ESI ITUUGHẠ PHỌ 32

Omhạr Phọ K’Enhaạn Mamhiigh Itooghị!

Printed Edition

Omhạr phọ k’Enhaạn amhiigh itooghị epẹ k’akẹ lhạ phọ 1914. Opọ kẹn kụ amem dị eekunha asiḍio itooghị omhạr awe emhiigh. Yira ulhegheri ika? Ooḅeghiọn idị aBaibul phọ aghaạph ilọ asidọl r’aroozọ awe emhiigh 1914.

1. ABaibul phọ akaạph eeghe?

Aḍinyạ phọ aDaniel iḍeenhaan mọ Omhạr phọ k’Enhaạn kamiigh itooghị eekunha amem dị oghol mọ “oḍual asiạ.” (Daniel 4:16, 17) Ibadị asiạ reten, aZizọs aghaạph aghol mem mọ opọ phọ mọ ‘amem mọ omaanhaạn bọ reelhe phọ,’ kụ aḅilhẹ aḅarạm mọ amem mọ k”esi eekunha. (Luk 21:24) Iduọn yira komiịn bọ ni, oḍual asiạ phọ imunhughan lhạ phọ 1914.

2. Ighẹn asidọl r’aroozọ kụ imhiigh oganhanha emhiigh lhạ phọ 1914?

Abumatuạn phọ aZizọs upuru ni nyodị mọ: “Eeghe kụ kemite oḍeenaan mọ meteẹny mem mọ nạ katu bọ eekuna aḅirini phọ?” (Matiu 24:3) AZizọs aphagharanhaạn ni bidị kụ aghaạph raraạr dị kemite mem mọ odị kamiigh bọ itooghị siphẹ Omhạr phọ k’Enhaạn, epẹ k’akẹ. Iniin araraạr phọ iphẹn phọ pọ araaghạm, igbakurọ, r’ophiigha arere. (Ibạl Matiu 24:7.) ABaibul phọ aḅilhẹ kẹn ni akaạph mọ aroozọ awe mem “aruukuna phọ” kelọgh ni sighuḍum awe esi “ooto r’osooromineen.” (2 Timoti 3:1-5) Yira ukạr omhiigh omhiịn asidọl r’aroozọ phọ iphẹn phọ lhạ phọ 1914.

3. Uḍighi ika kụ asidọl phọ melhoghorị bọ emhiigh k’amem mọ Omhạr phọ k’Enhaạn amhiigh bọ itooghị?

AZizọs roḍighi bọ Otooghiạ Omhạr phọ k’Enhaạn, i/bia bịn odị eenhan Setan r’ikarạph aruwaloor phọ. Ukpạr ri opu Setan. ABaibul phọ aḅẹm ni mọ ‘uroph nyodị r’oomo aruukpaạny phọ odị osiemi ude.’ (Ogananami 12:9,10, 12) ASetan amoọgh iboom ighạgh ilhoghi loor esi dị alegheri mọ meteẹny dị kopiemhi nyodị. Loor iduọn phọ odị rakọm ghan riiphinha r’imhinhimhiịn siẹn ade phọ. Iikia i/lo asidọl aḅirinhi phọ ebeeph bọ iduọn phọ! Omhạr phọ k’Enhaạn kaḍighi ni idị araraạr keḅilhẹ enighẹ.

OLHEGHERI OBUGHẸ

Ooḅeghiọn ipẹ yira olhegheri bọ mọ Omhạr phọ k’Enhaạn amhiigh itooghị lhạ phọ 1914 r’idị iphẹn phọ kitir iyira.

4. Imiịn aBaibul eḍeenhaan mọ Omhạr phọ amhiigh itooghị lhạ phọ 1914

Ipegh VIDIO phọ.

