November

Aburudẹ r’aburunhiin kotue ni ologhonhaạn ḍighaạgh ibạm anmụny phọ abidị ookolhobian ophagharanhaạn dị akasiạn bidị. Eeni amem, emhuoghaạph phọ etue ni egbon iiḅaghamhị olom r’anhịr obobọ ilọ aroozọ dị esererẹ r’inhọn, kuolọ ghalhamọ r’iduọn phọ ni bịn, asiikpịgh ketọl li dị eeni ibạm anmụny kotue opagharanhaạn aani. Ḅilhẹ kẹn, loghonhaạn ḍighaạgh ibạm anmụny phọ anạ onhaghanhạn mọ ka/torobọ amem dị bidị ophoophe ḍighaạgh kụ edị komạ bidị. Iphẹn phọ keḍighi idị bidị ko/ḅonyonhu ozuan mem dị omạ aani bunhọn. (1 Tim. 6:18) Oomo ayira kotue ni ookolhobian ophagharanhaạn dị kakuenhi aZihova aḅilhẹ akparamhị bumor r’abumaranhi phọ. (Prov. 25:11) Ghalhamọ r’iduọn eeni amem yira kotue bọ ni okaạph idị imitenhaan iyira, omhiịn ni mọ yira u/ḍeenhaan loor ayira. (Prov. 27:2; 2 Kọr. 10:18) Kparipẹ ghụn, ogbon aZihova, Ekpo Onhụ phọ odị, ḅilhẹ r’awe phọ odị.—Ogan. 4:11. w23.04 24-25 ¶17-18

Ephomhoghiạn emạn ni maạr orue oghiọm aghisigh oomhanham r’ogon ghan. (Mat. 22:37-39) Ephomhoghiạn Enhaạn rilhoghonhaạn ghan iyira ḍighaạgh ogbạ ikpo onhụ phọ r’okparạm, etigheri iiḅaghamhị dị eeni kekọm ingọ iyira. (2 Tim. 1:7, 8) Loor iduọn ephomhoghiạn phọ ayira eḅeẹny bọ eteẹny buphẹ u/ḅọph bọ omheeraam r’ayira, yira okiọm ni ghisigh rokaạph ghan iiḅi iinhaghạn phọ eeni amem dị eego esi afon obobọ ogẹ aḍinyạ. Iyira i/phẹr ogon ghan mọ r’eniin aḍio onyọ amatuman phọ ayira kanmia ni amiigh oḍighi aani ipẹ eru bọ inẹ. (Ezek. 18:27, 28) Ephomhoghiạn amatuman phọ ayira eḅaramaạm ni buẹn r’ayira oḅọph bọ omheeraam mọ. Yira roḍeenhaan ghan ephomhoghiạn phọ ephẹn phọ esi ‘okparamị ghan ologhi oniin, oniin aaneghị ghan nyoniin.’ (1 Tẹs 5:11) Idiphọ awe eghạm dị oḅophoghạn robian mulhọgh ḍien, yira rokparamhị ghan oniin atum nyoniin. Yira ko/tue olegheri kụ oḍighi iyaạr dị kepin esi abumor r’abumaranhi phọ ayira obobọ osighẹ ikarạph okpeọm ikarạph. (1 Tẹs. 5:13, 15) Yira roḍeenhaan ghan kẹn ephomhoghiạn phọ ayira esi olhọgh ghan eegu bumor phọ abuphẹ ropogh bọ ookpomhoghan phọ.—1 Tẹs. 5:12. w23.06 10 ¶6; 11 ¶10-11

Eniin eten dị yira kotue okparamhị omheeraam mọ ayira pọ ogbirima ghan ilọ ekiạ etagharạn phọ. Ekiạ etagharạn phọ ingọ iyira okuphom owol mọ aruguanhaan phọ Enhaạn kemunughan ni. Mem dị yira omhiigha loor okiririom ophogh iyaạr phọ eḍighi bọ kụ ongọ bọ ekiạ etagharạn phọ ḅilhẹ r’ipẹ ewạ bọ omiteom etagharạn phọ, pọ kekparamhị ni omheeraam mọ ayira mọ oguan phọ Enhaạn ilọ aghuḍum k’agee-pọ phọ eeḍiạn aḅirinhi dị anhighẹ katu ni onọ. Uḍighi ika kụ yira koḅẹm bọ iduọn phọ? Iwạ eeghe orue omiteom etagharạn phọ? AZihova arom oḅẹl Oọny phọ odị opọ odị aphomhoghiạn bọ iboom, atuman bọ nyodị, oru isiẹn ade phọ dị komạr idiphọ oye dị amhunhughan. Mem mọ aZizọs arọl bọ siẹn ade phọ, odị asoman ni ḍikparamhinheẹn kirokirọ. Amhiinhọm aḅilhẹ amhugh ḍuugh egbo. P’eeghe iikpiạ dị aZihova akpẹ! Mọ aghuḍum mọ kungọ bọ iyira aḍighi olọ ekulha amem bịn obọ Odẹ ephomhoghiạn phọ ayira mu/meera ooḅi Oọny phọ odị amhiinhọm aḅilhẹ amhugh. (Jọn 3:16; 1 Pit. 1:18, 19) Kụ makpẹ bọ ḍighi dị elheeny idiphọ, aZihova kaḍighi ni idị yira kokelhọm ghuḍum k’agee-pọ siphẹ omhoom aḅirinhi phọ. w23.04 27 ¶8-9

AZihova amoọgh ni eephuạ oḅerion abuphẹ momhuughu bọ ḍughụm? Dị iikia i/lo, odị amoọgh ni. Odị aphum ni ibadị awe ogẹ olhọgh isiphẹ aBaibul phọ oguanhaan oḅetenhu esi aḍuugh phọ kamite bọ ghisigh. (Isa. 26:19; Ogan. 20:11-13) Kụ aZihova aguan iyaạr, ratuụgh ghan bịn kaḍighi. (Josh. 23:14) Okạr agey, aZihova anyạ ni oḅilhẹ ongọ aghuḍum buphẹ momhuughu bọ. Ooḅeghiọn ikpo onhụ oye k’Enhaạn phọ Job. Odị akuphom ni owol mọ ghalhamọ odị amhugh ni, mọ aZihova amoọgh ni eephuạ oḅilhẹ ongọ odị ghuḍum. (Job 14:14, 15, igẹ dị edi ude) AZihova amoọgh aani ni eephuạ phọ ephẹn phọ akị esi oomo arebenhẹ phọ odị momhuughu bọ. Odị akạr amoọgh ikpukpụ oḅilhẹ ongọ abidị ghuḍum, omhoon aloor, ḅilhẹ r’oḅaạl olhoghi. Kokaạph aani ika ilọ abuphẹ u/moọgh aani bọ eepoogh otuughạ ilọ aZihova kụ ogbi bọ omhugh phọ? Enhaạn ephomhoghiạn phọ ayira rawạ kẹn ni oḅerion aani abidị. (Iiḍ. 24:15) Odị rawạ ongọ aani abidị eepoogh oḍighi arighirị odị kụ orọl k’agee-pọ siẹn ade phọ.—Jọn 3:16. w23.04 9 ¶5-6

