Ạ Pọl Ra Timoti

A Timoti aḍighi ọḍoogh ọnyo umor dị ạrol ookpomhoghan a Listra. Ọde ọdi aḍighi ọlo a Gris kụ onhiin ọdi aḍighi ọnyo a Ju. Ḍien onhiin phọ ọdi ughol mọ Yunis, kụ ḍien ogbogh onhiin ọdi ughol mọ Lọịs. Onhiin phọ ọdi r’ogbogh onhiin phọ ọdi kụ ụtughemhi Timoti ịlo a Jehova k’ẹghoroghor.

Mem dị a Pọl ạḅilhe ạghi Listra ọghaaph iiḅi ịinhaghan phọ, ọdi ạmhiin mọ a Timoti ạpomhoghian ni bumor phọ kụ ạḅilhe rạwa roopoogh ọlhoghonhaan ạbidi ḍịghaagh. Esi ịduon phọ ạ Pọl ạḅenhi ni Timoti mọ ạdaph nyọdi ạghi ịnhon arikpisi ọghaaph iiḅi ịinhaghan phọ. Ẹsighe rẹki, ạ Pọl ạtughemhi ni Timoti ịlo ọkuamhi ọghaaph iiḅi ịinhaghan phọ rọḅilhe ọtughemhi ạbunhon.

Uwaloor iigbia phọ ạrol li rạ Pọl ra Timoti tọrobo ekpisi dị bịdi ọghi. Ḍiniin aḍughul, ạ Pọl ạmhiin ni uḍien dị oye ọlo ạ Mạsidonia rạlom ghan ọlhoghonhaan ạḍighaagh ọdi. Kụ iḍighi kụ ạ Pọl, Timoti, Sạịlạs ra Luk ụghi ni Mạsidonia ọghaaph iiḅi ịinhaghan phọ kụ ọḅilhe omiteom rookpomhoghan.

Eniin ẹmha ạ Mạsidonia dị oghol mọ Tẹsạlonạịkạ, ịbadi awe umheeraam ni ịtughemhi phọ ạ Krạịst. Kụ ịphen phọ iḍighi ni ịdi abuniin awe a Ju phọ ọghagham olhoghi Pọl, Timoti rạ Sạịlạs. Awe phọ ạbuen phọ uukpomhoghi ni we dị oru osiph Pọl r’ạrighiri phọ ọdi ọghimom risigh ạbuphe roogbo ghan bọ ịiruen phọ, kụ ọlo ghan mọ: ‘Awe phọ ạbuen phọ oḍighi mụlhogh ḍien ịtooghi phọ a Rom!’ Mem mọ ạmuphe phọ aghuḍum ạ Pọl ra Timoti ạrol esi ooto r’osooromineen. Esi ịduon phọ, bịdi usuma ni ḍughul ọghi Beria.

Ẹpe Beria, awe a Gris ra Ju dị ọrol ẹpe phọ ụnhaghan ni iiḅi ịinhaghan phọ, kụ ọmhoogh omheeraam ọghi esi ạ Krạịst. Kụolo mem dị abuniin awe a Ju ọḍua Tẹsạlonạịkạ oru ọkom ịgbaragbara, ạ Pọl ạḅua ni ẹpe phọ ạghi Ạtẹns. Kụ a Timoti rạ Sạịlạs ọrol ẹpe Beria ọkparamhi ghan bumor phọ. Ịduon amem rẹki bọ, ạ Pọl arom ni Timoti oḅula ẹpe Tẹsạlonạịkạ ọkparamhi abumor phọ osoman bọ ịgbagara ịgbiphoghom. Ịpe reten kụ ạ Pọl ạḅilhe arom Timoti ọghi ịnhon arookpomhoghan ọkparamhi abumor phọ.

Ạ Pọl ạḅenhi ni Timoti mọ: ‘Kọgbiphoghom ni tọrobo oye dị rạwa okumu a Jehova.’ Kụ ụgbiphoghom ni Timoti kụ ọḅilhe ọlhogh ikoli loor esi omheeraam mọ ọdi. Kụolo olhoghi ọdi ạḅaal li ọmhoogh eepoogh oḍeenhaan mọ ọdi ạḅar ri a Jehova.

Ạ Pọl ạḅenhi ni bumor phọ ọrol bọ ẹpe Filipạị mọ: ‘Mị marom Timoti dị katu ịteeny inyinha. Ọdi kịtughemhi ni inyinha ịyaar dị rẹma ghan oḍighi ẹbenhe a Jehova. Kụ ạḅilhe ịtughemhi inyinha ịlo ọghaaph iiḅi ịinhaghan phọ.’ Ạ Pọl ạmhiin ni mọ ọdi katue ni aḍuom olhoghi Timoti. Esi ịduon phọ, ịyal phọ ạbidi uḍigh ni rịghiri kụ ọḅilhe ọghaaph ghan iiḅi ịinhaghan phọ esi ịbadi ạsia.