AVIDIO: Omhạr Phọ K’Enhaạn Amhiigh Itooghị 1914 (5:02)

Enhaạn aḍighi idị Uw-emhạ phọ Nebuchadnezzar kamalhạ malhạ epẹ Babilọn. Amalhạ phọ r’ipẹ aDaniel agbạ bọ eḍeenhaan mọ amalhạ phọ aghaạph ghan ilọ itooghị phọ aNebuchadnezzar r’Omhạr phọ k’Enhaạn.—Ibạl Daniel 4:17.a

Ibạl Daniel 4:20-26, kụ esighẹ igbe phọ ephanyanhaạm sipuru phọ edaphạn bọ siẹn:

(A) ANebuchadnezzar amalhạ amhiịn eeghe?—Miịn ekpịgh phọ 20 r’21.
(B) Eeghe kụ kemitenhaan oreeny phọ?—Miịn ekpịgh phọ 23.
(C) Eeghe kụ kemite mem dị “oḍual asiạ” phọ esi eekunha?—Miịn ekpịgh phọ 26.

Idị Amalhạ Oreeny Phọ Agbolhomaam Omhạr Phọ K’Enhaạn

IMIỊN PHỌ (Daniel 4:20-36)

Itooghị phọ

(A) Ogbogh oreeny

Usophoghom itooghị phọ

(B) “Ler oreeny phọ,” kụ awilhẹ “oḍual asiạ eten”

Egisi oreeny dị olhọgh amamạ okuron r’ogiatạ.

Uḅulhemhi itooghị phọ

(C) “Itooghị phọ anạ keḅilhẹ ni eḍighi ilọ anạ”

Siphẹ oḅẹl omhunhughan imiịn phọ iphẹn phọ . . .

(D) Oreeny phọ amheerạ esi anhiạn?—Miịn ekpịgh phọ 22.
(E) Usophoghom ika itooghị phọ odị?—Ibạl Daniel 4:29-33.
(F) Eeghe kụ imitenhaan aNebuchadnezzar siphẹ eekunha “oḍual asiạ” phọ?—Ibạl Daniel 4:34-36.

EḄẸL AMEM DỊ IMIỊN PHỌ EMHUNHUGHAN

Itooghị phọ

(D) Nebuchadnezzar, Uw-emhạ phọ aBabilọn

Uw-emhạ phọ Nebuchadnezzar ameerạ r’ophoophe aloor.

Usophoghom itooghị phọ

(E) Reten 606 B.C.E., aNebuchadnezzar aḍigh ni elhaạl bịn o/tooghị mun esi oḍual asiạ

ANebuchadnezzar aminhạ ude rataạl ghan rooghọ idiphọ enhạm.

Uḅulhemhi itooghị phọ

(F) Elhaạl phọ aNebuchadnezzar iḍuạ ni kụ aḅilhẹ amhiigh otooghị

Uw-emhạ phọ Nebuchadnezzar apoophe raghaạgh odị rapogh ghan epẹ k’akẹ.

Siphẹ omhunhenhiom iyạl omhunhughan imiịn phọ iphẹn phọ . . .

(G) Oreeny phọ amheerạ esi anhiạn?—Ibạl 1 Chronicles 29:23.
(H) Usophoghom ika itooghị phọ abidị? Yira ulhegheri ika mọ bidị u/miigh kẹn otooghị mem mọ aZizọs arọl bọ siẹn ade phọ?—Ibạl Luk 21:24.
(I) Pụr amem ḅilhẹ eghẹn kụ edị itooghị phọ iphẹn phọ eḅilhẹ emhiigh itooghị?

OMUNHENHIOM IYẠL AMEM DỊ IMIỊN PHỌ EMHUNHUGHAN

Itooghị phọ

(G) Aruw-emhạ Izrạl dị Enhaạn angọ eepoogh otooghị

Aḍikoọl aruw-emhạ Izrạl dị orolhoghọm sigadạ aruw-emhạ, oniin atum nyoniin. Aḍiḅaạl esoorom bidị.

Usophoghom itooghị phọ

(H) Uphiemhi Jeruselem, bịn esophoghom ḍikoọl itooghị aruw-emhạ phọ Izrạl esi 2,520 asiạ

Aniạn dị rele Jeruselem iḍiodi phọ lhạ phọ 607 B.C.E. Kụ 2,520 asiạ eten.