Nạ kakparamhị ika oḍuomolhoghi phọ anạ? Eḍighi maạr dị nạ amhoọgh oḍuomolhoghi orọl isiẹn ade phọ k’agee-pọ, pọ bạl aḅilhẹ agbirima ipẹ aBaibul phọ aghaạph bọ ilọ aParadais. (Isa. 25:8; 32:16-18) Gbirima ilọ ipẹ aghuḍum katọl bọ siphẹ omhoom aḅirinhi phọ. Kụ amhiịn ghan loor anạ siphẹ phọ. Eḍighi maạr dị yira oghoroghiọm olhoghi ayira oḍuomolhoghi omhoom aḅirinhi phọ, iiḅaghamhị phọ ayira keḍighi elọ “ekulha amem mọ amuẹn phọ” bịn. (2 Kọr. 4:17) Dị eego esi oḍuomolhoghi phọ aZihova mangọ bọ nyinhạ nạ katue ni akparạm. AZihova mamiteom ni raraạr phọ ipẹ nạ amhoghi bọ orue omhoọgh inyaạm. Esi iduọn phọ, mem dị nạ amhoghi olhoghonhaạn aḍighaạgh orue oḍighi oḍighi dị ongọ nyinhạ, okparạm iiḅaghamhị, obobọ ophamhanhạm ibo phọ anạ, pọ kuuku ekpom mọ anạ angọ aZihova esi iiḅereghị aḅilhẹ awạ iiḅakiọm odị esi ituughạ aBaibul ogina anạ. Sighẹ olhoghonhaạn aḍighaạgh abumor r’abumaranhi phọ anạ. Gbirima ghan ilọ oḍuomolhoghi phọ anạ. Bịn “Enaạn [kengọ ni nyinạ] inyaạm dị eelenyan oomo igbogh iikpọ phọ odị, obọ [nạ amanạm] osighẹ oḅaạl ologhi kụ orolọm adọl okparạm ghan amem iminimiịn.”—Kọl. 1:11. w23.10 17 ¶19-20

Yira omoọgh ni ibadị ariphigh otuạn oḅenhị aZihova mọ maḍighi siphẹ iiḅereghị phọ ayira. Yira kotue ni osẹph nyodị esi imạ araraạr phọ yira omhoọgh bọ, idị eḍighi bọ torobọ iyaạr dị yira omhoọgh odị kungọ iyira. (Jems 1:17) Esi omaạm, yira kotue ni okol enhighẹ ade phọ ḅilhẹ r’imạ araraạr phọ odị alhẹm bọ osẹph nyodị. Yira kotue kẹn ni okol emhụ aghuḍum mọ ayira, eghunotu phọ ayira, righirị ayira, ḅilhẹ r’oḍuom olhoghi phọ ayira osẹph nyodị. Ḅilhẹ kẹn yira rosẹph ghan ni aZihova loor asiya arighirị phọ ayira r’odị. Kewạ ni dị yira kolọgh ikuph dị egbatanhaạn ootughiạn ilọ ariphigh phọ yira r’aloor omhoọgh bọ osẹph aZihova. Yira odi aḅirinhi dị ibadị u/legheri iiḅi. Awe rogbon ghan ilọ bidị rowạ kparipẹ r’osereghiạn ipẹ bidị momhoọgh bọ. Eḍighi maạr dị yira momhiigh romoọgh eegharạ phọ epẹ phọ, pọ iiḅereghị phọ ayira kedighi ghan ilọm bịn. Omhiịn mọ ipẹ phọ i/mite, pọ kewạ mọ yira oghị ghisigh ozụph kụ oḅilhẹ oḍeenhaan ghan osereghiạn ilọ araraạr phọ aZihova muḍighinhaan bọ iyira.—Luk 6:45. w23.05 4 ¶8-9

Idiphọ Odẹ ephomhoghiạn ayira, olhoghi aZihova ra/ḅaạl ghan omhiịn dị yira romiinhọm. (Isa. 63:9) Kuolọ, odị ra/sophoghom ghan oomo iiḅaghamhị dị retu omheelhom ayira. (Isa. 43:2) Toroboiperolbọ, odị aguanhaan ni olhoghonhaạn ayira ḍighaạgh orelhe “oḅeẹny.” Kụ etigheri odẹgh ophogh phọ, odị ka/meera mọ eḍighi idị yira ko/tue okumu nyodị. AZihova rungọ ghan kẹn iyira uwaloor iigbia phọ odị orue okparạm. (Luk 11:13; Fil. 4:13) Esi iduọn phọ, yira otue ni okuphom owol mọ odị kungọ ni iyira torobọ iyaạr dị yira omhoghi orue okparạm r’oḅilhẹ ophạm aḍimheerạ phọ ayira. AZihova rawạ mọ oḍuom nyodị olhoghi. (Hib. 11:6) Eeni amem, yira otue ni ootughiạn mọ odẹgh ophogh phọ upel iyira loor. Eeni yira otue ni ookia mughumọ aZihova kulhoghonhaạn ni iyira ḍighaạgh. Kuolọ aBaibul phọ aguanhaan mọ r’olhoghonhaạn aḍighaạgh Enhaạn yira kotue ni “opel iikpe oten.” (Ps. 18:29) Esi iduọn phọ, kparipẹ r’omhoọgh iikia, ooḅereghị r’omheeraam kụ okuphom owol mọ aZihova kanaghạn ni iiḅereghị phọ ayira.—Jems 1:6, 7. w23.11 22 ¶8-9

