Abuọ Anhiạn Kụ Rokaạph Bọ Iiḅi Iinhaghạn Phọ?

Moọny amem, aZihova kasighẹ ni Omhạr phọ odị asiemhiom eekunha oomo iiḅaghamhị ayira. Iinhaghạn phọ iphẹn phọ enighẹ epughạn dị awe ko/naghạn. AZizọs rawạ dị buphẹ rodạph bọ nyodị kogbeelhom dom mọ aḍiẹn phọ oḅenhị torobọ oye! (Matiu 28:19, 20) Ika kụ idị Abugbaanhaạn aZihova rodạph itọ phọ aZizọs?

1. Ika kụ idị ipẹ ogẹ bọ siphẹ Matiu 24:14 remunhughan rodon?

AZizọs aḅẹm mọ: “ooḅi oghaạph omạr phọ k’Enaạn phọ ophọn kokaạph ni oleenye oomo aḅirini phọ.” (Matiu 24:14) Abugbaanhaạn aZihova oḅaạl li olhoghi roḍighi oḍighi phọ ophọn phọ. Yira rogbeelhom ni iiḅi iinhaghạn phọ runhụ dị epel li 1,000! Emoghi ni muboom amem, inyaạm ḅilhẹ r’omhaạr odeeghị araraạr orue oḍighi oḍighi phọ ophọn phọ. Ko/tue oḍighi oḍighi phọ ophọn phọ dị aZihova u/lọgh ḍighaạgh.

2. Eeghe ikuph kụ edị yira rolọgh ghan orue oghaạph iiḅi iinhaghạn phọ?

Yira rokị ghan torobọ ekpisi lọ yira komiịn we okaaphạn. Idiphọ aKristẹn oḅẹl okuruon asiạ phọ, yira rokị ghan “iloghi aruutu awe phọ.” (Iiḍighi 5:42) Eten oḍighi phọ ephẹn phọ rilhoghonhaạn ghan iyira ḍighaạgh oteẹny irubal awe torobọ alhạ. Yira oḅilhẹ kẹn ni rokaạph ghan iiḅi iinhaghạn phọ esi ogbo, loor esi dị k/oomo amem kụ edị awe rotọl ghan ilhoghi aruutu. Yira rowạ ghan torobọ eepoogh oghaạph ilọ aZihova r’arigbiom mọ odị oḅenhị abunhọn.

3. Ongọ buọ anhiạn oḍighi oghaạph iiḅi iinhaghạn phọ?

Torobọ ogey onyọ aKristẹn amoọgh dool oḅenhị aani abunhọn iiḅi iinhaghạn phọ. Yira omaghamhị ni maạr oḍighi phọ ungọ bọ iyira. Yira roḍighi ghan oomo ipẹ yira kotue bọ oghaạph iiḅi iinhaghạn phọ loor esi dị ketue ni epẹl sighuḍum awe. (Ibạl 1 Timoti 4:16.) Iyira ru/kpẹ ghan ikpoki oḍighi oḍighi phọ, loor esi dị aBaibul phọ aḅẹm mọ: “Ingọ inyinha oopho, ingọ aani bunhọn oopho.” (Matiu 10:7, 8, NWT) K/oomo awe kụ ronaghạn ghan dom mọ ayira. Kuolọ yira okiọm ni ghisigh rokaạph ghan loor esi dị eḍighi pakirị iiseeny phọ ayira ḅilhẹ kẹn reḅaalhamhị ghan olhoghi aZihova.

OLHEGHERI OBUGHẸ

4. Yira rolọgh ghan ikuph oteẹny awe

AVIDIO: Ogbeelom ghan “Arikpisi Dị Ekẹl li Iboom Siẹn Ade Phọ” (7:33)

• Nạ amiịn aani ika inyaạm mọ Abugbaanhaạn aZihova rolọgh ghan bọ oghaạph iiḅi iinhaghạn phọ?

Ibạl Matiu 22:39 r’aRom 10:13-15, kụ eeḅeghiọn sipuru phọ iphẹn:

• Ika kụ idị oghaạph iiḅi iinhaghạn phọ aḍeenhaan mọ yira opomhoghiạn ni matuman ayira?

• AZihova amiịn ika buphẹ rokaạph ghan bọ iiḅi iinhaghạn phọ?—Miịn ekpịgh phọ 15.

