Eeghe Kụ Remite Ghan Mem Lọ Oye Amhugh?

Oye ephomhoghiạn anạ mamhugh ghan ni? Eeni mem mọ amuphẹ phọ nạ uutughiạn ni mọ: ‘Eeghe kụ remite ghan mem dị oye amhugh? Yira koḅilhẹ ni omiịn buọ ephomhoghiạn phọ ayira momhuughu bọ ḍughụm?’ Siẹn esi ituughạ phọ ephẹn phọ r’epẹ etum bọ siẹn, yira kooḅeghiọn ophanyanhaạn aBaibul phọ dị kuudereghị iyira.

1. Eeghe kụ remite ghan mem lọ oye amhugh?

AZizọs atomaạm ḍuugh ralhạ. Oye dị ranaanhị ra/legheri ghan idị remite ekool phọ. Eeghe ooghighighạn kụ odi igbo aḍuugh r’aralhạ? Oye dị mamhugh ra/loghoma ghan eephinha. Odị ra/loghoma ghan dọl iginhi loor esi inyaam arighirị r’eghunotu odị. ABaibul phọ aḅẹm mọ: “Buphẹ momhuughu bọ u/legheri mun iyaạr.”—Ibạl Ecclesiastes 9:5.

2. Olhegheri igey phọ ilọ aḍuugh kingọ iyira eeghe asuọ?

Ibadị awe rokiilhaan ghan ḍuugh r’abuphẹ momhuughu bọ! Kuolọ ipẹ aBaibul phọ aghaạph bọ ilọ aḍuugh kiidereghị ni iyira. AZizọs aḅẹm mọ: “Igey phọ kụ kiphẹl inyinha.” (Jọn 8:32, NWT) Dị egbạgh r’idị iniin aruukụ iiḅereghị rekaạph ghan, aBaibul phọ atughemhị mọ oye o/mhoọgh uwaloor dị ra/mugh ghan mem dị oye phọ amhugh. Esi iduọn phọ, oye dị mamhugh ra/miinhọm ghan. Eḍighi bọ edị buphẹ momhuughu bọ u/legheri mun bọ iyaạr, bidị ko/tue uḍighi iyira ikarạph. Esi iduọn phọ i/wạ dị yira kooḅereghị buẹn phọ obobọ oḍighi yogh raraạr ophoomhị ighạgh ilhoghi abidị.

Abuniin awe oḅẹm mọ bunọ kotue ni oḅaanhaạn we dị momhuughu. Kuolọ iphẹn phọ ke/tue emite. Iduọn purukụ yira otuughạ bọ ni, buphẹ “momhuughu bọ u/legheri mun iyaạr.” Buphẹ ootughiạn bọ mọ bunọ roḅaanhaạn ghan we ephomhoghiạn abidị dị momhuughu, eten dị u/legheri roḅaanhaạn ghan ikarạph aruwaloor dị okue roḅo ghan mudị bidị awe dị momhuughu. Esi iduọn phọ, olhegheri igey phọ ilọ aḍuugh righoph ghan iyira kesighẹ esi ikarạph aruwaloor phọ. AZihova uphụr iyira rurụ mọ owilhẹ oghị oḅaanhaạn awe dị momhuughu loor esi dị alegheri mọ ooḍikuan r’ikarạph aruwaloor phọ kingọ iyira iiḅaghamhị.—Ibạl Deuteronomy 18:10-12.

3. Ooḅeghiọn igey phọ ilọ adọl abuphẹ momhuughu bọ

Siẹn oomo aḅirinhi phọ, awe omeeraam ni kirokirọ araraạr ilọ ipẹ remite ghan bọ mem dị oye amhugh. Kuolọ yira olegheri ni mọ k/oomo ipẹ awe phọ omheeraam bọ kụ inẹ.

• Epẹ ekool phọ anyinha, awe omeeraam mọ buphẹ momhuughu bọ odi eeghe adọl?

AVIDIO: Buphẹ Momhuughu Bọ Odi Eeghe Adọl?—Ookpera phọ (1:19)

Ibạl Ecclesiastes 3:20, kụ eeḅeghiọn sipuru phọ iphẹn:

• Odaphạn ekpịgh phọ ephẹn phọ, eeghe kụ remite ghan mem dị oye amhugh?

• Apakirị aloor oye edi ni dị re/mugh ghan ḍughụm?

ABaibul phọ akaạph ni ilọ aḍuugh ogbogh oyaghirị aZizọs dị oghol mọ Lazarọs. Iduọn nạ rabạl bọ Jọn 11:11-14, lọgh elhegh idị aZizọs aghaạph ilọ adọl phọ aLazarọs arọl bọ. Kụ eeḅeghiọn sipuru phọ iphẹn:

• AZizọs atomaạm ḍuugh eeghe?