P’eeghe emạ eten ogbạ egey ephomhoghiạn! Ikpo onhụ phọ iphẹn phọ ekạr kụ rekparamhị ghan burulom r’anmariịr: Oniin katue ni amoọgh ephomhoghiạn dị re/minheen ghan akị esi ophoriphọ. Olom r’anhịr omoghi ni olhọgh inyaạm orue ophamhanhạm ephomhoghiạn siphẹ apinien phọ abidị. Esi omaaniọm, aniạn dị oghị ghisigh rokpoonhị ghan re/ḍim ghan. Kuolọ eḍighi maạr dị u/kpoonhị, pọ moọny amem keḍim ni. Iniin phọ kẹn, kụ edị ephomhoghiạn phọ edi bọ igbo olom r’anhịr kekị ghan ghisigh eemor eḍighi maạr dị bidị olhọgh ikuph—okparamhị ephomhoghiạn phọ abidị. Eeni amem, olom r’anhịr otue ni ologhoma mọ ephomhoghiạn phọ abidị reephoọm, ekạr ekpaariọm mem dị bidị rosoman igbagarạ asidọl idiphọ iiḅaghamhị ikpoki, e/moon obobọ ooḅaghamiạn aloor phọ odi ghan bọ ookonhom ibạm anmụny. Orue okparamhị ephomhoghiạn phọ abidị, ewạ dị olom r’anhịr koḍighi oomo ipẹ bidị kotue bọ okparamhị asiya phọ abidị r’aZihova. w23.05 20-21 ¶1-3

Orue omhoọgh akpọ oḅio, yira koḍighi eeghe? Akpọ oḅio phọ o/ḍighi iyaạr dị yira kotue ole erua ḍighaạgh odẹ r’onhiin, eeye, bidị ko/tue ungọ iyira akpọ oḅio. Kotue ni osighẹ omhoọgh akpọ oḅio otomaạm otuughạ aḍighalhanyạ. Eniin eten dị oye katue atophomhi ḍighalhanyạ oye phọ pọ okiririom ophogh ipẹ otughemhiạ phọ raḍighi bọ kụ otuughaạny eḍeenhaan phọ odị. Eniin phọ eten phọ kẹn, yira kotue ni otuughạ ilọ omhoọgh akpọ oḅio esi omhiigha aloor ophogh ghan idị abunhọn roḍeenhaan eegharạ phọ epẹ phọ kụ otuughaạny eḍeenhaan phọ abidị. Idiphọ aDaniel, ewạ dị yira kolegheri okuphom owol Ekpo Onhụ phọ Enhaạn. Yira kotue ni okparamhị siya phọ ayira r’odị esi ogbor ghan ooḅereghị. Ḅilhẹ kẹn, emoghi dị yira koḍuom olhoghi aZihova, kụ okuphom owol mọ odị kubakị ni iyira. Bịn yira kokị ni ghisigh okpọ oḅio, mem dị yira osoman odẹgh ophogh. Awe rolọgh ghan ni eegu oye dị amhoọgh akpọ oḅio. Kụ renyu ghan we kẹn oru olhegheri ilọ aZihova obughẹ. Okạr agey, yira omoọgh ni ibadị ariphigh otuạn omhoọgh akpọ oḅio. w23.08 2 ¶2; 4 ¶8-9

Ekpo onhụ aGrik phọ ogbạ bọ mọ ‘ooḅeghiọn ghan ophogh’ usighẹ ghan oḍighinhom mem dị ozuumaam ropogh ikpoki dị edighi igey r’idị i/ḍighi igey. Esi iduọn phọ, emoghi ni dị yira kooḅeghiọn ghan ipẹ yira onhaghạn bọ oḅilhẹ aạl omhiịn mughumọ igey ni. Iphẹn phọ ekạr ikpaariọm iyira phọ odi bọ siḍio aruukunha phọ oḍighi ipẹ phọ obughẹ. Kparipẹ r’omheeraam ghan atorobọ iyaạr dị yira onhaghạn, yira kosighẹ ghan ipẹ yira onhaghạn bọ otomaạm ipẹ aBaibul phọ ḅilhẹ r’oḍighom mọ aZihova oghaạph aani ilọ ipẹ phọ. Yira oḍighi ghan iduọn phọ, yira ko/meel oḍighanhaan iikelheghian ikarạph aruwaloor phọ. (Prov. 14:15; 1 Tim. 4:1) Yira olegheri ni mọ awe phọ aZihova kokpetenhaan ni igbogh iiḅaghamhị phọ. Kuolọ, onyọ ayira dị alhegheri idị kemitenhaan nyodị ghisigh o/lho. (Jems 4:14) Toroboiperolbọ, mughumọ yira ukpetenhaan igbogh iiḅaghamhị phọ obobọ yira umhugh kụ egbi oteẹny amem mọ amuphẹ phọ, yira komoọgh ni ghuḍum k’agee-pọ eḍighi iyaạr dị yira ophamhanhạm ni ḍimheerạ phọ ayira. Oomo phọ ayira oghị ghisigh ogbon ookiạ oḍuom olhoghi phọ ayira kụ ogon ghan ḍio phọ aZihova! w23.06 13 ¶15-16

Yira u/legheri ipẹ iniin imiịn aBaibul phọ kemunughan bọ. (Dan. 12:8, 9) Kuolọ egbem onhaghạn aḍughụm mọ ayira ilọ ipẹ iniin imiịn aBaibul phọ kemunughan bọ, ke/sophoghom imiịn phọ omhunhughan. Dị iikia i/lo, yira kotue ni okuphom owol mọ aZihova kagananami ni uḍeenhaan iyira torobọ iyaạr dị ewạ mọ yira olhegheri mem mọ opọ ekpeanhaạn bọ, idiphọ odị aḍighi bọ epẹ omhạn. Abutooghiạ aḅirinhi phọ kogbeelhom ni mọ “oomo ariisi mephooghị, ḅilẹ iiḅaghamị i/lo.” (1 Tẹs. 5:3) Kụ iikpọ itooghị oomo aḅirinhi phọ okiton ozuoghom ikarạph aruukụ iiḅereghị kụ opiemhi. (Ogan. 17:16, 17) Kụ ipẹ reten kụ bidị ozuoghom we phọ Enhaạn. (Ezek. 38:18, 19) Araraạr phọ iphẹn phọ kụ ketorori bọ elọgh eghạm mọ Amagedọn. (Ogan. 16:14, 16) Yira kotue ni okuphom owol mọ araraạr phọ iphẹn phọ kemite ni moọny amem. Kuolọ, kụ egbi oteẹny amem mọ amuphẹ phọ, oghị ghisigh oḍeenhaan ghan mọ yira osereghiạn ni Odẹ k’akẹ phọ ayira uphomhoghiạn bọ iyira esi omhiigha aloor otuughạ imiịn aBaibul phọ ḅilhẹ r’olhoghonhaạn abunhọn ḍighaạgh oḍighi aani igina phọ. w23.08 13 ¶19-20

