Okoriom Ikoli Ạtuugha Ni Igey Phọ Alhegheri

Ẹpe Filipạị, oniin ẹbenhe ọnyanhi ạrol li dị ọkaraph uwaloor ạrol loor phọ. Ọkaraph uwaloor phọ aḍighi ịdi ọnyanhi phọ alhegheri ghan rạraar dị ạbunhon awe úlegheri. Kụ ịpe phọ iḍighi ịdi ạburude otu phọ ọdi ọmhoogh ghan ikpoki. Mem mọ ạ Pọl rạ Sạịlạs odi bọ Filipạị, ọnyanhi phọ ọphon phọ ạdaph ghan bịdi esi ịbadi aḍughul otu kụ ạlo ghan mọ: ‘Awe phọ ạbuen phọ ạrebenhe Ẹnhaan phọ Epelheghiom bọ.’ Ẹsighe rẹki, ạ Pọl ạḅenhi ni ọkaraph uwaloor phọ mọ: ‘Mị akol ḍien phọ a Jizọs kụ rạḅenhi nyịnha mọ mite loor ọdi!’ Mem mem mọ bịn ọkaraph uwaloor phọ ạḍua loor ọnyanhi phọ.

Ịduon ạ Pọl aphorogh bọ ọkaraph uwaloor phọ loor ọnyanhi phọ, iphin ni ilhoghi ạburude otu phọ ọdi loor esi dị bịdi kọ́moogh mụn ikpoki. Bịdi usiph ni Pọl rạ Sạịlạs ọghimom otu ịiruen kụ ọḅenhi we phọ mọ: ‘Awe phọ ạbuen phọ rọkaaghi iilhogh ẹmha phọ, kọḅilhe ọgbaragbaramhi ẹmha phọ ayira!’ Ạbuo ịiruen phọ usoph ni ọoruen ophume Pọl rạ Sạịlạs kụ ọḅenhi we mọ ọgurogh bịdi kụ ọlhogh ikoli. Okoriom ikoli phọ ạsighe ni bịdi aroph asumeeny pạkiri otu ikoli phọ dị ẹkar eghul iboom, kụ ạlhogh bịdi olhool.

Ạbunhon awe ụrol aani ni otu ikoli phọ ọlhogh bọ Pọl rạ Sạịlạs. Ogbo aḍughul mem dị ạ Pọl rạ Sạịlạs rọmoor sụor koboom a Jehova, otu ikoli phọ aphiigha ni, kụ arughuugh otu ikoli phọ eghunyonhu. Kụ izime phọ r’olhool phọ ọlhoghoḍi bọ we phọ ẹkanyanhu. Okoriom ikoli phọ aghiil li aḍigh sịphe otu ikoli phọ, kụ ạmhiin dị arughuugh phọ meghunyonhu. Mem mem mọ bịn ạsighe elhool ẹgham ạwa oghiigha aloor ọdi loor esi dị ạatughian mọ awe phọ ọlhoghoḍi bọ ikoli phọ mosumughu.

Kụolo ạ Pọl ạlo ni mọ: ‘Kákiigha loor ạna! Yoor odi ni sịen!’ Okoriom ikoli phọ aghiil li aḍigh ẹpe olhoghi phọ, kụ akpuḍian risigh ạ Pọl rạ Sạịlạs, kụ apuru mọ: ‘Mị kaḍighi eeghe kụ ạmoogh pẹlieeny?’ Kụ bịdi ọḅenhi nyọdi mọ: ‘Rẹwa dị nạ r’eghunotu phọ ạna kọmoogh omheeraam ọki esi a Jizọs.’ Kụ ạ Pọl rạ Sạịlạs ọtughemhi okoriom ikoli phọ r’eghunotu phọ ọdi ikpo ọnhu phọ a Jehova kụ bịdi oḍiiny mụum.