhi nyọdi mọ: ‘Pogh ịbam iyool phọ ạmhi.’ A Jizọs ạḅilhe ni apuru Pita ḍiniin phọ aḍipuru phọ omhunhenhiom ịraar amem. Kụ a Pita akururu kụ ạḅenhi nyọdi mọ: ‘Uwo ẹmhoogh, nạ alegheri ni oomo ạraraar. Kụ nạ alegheri ni kẹn mọ mị ạphomhoghian ni nyịnha.’ Kụ a Jizọs ạḅenhi nyọdi mọ: ‘Ngọ eḍien ịbam iyool phọ ạmhi.’ Kụ ạḅilhe ạḅenhiom Pita mọ: ‘Kịom ghisigh ụdaph ghan ịmhi.’