Mem mọ otelhedom mọ aPọl rakaạph bọ ilọ omheeraam, oḍuomolhoghi, ḅilhẹ r’ephomhoghiạn, odị aḅẹm mọ “ephomoghiạn kụ ipu oomo phọ inẹ.” (1 Kọr. 13:13) Uḍighi ika kụ aPọl aghaạph bọ idiphọ phọ? Epẹ ghisigh, yira ko/moghi mun omhoọgh omheeraam oghị esi aruguanhaan omhoom aḅirinhi phọ obobọ oḍuomolhoghi mọ odị kamunhenhi ni ruguanhaan phọ ipẹ phọ. Loor esi dị aruguanhaan phọ memhunughan. Kuolọ yira omoghi oomo amem ophomhoghiạn aZihova r’awe. Okạr oghaạph, ephomhoghiạn phọ ayira kepogh ghan bịn obụgh k’iiḍuul k’iiḍuul. Ḅilhẹ, ephomhoghiạn keḍeenhaan mọ yira abugey aKristẹn. AZizọs aḅenhị butelhedom mọ odị mọ: “Oniin aphomoghiạn ghan nyoniin—kụ oomo awe oIegheriom mọ nyina kụ abumatuạn phọ amị ni.” (Jọn 13:35) Ephomhoghiạn rekparamhị ghan muḅọph phọ ayira. APọl aḅẹm mọ, ephomhoghiạn rengọ ghan “oḅọph onhụ dị amunughan.” ((Kọl. 3:14) Otelhedom mọ aJọn agẹ aghiọm bumor r’abumaranhi phọ mọ: “Oye lọ aphomoghiạn Enaạn aphomoghiạn aani ghan onyọ asiya odị.” (1 Jọn 4:21) Mem dị yira oḍeenhaan ephomhoghiạn oniin atum nyoniin, yira roḍeenhaan ghan Enhaạn ephomhoghiạn. w23.11 8 ¶1, 3

ABaibul phọ atomaạm ghuḍum onyọ aKristẹn eghiil. Onyọ aKristẹn dị aghiil asi epẹ eekunha phọ kụ kamoọgh ghuḍum k’agee-pọ. (2 Tim. 4:7, 8) Ewạ ni dị yira koḍighi oomo ipẹ yira kotue bọ oghị aghisigh oghiil ghan, loor esi dị yira rosi eekunha eghiil phọ. Otelhedom mọ aPọl aghaạph ni ilọ araraạr dị kilhoghonhaạn iyira ḍighaạgh oghiil eghiil phọ ephẹn phọ osi epẹ eekunha phọ kụ omhoọgh iikpiạ phọ. Odị aromha mọ “onyagharanaạn oomo araraạr lọ kiimoromị iyira osereghi . . . kụ obigh ekpom oghiilom eghiiI phọ yira omoọgh bo.” APol aḅẹm ghan mọ onyọ aKristẹn o/mhoọgh r’omhoọgh dool orool ḍughụm? Eeye, pọ kụ ki/yaạr phọ odị aghaạph ghan bọ. Kparipẹ ghụn, odị aḅẹm ghan mọ yira onyagharanhaạn torobọ adool dị i/moghi m’orool. Odọ phọ adool phọ aḍiẹn phọ ridughe ghan iyira keḅilhẹ ikikima iyira oghiil eghiil phọ. Orue okparạm, ewạ mọ oogboronhom olhọgh elhegh kụ oḅilhẹ onyagharanhaạn oroph torobọ iyaạr dị kiphạm iyira eḅulhemhi omhạn. Eniin phọ amem mọ kẹn, ewạ ni dị yira kokiọm ghisigh otool ghan sidool phọ ipẹ emhoghi bọ mọ orool. Yira owilhẹ orool asidool phọ iphẹn phọ, yira ko/tue okiil eghiil phọ agey.—2 Tim. 2:5. w23.08 26 ¶1-2

Oḍeenhaan ghan onhaghanhạn aḍughụm rulhoghonhaạn ghan iyira ḍighaạgh olhọgh eegu ḍiitughiạn abunhọn. Esi omaạm, abuniin abumaranhi eḅeraạn ogbulhayogh arisigh abidị raraạr, kụ abuniin i/ḅeraạn. Abuniin abumor rokelhọm ghan agey ophughọl amugbagarạ amiim dị u/tenhom ni ekụ, kuolọ abuniin osopha mọ bunọ ko/pughọl r’ophughọl. Oomo aKristẹn rowạ ni omhoọgh ogey omhoon aloor, kuolọ osopha areten arookonhom mọ abidị egbaranhaạn ni. Eḍighi maạr dị yira okpaariọm bunhọn siẹn ookpomhoghan phọ odạph aani osopha ayira, pọ yira otue ni oḍighi ḍighiigh okpetaan obobọ okọm madia siẹn ookpomhoghan phọ. Esi omaạm, kparipẹ r’oghol odọ iinmenian dị yira koonmenian ghan, aZihova mungọ iyira ghụn sinhị iilhogh odạph. Ewạ mọ yira oonmenian ghan iinmenian dị kekuenhi Enhaạn, iinmenian dị etuụgh bịn ekasiạn eḅilhẹ esooran. (1 Tim. 2:9, 10) Esi iduọn phọ, i/wạ mọ yira oonmenian ghan iinmenian dị kekọm idị awe komiigh ootughiạn idị yira olheeny obobọ kogbon iitughiạn abidị esi ayira. Asinhị iilhogh aBaibul ketue kẹn eloghonhaạn ḍighaạgh ikumor awe arookpomhoghan dị bidị ko/loghoḍị iilhogh ilọ odọ iinmenian r’eten oselhemhian asilaạl. w23.07 23-24 ¶13-14