Uḅulhemhi itooghị phọ

(I) AZizọs amhiigh otooghị epẹ k’akẹ idiphọ Otooghiạ Omhạr phọ k’Enhaạn

AZizọs dị arolhọm agadạ odaạm emhạ epẹ k’akẹ atooghị rapoghomhiom de phọ emhiigh lhạ phọ 1914 C.E. Aḍiḅaạl eḍuạ siphẹ odị odi bọ remite.

Oḍual asiạ phọ idoọny esi k’iḍighen?

Iniin apakirị aBaibul phọ rilhoghonhaạn ghan iyira ḍighaạgh onhaghanhạn inhọn apakirị. Esi omaạm, aḍinyạ Ogananami phọ eḅẹm mọ iraạr asiạ r’apakirị eḍighi 1,260 aḍughul otu. (Ogananami 12:6, 14) Iphẹn phọ remạ ghan mọ aḍiniin alhạ siphẹ imiin aBaibul phọ eḍighi 360 aḍughul otu. Esi iduọn phọ “oḍual asiạ” phọ eḍighi 2,520 aḍughul otu. Eeni amem siphẹ aBaibul phọ aḍiniin aḍio remeerạ ghan esi aḍiniin alhạ. (Ezekiel 4:6) Iduọn kẹn kụ idị imiin phọ edi bọ ḍinyạ aDaniel ilọ oḍual asiạ phọ edi aani—emeerạ esi 2,520 asiạ.

5. Aḅirinhi phọ manmia ni emhiigh 1914

Ipegh VIDIO phọ.

AVIDIO: Aḅirinhi Phọ Manmia Ni Emhiigh 1914 (1:10)

AZizọs aghaạph ni idị aḅirinhi phọ katọl mem dị odị aḍighi Uw-emhạ. Ibạl Luk 21:9-11, kụ eeḅeghiọn ḍipuru phọ aḍiẹn:

Ighẹn asidọl kụ edị nạ mamhiịn dị emite obobọ anhaghạn mọ emite?

Otelhedom mọ Pọl aghaạph ni idị awe kozọ mem dị eekunha itooghị awe meteẹny. Ibạl 2 Timoti 3:1-5, kụ eeḅeghiọn ḍipuru phọ aḍiẹn:

Nạ mamhiịn ni dị awe rozọ reten phọ iphẹn phọ rodon?

Asifoto: Asifoto dị reḍeenhaan ghan sidọl aḅirinhi phọ r’aroozọ awe siẹn aruukunha amem mọ. 1. Oḍiemhiom abuọ eghạm ameerạ esi dị ephoph kụ alọ r’aḍighaạgh dị aphoophe. 2. Aruutu dị ophiigha ade maphuẹ. 3. Arughuugh anyụ abuọ eghạm. 4. Adita awe dị olhoghạ mask rotelhe eten. 5. Aniạn dị rele Twin Towers epẹ New York mem dị awe iinian ozuoghom. 6. Oye dị raḍighinhom igbagarạ asirooghọ. 7. Olom dị aḅụgh ḍighaạgh ralooghiọm anhịr odị. 8. Igbagarạ asirooghọ r’arimiim. 9. Iyạl anmanyaạn dị oonmanhian iinmenhian dị eetura mem mọ oḅilhẹ olhoghạ yogh ralạ rosighẹ ghan afoto. 10. Oye dị rapegh ghan suọr esi apati malhọgh ḍuọr dị awe phọ kokẹr. 11. Oniin onyọ e/meera atoph eeku dị aniạn remite ralọgh ekpisi.

6. Ḍeenhaan mọ nạ ameeraam ni mọ Omhạr phọ k’Enhaạn mamhiigh ni itooghị

Ibạl Matiu 24:3, 14, kụ eeḅeghiọn sipuru phọ iphẹn:

Oghẹn oḍighi dị amhạn maạr kụ aḍeenhaan mọ Omhạr phọ k’Enhaạn mamhiigh ni itooghị?
Nạ kapinhom aani ika bin oḍighi phọ ophọn phọ?