5. Yira oḅọph oḍighi rokumu kongọ Enhaạn

Ibadị araraạr dị emiteghu eḍeenhaan ni mọ aZihova kụ raaḅakị oḍighi phọ ayira. Esi omaạm, epẹ New Zealand onyọ umor dị oghol mọ Paul aazuanhaan ni oniin anhịr epẹ erugh phọ ootaany. Ḍiroọr aḍio phọ aḍiphẹ phọ, anhịr phọ maghol ḍien Enhaạn, Zihova, aaḅereghị alọm mọ oye aghị ateẹny nyinhọ. APaul aḅẹm mọ “iraạr awạ reten, bịn mị asi onhụ aḍibuo odị.”

Ibạl 1 Korịnt 3:9, kụ eeḅeghiọn ḍipuru phọ aḍiẹn:

• Ika kụ idị ipẹ emite bọ epẹ New Zealand eḍeenhaan mọ aZihova kụ raaḅakị ni oḍighi oghaạph iiḅi iinhaghạn phọ?

Ibạl Iiḍighi 1:8, kụ eeḅeghiọn ḍipuru phọ aḍiẹn:

• Uḍighi ika kụ yira owạ bọ olhoghonhaạn aḍighaạgh aZihova orue oḍighi oḍighi phọ ungọ bọ iyira?

Nạ alegheri ni?

Torobọ awiki, siphẹ ituughạ ogbo awiki phọ, rungọ ghan ni iyira iromhoghiom ilọ oghaạph iiḅi iinhaghạn phọ. Eḍighi maạr dị nạ maghị aani ghan ni ituughạ phọ iphẹn phọ, nạ amiịn aani ika itughemhị phọ?

6. Yira rodaphạn ghan itọ phọ Enhaạn oghaạph iiḅi iinhaghạn phọ

Siphẹ oḅẹl okuruon asiạ phọ, abuọ isophoghom ukparaghạ ni okikima abumatuạn phọ aZizọs dị ko/kaạph iiḅi iinhaghạn phọ. AKristẹn phọ abuphẹ phọ umhaạr ri ogbạ omheremhị oḅilhẹ “okparamiọm ooḅi oghaạph phọ.” (Filipai 1:7) Iniin phọ kẹn kụ edị Abugbaanhaạn aZihova roḍighi ghan rodon.a

AVIDIO: Ogbạ Omheremhiọm Iiḅi Iinhaghạn Phọ (2:28)

Ibạl Iiḍighi 5:27-42, kụ eeḅeghiọn ḍipuru phọ aḍiẹn:

• Uḍighi ika kụ yira ko/bilhẹ bọ oghaạph iiḅi iinhaghạn phọ?—Miịn siikpịgh phọ 29, 38, r’39.

OGHAẠPH OOKARAGH

AZizọs atọ aḅenhị bumatuạn phọ odị mọ oghaạph iiḅi iinhaghạn phọ oomo areelhe. AZihova raloghonhaạn ni we phọ odị ḍighaạgh oḍighi iduọn phọ.

Ooḅula

• Abuọ anhiạn kụ rokaạph bọ iiḅi iinhaghạn phọ siẹn oomo aḅirinhi phọ?

• Ika kụ idị oghaạph iiḅi iinhaghạn phọ aḍeenhaan mọ yira opomhoghiạn ni matuman ayira?

• Nạ ragbi mọ oghaạph iiḅi iinhaghạn phọ katue ni ungọ iyira oḅaạl olhoghi? Eeghe kụ iḍighi?

WAAGHỊ AMHIỊN

Miịn idị Abugbaanhaạn aZihova rokaạph ghan iiḅi iinhaghạn phọ igbogh aramhạ.

Oghaạph Iiḅi Iinhaghạn Phọ Dị Agbatanhaạn Esi Ogbo Epẹ Paris (5:11)

Ika kụ idị Abugbaanhaạn aZihova olhoghonhaạn ḍighaạgh ruuruen?

Ongọ Eḍien Aruwaloor Ruuruen Dị Odi Okoọny Eten Aruwaloor (5:59)

Naghạn iyaạr dị eḍighi idị oniin anhịr aḅẹm mọ okuọm aloor oghaạph iiḅi iinhaghạn phọ kụ ingọ nyodị oḅaạl olhoghi.

Enhighenhaạn Bọ Mị Asaḅạr Bọ Oḍighi Phọ Ophọn Phọ (6:29)

Tuughạ alhegheri iiruẹn dị emhạn maạr dị aruutu iiruẹn osoph, dị melhoghonhaạn ḍighaạgh oḍighi oghaạph iiḅi iinhaghạn phọ.

“Abukaaphọm Omhạr Phọ Usighẹ Ḍighiton Abidị Oghị Otu Iiruẹn” (God’s Kingdom Rules!, emhuoghaạph phọ 13)