AZihova uḍeenhaan iyira ilọ omhoọgh oḅaạl olhoghi epẹ ghisigh. Buphẹ omhegheron bọ ḍimhạgh “elologhi anhịr phọ” rowạ ghan oghelhọm “eedughạ” dị eḍighi elọ ibooghiạn. Iduọn phọ pọ bidị rotelhe “eten aḍuugh.” (Prov. 9:13, 17, 18) P’eeghe idị egbatanhaạn r’abuphẹ omhegheron bọ ḍimhạgh “ogey osụ-olhoghi” phọ! (Prov. 9:1) Yira rotuughạ ghan ophomhoghiạn ipẹ eḅeraạn bọ aZihova kụ oghel ipẹ odị alhọgh bọ ḍien. (Ps. 97:10) Kụ olhoghi ayira aḅaạl li iduọn yira romạgh aani bọ bunhọn omhooghọm aani asuọ “ogey osụ-olhoghi” phọ. Ekịgh mudị yira odi “riisi dị ephoph iboom siphẹ emhạ phọ,” kụ rogbeel ghan mọ: “Itu eḍigh, weye dị iyaạr u/legheri.” Asuọ dị yira r’abuphẹ omhegheron bọ ḍimhạgh phọ komoọgh ka/ḍighi olọ anyiidiphọ bịn, kuolọ katọl li bịn. Ii, odạph “eten olhegheri-iyaạr” phọ kingọ iyira eepoogh ‘orọl’ k’agee-pọ.—Prov. 9:3, 4, 6. w23.06 24 ¶17-18

Nạ raloghoma ghan ika mem dị olọ otu oḍighi obobọ olọ otu askul anạ apuru nyinhạ ḍipuru ilọ omheeraam mọ anạ? Oḅio anạ rakaph ghan ni? Reḍighi ghan ni iduọn phọ ogbogh opol ayira. Kuolọ aḍipuru phọ odị ketue ni eḍighi idị nạ kalegheri ḍiitughiạn r’omheeraam mọ odị, bịn emiteom eepoogh oghaạph iiḅi iinhaghạn phọ oḅenhị odị. Eeni amem oye kapuru ḍipuru loor esi dị rawạ oogbakiạn r’ayira. Ipẹ phọ ki/ḍighi iikia esi ayira, loor esi dị abuniin awe rokaạph ghan ikarạph ilọ omheeraam mọ ayira koḅenhị bidị. (Iiḍ. 28:22) Opumom isiẹn, yira odi siḍio “aruukuna phọ,” mem dị ibadị awe ‘ko/meeraam ghan ilọ oghaạph,’ ḅilhẹ “omoọgh igbagbaar.” (2 Tim. 3:1, 3) Nạ atue ni aakia mọ, ‘Mị kayoghoyoghọ bọ ika aḅilhẹ apoomhị loor mem dị oye raagbakiạn ilọ omheeraam aBaibul phọ amhị?’ Eeghe kụ kelhoghonhaạn nyinhạ ḍighaạgh? Oyoghoyoghọ kelọgh ni ḍighaạgh. Iyaạr re/nuụn ghan kephin esi oye dị ayoghoyoghọ, kuolọ rapamaghạn ghan loor odị mem dị odị u/kạr ulegheri eten ongọ ophagharanhaạn phọ obobọ oḍighi nyodị iyaạr dị repin esi odị. w23.09 14 ¶1-2

Eeni amem rungọ ghan ni iyira iiḅakiọm dị righoph ghan iyira kesighẹ esi ophorogh aruphua ḅilhẹ r’iiḍighi dị kilhọgh iyira esi osoor olhogh Enhaạn. Ii, yira romoọgh ghan ni suọ agey mem dị yira osighẹ oḍighinhom iromhoghiom mọ ipẹ phọ. (Isa. 48:17, 18; 1 Tim. 6:9, 10) Dị iikia i/lo, aZihova kakiọm ni ghisigh asighẹ we dị omheerạ enye odị aḍighinhom ongoọm ghan iiḅakiọm mem igbogh iiḅaghamhị phọ ḅilhẹ r’amem Oniin Oonịr Asiạ Itooghị Phọ aKraist. Yira kokiọm ni ghisigh odaphạn ghan iiḅakiọm mọ odị? Ipẹ yira romegheron ghan bọ koghị esi iiḅakiọm mọ aZihova nyiidiphọ kụ keḍeenhaan. Esi iduọn phọ, oghiọm ghisigh odaphạn ghan iiḅakiọm mọ aZihova, ḅilhẹ r’iiḅakiọm abuphẹ odị amạ bọ ophogh ayira. (Isa. 32:1, 2; Hib. 13:17) Mem dị yira oḍighi iduọn phọ, yira komoọgh ni riphigh oḍuom olhoghi Ogbogh onyọ iiḅakiọm mọ ayira, Zihova, opọ kurelhiom bọ iyira agbolhẹ eten dị kelọgh siya phọ ayira r’odị esi ooto r’osooromineen, kụ yira osi epẹ yira okạr bọ rokị—omhoom aḅirinhi aghuḍum k’agee-pọ. w24.02 25 ¶17-18

Otelhedom mọ aPọl amhoọgh ni ogbaanyạn siphẹ arukumuan phọ odị angọ ghan bọ aZihova, kuolọ odị asoman ghan ni ipaanhaạn. APọl agbor ghan ni aghị rikpisi dị ekẹl, kụ mem mọ amuphẹ phọ, i/dugh ghan oghiighị arikpisi phọ ipẹ phọ. Rikpisi phọ iphẹn phọ aPọl aghiighị ghan bọ, eeni amem odị asoman ghan ni “omuzaan aḍuugh amuụm-aḍigho” ḅilhẹ “r’aruḅạ.” Kụ eeni amem abuọ isophoghom ukuphogh ghan ni nyodị. (2 Kọr. 11:23-27) Kụ abumor phọ u/gbor ghan usereghiạn ikuph phọ aPọl alhọgh ghan bọ olhoghonhaạn abidị ḍighaạgh. (2 Kọr. 10:10; Fil. 4:15) Eeghe kụ ilhoghonhaạn bọ ḍighaạgh Pọl oghiọm aghisigh rukumuan phọ aZihova? APọl alhegheri iboom ilọ aZihova dị eego esi ituughạ Adinyạ Iigbia phọ r’araraạr dị emiteghunhaan nyodị. Ipẹ phọ ingọ ni Pọl okuphom owol mọ aZihova apomhoghiạn ni nyodị. (Rom. 8:38, 39; Efẹ. 2:4, 5) Iphẹn phọ ibughẹ ephomhoghiạn phọ odị esi aZihova. APọl aḍeenhaan aZihova ephomhoghiạn phọ ephẹn phọ esi oghị aghisigh olhoghonhaạn ghan aḍighaạgh “buọ asiya phọ.”—Hib. 6:10. w23.07 9 ¶5-6