Omhạr phọ k’Enhaạn ratooghị ni nyiidiphọ, kụ aḍio phọ kamiigh bọ itooghị siẹn ade phọ metuman. Ibạl Hibru 10:24, 25, kụ eeḅeghiọn ḍipuru phọ aḍiẹn:

Ewạ dị torobọ onyọ ayira kaḍighi eeghe iduọn yira ‘romiịn bọ mọ aḍio Omoọgh-we phọ mekpulhạn’?

Asifoto: 1. Onyanhị dị rotughemhị ghan Baibul akị ituughạ Abugbaanhaạn AZihova. 2. Oniin phọ onyanhị phọ rangọ ghan ogbaanhaạn oye dị odị alhegheri. — Eḍighi maạr dị nạ alhegheri iyaạr dị keloghonhaạn ḍighaạgh kụ eḅilhẹ epẹl ghuḍum abunhọn, nạ kaḍighi ika?

OYE ATUE NI APURU MỌ: “Uḍighi ika kụ Abugbaanhaạn aZihova rokaạph ghan bọ koghol 1914?”

Nạ kaḅẹm mọ eeghe kụ iḍighi?

OGHAẠPH OOKARAGH

Imiịn aBaibul, r’asidọl aḅirinhi phọ emạ ni emiteom mọ Omhạr phọ k’Enhaạn ratooghị ni nyiidiphọ. Yira roḍeenhaan ghan mọ yira omeeraam ni iphẹn phọ esi ogbeelhom ghan ilọ Omhạr phọ r’oḅilhẹ oghị ghan ituughạ.

Ooḅula

Eeghe kụ imite mem mọ oḍual asiạ phọ oghaạph bọ aghol siphẹ aḍinyạ phọ aDaniel esi bọ eekunha?
Uḍighi ika kụ nạ ameeraam bọ mọ Omhạr phọ k’Enhaạn amhiigh itooghị 1914?
Nạ kaḍeenhaan ika mọ nạ ameeraam ni mọ Omhạr phọ ratooghị ni nyiidiphọ?

Utuughạ omhadạn:

Aḍiigbu

Sianhaan oḍighi aani oniin okaaphọm iiḅi iinhaghạn phọ.

Enhọn iyaạr:

Your other goal

WAAGHỊ AMHIỊN

Tuughạ alhegheri idị awe iphirigba r’abunhọn awe oghaạph ilọ ipẹ aḅirinhi phọ ranmeeghian bọ emhiigh 1914.

“Mem Dị Aroozọ Repụ Ghan Bịn” (Awake!, April 2007)

Bạl amhiịn idị imiịn aBaibul phọ edi bọ Matiu 24:14 etir ghuḍum oniin oye.

“Mị Uphomhoghiạn Baseball Apu Enhọn Iyaạr!” (The Watchtower No. 3 2017)

Yira ulhegheri ika mọ imiịn phọ edi bọ Daniel emhụ phọ 4 egbolhomaam Omhạr phọ k’Enhaạn?

“Pụr Amem Kụ Edị Omhạr Phọ K’Enhaạn Amhiigh Itooghị? (Ekpịgh 1)” (The Watchtower, October 1, 2014)

Eeghe kụ iḍeenhaan bọ mọ “oḍual asiạ” phọ oghol bọ siphẹ Daniel emhụ phọ 4 isi eekunha 1914?

“Pụr Amem Kụ Edị Omhạr Phọ K’Enhaạn Amhiigh Itooghị? (Ekpịgh 2)” (The Watchtower, November 1, 2014)

a Miịn iyạl phọ arumhuoghaạph phọ esughanham bọ omhạn siphẹ agạ phọ Waaghị Amhiịn siẹn esi ituughạ phọ ephẹn phọ.