Ụsighe Pọl Ọghi Rom

Ạ Pọl ạghi bọ ọghaaph iiḅi ịinhaghan phọ omhunhenhiom ịraar amem mọ ẹpe Jeruselem, usiph ni nyọdi ọlhogh ikoli. Ḍughul phọ ạḍiphe phọ otelhedom mọ Pọl ạmhiin ni uḍien. Sịphe uḍien phọ a Jizọs ạḅenhi nyọdi mọ: ‘Nạ kạki ni Rom ạkaaph iiḅi ịinhaghan phọ.’ Ụsighe ni Pọl ọghimom Sịsạriạ, kụ ọlhogh ikoli ẹpe phọ esi ịyal ạsia. Mem dị ọmheremhi nyọdi ghisigh Opoghom dị oghol mọ Fẹstọs, ạ Pọl ạḅem mọ: ‘Mị rạwa mọ a Siza kụ asoph ọoruen ụngo ịmhi.’ Ạ Fẹstọs ạḅenhi nyọdi mọ: ‘Nạ mạḅem bọ mọ nạ rạwa dị a Siza kụ kasoph ọoruen ạngo nyịnha, pọ nạ kạki ni ka Siza.’ Ụsighe ni Pọl ọsaany ụnwunyaru dị rạki Rom, kụ ịyal abumor dị oghol mọ Luk rạ Ạrịstạkọs ọdaph nyọdi.

Mem dị bịdi rọki Rom, ọgbagara oghim ạaḅaghamhi ni bịdi esi ịbadi asiḍughul otu dị tụtu awe phọ ọotughian ghan mọ bụno komugh ni. Ạ Pọl ạḅenhi ni bịdi mọ: ‘We phọ, dị eego esi ạmalha, ọokpaany Ẹnhaan ụḅenhi ni ịmhi mọ: “Kạ́moogh oghiilhaan Pọl, nạ kasi ni Rom. Kụ oomo awe phọ oḍigh aani bọ ụnwunyaru phọ kosi aani ni.” Esi ịduon phọ ịkpo oḅio, r’oye kámugh.’

Oghim mọ aghim ni esi 14 aḍughul otu. Kụ eekunha phọ bịdi ọmhiin ekpu ogbo dị oghol mọ Mạltạ. Ụnwunyaru phọ ạwoghoronhu ni, kụolo 276 awe phọ oḍigh bọ usi ni ạnyu ade. Buniin ạbidi ụmhughi ni, kụ abuniin ọokpaphagh ipoḍi ireeny phọ ọkaam bọ ụnwunyaru phọ. Awe phọ ạ Mạltạ ụkpoonhi ni nịan dị bịdi ọonma kụ ọmhaar ọpham bịdi.

Ịraar ụnwanyu reten bịn awe ẹgham mọ a Rom ọsighe Pọl ọsaany ọnhon ụnwunyaru dị rạki Rom. Mem dị bịdi osi Rom, abumor phọ ụghi ni ọteeny nyọdi. Ạ Pọl ạseph ni a Jehova ịduon abumor phọ ọghi bọ ophogh nyọdi kụ ạkpo oḅio. Ghạlhamo r’ịduon ọnyo ẹgham akori ghan bọ ni nyọdi, umheera ni mọ ọdi ạrol otu dị ọdi arugh. Ọdi ạrol li sịphe phọ ịyal ạsia, kụ awe ụghi ghan ni ophogh nyọdi. Ạ Pọl ạsighe kẹn ni eepoogh phọ ẹpe phọ ạghaaphom ghan ịlo Ọmhar phọ Ẹnhaan r’ịlo a Jizọs ạḅenhi bịdi. Ịsiphe phọ kẹn kụ ẹdi ọdi ạge rịnya ạghiom rookpomhoghan phọ ẹrol bọ Esia Mạịnọ ra Judia. A Jehova ạkar kụ ạsighe Pọl aḍighinhom, pịdi oḍighi iiḅi ịinhaghan phọ ạteeny we areelhe kịrokiro.