Ibadị awe olọgh ni elhegh mọ abuọ itooghị okpẹ ni orọl ḅilhẹ mọ enighẹ ni dị yira kodạph ghan iniin iilhogh dị bidị olhọgh. Kuolọ abuniin phọ awe phọ rookpukiạn ghan ni odạph olhogh dị aghịgh mudị o/nhighẹ obobọ agbagarạ apughạn. ABaibul phọ akaạph ni amiteom mọ itooghị awe rekọm imhinhimhiịn, kụ mọ edi eeḍiạn iiḅakiọm aSetan, ḅilhẹ kẹn mọ moọny amem kosiemhi ni eekunha. (Ps. 110:5, 6; Eccl. 8:9; Luk 4:5, 6) Akaạph kẹn mọ “oye Iọ agbagharạn buphẹ rotooghị bọ itooghị phọ, pọ magbagharạn ipẹ Enaạn etọ bọ.” Nyiidiphọ aZihova angọ ni ogẹl buọ itooghị phọ otooghị esi ekulha amem, kụ odị rawạ mọ yira osooromhi ni loor onhaghanhạn bidị. Esi iduọn phọ, yira omoọgh ‘otuụgh ipẹ bidị mugbi bọ’ iyira osogh ongọ abidị, emhiigh iisogh agomẹt phọ kụ esi olhọgh ghan eegu ḅilhẹ r’osooromhi aloor ongọ. (Rom. 13:1-7) Yira otue ni omiịn iniin iilhogh agomẹt phọ idiphọ iilhogh dị ekamakamạ, i/nighẹ, obobọ ekpạr odạph. Kuolọ yira ronaghanhạn ghan aZihova, kụ odị uḅenhị iyira mọ osooromhi loor onhaghanhạn buọ itooghị phọ mem lọ uḅenhị iyira oḍighi iyaạr dị i/gbạgh ni itọ phọ odị.—Iiḍ. 5:29. w23.10 8 ¶9-10

Mem mọ omhạr bọ Samsịn, awe aPhilistine kụ rotooghị kongọ eelhe phọ Izrạl komhiinhẹ. (Judg. 13:1) Egbagarạ eten itooghị phọ abidị ikọm iboom imhinhimhiịn engọ we phọ Izrạl. AZihova amạ Samsịn “ophẹl Izrạl osighẹ aḍighaạgh abuọ aPhilistine phọ.” (Judg. 13:5) Orue oḍighi oḍighi phọ ophọn phọ, kewạ mọ aSamsịn abeḍenhọm aZihova. Eniin amem, awe eghạm abuọ aPhilistine phọ uru ni osiph aSamsịn epẹ Lehi, eeni Judah. Awe aJudah rokiilhaan, kụ bidị osopha oḅọgh aSamsịn ongọ amulhọgh ḍien phọ abidị. Awe phọ aSamsịn okạr osiph nyodị ophaḍiọm iyạl imhoom iḍigh oghiomaạn buọ aPhilistine phọ. (Judg. 15:9-13) Kuolọ, “uwaloor phọ aZihova aḍigh loor [aSamsịn] r’iikpọ,” kụ iḍigh phọ eegbuan. Ipẹ reten, kụ odị “amhiịn oḅararạ aleẹgh enhạm adool dị memhugh,” kụ asighẹ azeọm 1,000 alhephiri abuọ aPhilistine phọ!— Judg. 15:14-16. w23.09 2 ¶3-4

AZihova muḍeenhaan iyira enụm enụm “ipẹ k’aḍio phọ dị agbiighi bọ” siphẹ aBaibul phọ. AZihova katue ni asighẹ ibadị areten amuneniom rigbiom mọ odị, kụ odị ramoọgh ghan ni ekol oomo amem loor esi dị “odị maḍighi idị oomo araraạr keyọ ghan r’arigbiom mọ odị.” (Prov. 16:4) Araraạr phọ aZihova raḍighi bọ ketọl bịn k’agee-pọ. Eeghe kụ ogbi phọ aZihova, kụ eeghe kụ edị odị maaḅenhion orue omhunhenhi ipẹ odị magbiighi bọ? Enhaạn aḅenhị ni Adạm r’Iv ipẹ odị agbiighinhaan bọ bidị. Odị aḅenhị bidị mọ “imuum emuzeḍi eḍighi ibadị, imuzeḍi de phọ kụ etọ ḅerẹ engọ . . . torobọ olhẹm dị amhoọgh ghuḍum” siẹn ade phọ. (Gen. 1:28) Oḅaạr emhụ phọ Adạm r’Iv, akọm ni ikarạph angọ omhạr awe, kuolọ ipẹ phọ i/sophoghom ogbi phọ aZihova. Odị aaḅenhion ni raraạr obọ odị amhunhenhi ogbi phọ odị. Mem mem mọ, odị asopha ni ophighi Omhạr epẹ k’akẹ dị kamunenhi ogbi phọ odị amhooghonhaạn bọ omhạr awe siẹn ade phọ.—Mat. 25:34. w23.10 20 ¶6-7