• Iyaạr phọ aZizọs atomaạm bọ ḍuugh itughemhị iyira eeghe ilọ adọl abuphẹ momhuughu bọ?

• Nạ amiịn aani ika ipẹ aBaibul phọ aghaạph bọ ilọ aḍuugh?

4. Olhegheri igey phọ ilọ aḍuugh ringọ ghan iyira suọ

Olhegheri igey phọ ilọ aḍuugh ritagharạn ghan iyira kesighẹ esi oghiilhaan abuphẹ momhuughu bọ. Ibạl Ecclesiastes 9:10, kụ eeḅeghiọn ḍipuru phọ aḍiẹn:

• Abuphẹ momhuughu bọ kotue ni uḍighi iyira iyaạr?

Igey aBaibul phọ eḅilhẹ righoph ghan iyira kesighẹ esi omheeraam mọ ewạ ni ooḅereghị obobọ oḍighi yogh araraạr ophoomhị ighạgh ilhoghi abuphẹ momhuughu bọ. Ibạl Isaiah 8:19 r’Ogananami 4:11, kụ eeḅeghiọn ḍipuru phọ aḍiẹn:

• Nạ aatughiạn mọ aZihova amiịn ika oye dị rakị ghan owạ olhoghonhaạn aḍighaạgh awe dị momhuughu?

5. Igey phọ ilọ abuphẹ momhuughu bọ repoomhị ghan ni oḅio ayira

Motughemhị ibadị mọ mem dị bidị omhugh, kokol li ikarạph araraạr dị bidị oḍighi yogh omiinhẹ bidị. Kuolọ eḍighi ni iyaạr iidereghị olhegheri mọ ko/miinhẹ oye mem dị amhugh—ghalhamọ r’oye dị aḍighi yogh ghan ni raraạr dị eeph ni iboom. Ibạl Rom 6:7, kụ eeḅeghiọn ḍipuru phọ aḍiẹn:

• ABaibul phọ atughemhị mọ oye dị amhugh makpẹ iikpiạ ikarạph odị, esi iduọn phọ nạ ragbi mọ kokol li ikarạph dị oye aḍighi ghan omiinhẹ oye phọ mem dị mamhugh?

Iduọn yira okuamhị bọ rolegheri aZihova, iduọn kụ idị yira kokuamhị okuphom owol mọ odị ka/miinhẹ we dị momhuughu. Ibạl Deuteronomy 32:4 r’1 Jọn 4:8, kụ eeḅeghiọn sipuru phọ iphẹn:

• Nạ ragbi mọ Enhaạn phọ amhoọgh bọ raagharạ phọ ogoolhạ bọ siẹn asiikpịgh phọ iphẹn phọ kameera ni mọ omhiinhẹ oye dị mamhugh?

• Olhoghi anạ apọ ni siẹn nạ malhegheri bọ igey phọ ilọ abuphẹ momhuughu bọ? Eeghe kụ iḍighi?

OGHAẠPH OOKARAGH

Mem dị oye amhugh, ra/legheri ghan mun iyaạr. Abuphẹ momhuughu bọ ro/miinhọm ghan kụ bidị ko/tue uḍighi iyira iyaạr.

Ooḅula

• Eeghe kụ remite ghan mem dị oye amhugh?

• Olhegheri igey phọ ilọ aḍuugh kingọ iyira eeghe asuọ?

• Ika kụ idị igey phọ ilọ abuphẹ momhuughu bọ repoomhị ghan oḅio ayira?

WAAGHỊ AMHIỊN

Miịn emhụ ekpo-onhụ phọ ogbạ bọ mọ “uwaloor” siphẹ aBaibul phọ.

“Uwaloor Phọ P’eeghe?” (Edi intanẹt)

Miịn mughumọ ahẹl aḍighi ni esi dị Enhaạn raliọm ghan buọ asipioghọm.

AHẹl Aḍighi Ni Esi Dị Romiinhẹ Ghan We Ḍughụm? (3:07)

Ewạ ni mọ oghiilhaan buphẹ momhuughu bọ?

Aruwaloor Abuphẹ Momhuughu Bọ—Ketue Ni Elhoghonhaạn Nyinhạ Ḍighaạgh Obobọ Eḍighi Nyinhạ Iyaạr? Bidị Ekạr Ri Edi Ghan? (abrosọ)

Miịn idị oniin oye amhoọgh iidereghị mem dị alhegheri igey phọ ilọ iyaạr dị remite ghan mem dị oye amhugh.

“Ophanyanhaạn ABaibul Phọ Akạr Kụ Uḅeraạn Imhị” (The Watchtower, February 1, 2015)