AZihova katue ni ulhoghonhaạn iyira ḍighaạgh oghiọm aghisigh okumu odị. Ketue ni eḍighi ipaanhaạn oḍighi iduọn phọ mem dị eghịgh mudị yira ko/kpạr ri opu ḍidugh phọ ayira. Eeni amem, yira otue ni ootughiạn mọ asidugh phọ ayira epel ipẹ otelhedom mọ Pita. Kuolọ aZihova kulhoghonhaạn ni iyira ḍighaạgh. (Ps. 94:18, 19) Esi omaạm, oniin onyọ umor aḍighi ominiạn riiniọm esi eedoọny amem kụ agbi bọ oḍigh isiẹn igey phọ. Odị alhọgh ni ikuph owilhẹ adọl phọ adiphẹ phọ. Kuolọ, eeni amem ikarạph aruuphuạ phọ ipẹ phọ retu ghan ni. Eeghe kụ reloghonhaạn ghan nyodị ḍighaạgh oghị aghisigh oḍighi ghan ipẹ enhighẹ bọ? Odị aḅẹm mọ: “AZihova kụ rungọ ghan iyira inyaạm.” Kụ odị alhoghọm mọ: “R’olhoghonhaạn aḍighaạgh uwaloor iigbia phọ . . . , mị maru amiịn mọ mị katue ni akiọm ghisigh atolhọm r’igey phọ . . . Etigheri e/munughan phọ amhị, aZihova akị ni ghisigh rukparamhị ghan imhị kaḅilhẹ usighẹ imhị aḍighinhom siẹn ookpomhoghan phọ.” w23.09 23 ¶12

Iḍoọgh abumor, emoghi ni igey phọ ikuph orue oḍighi onyọ aKristẹn dị asi amhanhanhaạm. Ewạ mọ moọgh igey areḍeenhaan otuughaạny, amhoọgh iikpọ iitughiạn, aḍighi oye dị kotue oḍuom olhoghi, atuughạ sighalhanyạ orolhọm, kụ aakolhobiạn ilọ iiḍighi dị rekori nyinhạ ghisigh. Eeni amem nạ atue ni aatughiạn mọ iiḍighi phọ rekori bọ nyinhạ ghisigh epughạn, mọ nạ ka/tue aḍighi ateenyẹ. Kuolọ nạ katue ni. Ka/bula mọ aZihova akạr kụ rawạ olhoghonhaạn anạ ḍighaạgh. (Isa. 41:10, 13) Kụ kẹn, abumor r’abumaranhi phọ odi ni olhoghonhaạn anạ ḍighaạgh. Mem dị nạ ateẹny ḍiigbu phọ anạ oḍighi onyọ umor dị akạr asi amhanhanhaạm, olhoghi anạ kakạr kụ aḅaạl kụ nạ aloghoma ogbaanyạn. Iḍoọgh abumor, yoor iphomhoghiạn ni inyinha agey! AZihova aghị ni ghisigh asẹph ikuph phọ anyinha oḍighi abumor dị osi omhanhanhaạm. w23.12 29 ¶19-20

Oḅẹm mọ nạ odi esi ramoore ghan r’aḍita abumor r’abumaranhi kụ nyinha esighẹ afoto. Kụ loor oghiilhaan mọ eeni oniin ka/nighẹ, kụ nyinha esighẹ inhọn iyạl asifoto. Nyiidiphọ nyinha memhoọgh iraạr asifoto. Eru maạr dị nạ aphogh oniin afoto phọ kụ nạ amhiịn mọ oniin onyọ umor o/yịgh nạ kagbuurogh nyopọ phọ loor esi dị nạ amoọgh ni inhọn iyạl idị oomo awe phọ oyighọgh. Yira kotue ni osighẹ sifoto phọ iphẹn phọ omaaniọm raraạr phọ ipẹ retọl ghan bọ siphẹ iitughiạn phọ ayira. Yira ro/nuụn ghan ko/wulha mem mọ yira orọl bọ r’abumor r’abumaranhi phọ ayira. Kuolọ oḅẹm mọ onyọ umor obobọ umaranhi aghaạph obobọ aḍighi iyaạr dị ephin esi anạ mem mọ amuphẹ phọ. Nạ kaḍighi ika mem dị nạ raatughiạn ilọ ipẹ odị aḍighi bọ? Nạ ragbi mọ k”enighẹ osighẹ olhoghi anạ siphẹ phọ, eten phọ epẹ nạ kagbuurogh bọ afoto phọ u/nighẹ bọ? (Prov. 19:11; Efẹ. 4:32) Loor iduọn yira kotue bọ ni ootughiạn ibadị imạ araraạr dị oye phọ maḍighi, pọ kidughanhaan ni iyira ogbuurogh osighẹ opiomạn phọ odị opọ phọ. Imạ araraạr phọ oye phọ aḍighi bọ kụ edị ewạ mọ oseerian siphẹ olhoghi phọ ayira oḅilhẹ osereghiạn. w23.11 12-13 ¶16-17

Ekpo onhụ Grik phọ osighẹ bọ oḍighinhom siẹn phọ rekaạph ghan mọ onyọ umaranhi phọ oomo amem aanmenian ghan eten dị eḍeenhaan mọ odị alọgh ni eegu ḍiitughiạn r’olhoghoma abunhọn ilọ iinmenian. P’eeghe idị yira osereghiạn bumaranhi phọ ayira abuphẹ osi bọ omhanhanhaạm esi iduọn bidị roonmenian ghan bọ eten dị esooran! Orọph omhiịn kụ enhọn eegharạ dị torọ onyọ umaranhi dị masi amhanhanhaạm kaḍeenhaan ghan. Orọph omhiịn phọ p’eeghe? Orọph onhaghanhạn iyaạr kụ osopha ogey osopha—olhegheri idị enhighẹ r’idị i/nighẹ kụ osopha oḍighi ipẹ enhighẹ bọ. Ooḅeghiọn eḍeenhaan phọ Abigail. Olom odị asopha okarạph osopha dị mukọm igbogh iiḅaghamhị kụ angọ oomo eghunotu phọ. Abigail aagboronhom ni aḍighi iyaạr amiteom. Odị aḍeenhaan orọph omhiịn, kụ ipẹ phọ iphẹl li ghuḍum. (1 Sam. 25:14-23, 32-35) Orọph omhiịn kulhoghonhaạn iyira ḍighaạgh olhegheri amem oḅạ r’amem oḅoorian. Kulhoghonhaạn iyira kẹn ḍighaạgh oḍeenhaan ogbolomaam bunhọn eten dị eeleeny.—1 Tẹs. 4:11. w23.12 20 ¶8-9

Otelhedom mọ aPọl agẹ ikpo onhụ phọ ipẹ phọ aghiọm ookpomhoghan phọ arọl bọ Rom. Abumor r’abumaranhi phọ abuphẹ phọ motuughạ ilọ aZihova r’aZizọs, omoọgh omheeraam, oḅilhẹ oḍighi Kristẹn. Esi iduọn phọ, “Enaạn metuạn bọ omeeraam mọ esighenọm mọ [bidị] awe aruukuan,” kụ asagharạn bidị uwaloor iigbia. (Rom 5:1) Ii, bidị ukạr kụ omhoọgh ookiạ oḍuom olhoghi. Onyebel roten kụ aPọl agẹ aghiọm Kristẹn phọ epẹ Efesọs osagharạn bọ uwaloor iigbia phọ ilọ oḍuom olhoghi phọ Enhaạn angọ bọ bidị. Oḍuom olhoghi phọ opọ phọ aḅaramaạm omhoọgh “aḍisẹph phọ dị aguanaan bọ.” (Efẹ. 1:18) APọl aḅenhị ni kẹn buọ aKolosị phọ ekpisi phọ bidị komoọgh bọ ḍisẹph phọ aḍiphẹ phọ. Odị aḅẹm mọ, “Enaạn meselemi iseenaan inyina epẹ k’akẹ.” (Kọl. 1:4, 5) Esi iduọn phọ, aKristẹn phọ osagharạn bọ opogh rokiọm ghisigh dị koḅeton bidị mem dị bidị omhugh, okeelhom k’akẹ otooghị r’aKraist.—1 Tẹs. 4:13-17; Ogan. 20:6. w23.12 9 ¶4-5

Ekpo onhụ phọ ogbạ bọ mọ “keeko” eḍighi ekpo onhụ dị roḍighinhom ghan mem dị rokaạph ilọ awe eghạm dị rokori emhạ. Awe dị odi emhạ dị rokori ghan ronaanhị ghan ni reborọph, loor esi dị bidị olegheri mọ rokori ni emhạ phọ. Iniin phọ kẹn, mem dị eephọ phọ k’Enhaạn kụ rekoph iitughiạn r’ilhoghi phọ ayira, yira roo/kpereghaan ghan, loor esi dị yira olegheri ni mọ yira omoọgh ni oghoph. (Ps. 4:8) Idiphọ emitenhaan bọ Hannah, ghalhamọ adọl phọ ayira i/nmia ni egina amem, yira kotue ni omoọgh eephọ. (1 Sam. 1:16-18) Kụ mem dị yira ophoomhị loor, ridughanhaan ghan ni iyira orue ootughiạn kụ ogbi osopha ogey osopha.Yira koḍighi eeghe? Mem dị nạ odi esi iiḅaghamhị, mạgh bukoriom mọ. Ika? Ḅeeḅereghị tutụ nạ alhoghoma eephọ phọ k’Enhaạn. (Luk 11:9; 1 Tẹs. 5:17) Eru maạr dị nạ asoman igbagarạ asidọl, pọ ka/gbạ ghan mem ooḅereghị, bịn nạ kaloghoma ni eephọ phọ k’aZihova dị reeko iitughiạn r’olhoghi phọ anạ.—Rom 12:12. w24.01 21 ¶5-6

Orue oḅaalhamhị aḍien Odẹ phọ odị, aZizọs akparaghạm ni rigilaạm, imhinhimhiịn, ḅilhẹ r’iḅoroghom. Odị akuphom ni owol mọ odị maḍighi oomo ipẹ Odẹ phọ odị awạ bọ, kụ iḍighi kụ, odị o/mhoọgh iyaạr otuạn oghiil umugholoor. (Hib. 12:2) Odị alhegheri kẹn mem mọ opọ phọ mọ aSetan kụ okaraghị oye phọ razuoghom bọ nyodị. (Luk 22:2-4; 23:33, 34) ASetan akạr awạ okạ adọl aruukuan phọ aZizọs; kuolọ, imheel li ephum nyodị! AZizọs akạr aḍeenhaan eten dị eegholhaan mọ aSetan ogbogh ogbaạm okpẹ ḅilhẹ mọ aZihova amoọgh ni reḅenhẹ dị okpẹ oḍuom olhoghi, dị kokị ghisigh opamanhạm ḍimheerạ abidị etigheri odẹgh ophogh dị bidị osoman! Nạ rawạ ni oḍighi idị keḅeraạn Odaạm mọ anạ? Pọ kiạ ghisigh aboom ghan ḍien phọ aZihova, alhoghonhaạn ghan bunhọn ḍighaạgh olhegheri odọ oye phọ Enhaạn phọ ayira akạr bọ aru. Nạ adighi idiphọ, pọ nạ ratuughaạny ghan Zizọs. (1 Pit. 2:21) Idiphọ aZizọs, nạ raḅaalhamhị ghan olhoghi aZihova, ḅilhẹ raḍeenhaan ghan mọ amulhọgh ḍien phọ Odị aSetan, olhom ogbaạm okpẹ! w24.02 11-12 ¶11-13

Esi oogh asiạ epẹ omhạn, awe dị ropel li erubal moḍiiny ni muụm idiphọ Abugbaanhaạn AZihova. Mem dị nạ aḅọgh loor anạ angọ aZihova, pọ nạ masopha oḍighi onyọ amatuạn aZizọs Kraist ḅilhẹ r’osighẹ ogbi phọ Enhaạn idiphọ iyaạr dị emhạn maạr siphẹ aghuḍum mọ anạ. Oḅọgh aloor ongọ aZihova idiphọ onyọ aKristẹn eḅaramaạm eeghe? AZizọs aḅẹm mọ: “Oye Iọ rawạ odạph amị asooromi Ioor ameeraam ḍuugh.” (Mat. 16:24) Ikpo-onhụ aGrik phọ ogbạ bọ otenheghi mọ “asooromi Ioor ameeraam ḍuugh” kotue ni ogbạ kẹn mọ “aḅenhị loor odị mọ eeye.” Idiphọ ebenhẹ aZihova dị maḅọgh loor angọ, kewạ mọ kel raraạr dị egbạgh ogbi phọ odị. (2 Kọr. 5:14, 15) Araraạr phọ iphẹn phọ eḅaramaạm “eḍighinom iyaạr dị iphulupul phọ reḍighi ghan,” idiphọ ipesi. (Gal. 5:19-21; 1 Kọr. 6:18) Odạph iilhogh phọ Enhaạn keemọr ri esi anạ ḍughụm? Kee/mọr esi anạ eḍighi maạr dị nạ aphomhoghiạn aZihova aḅilhẹ akuphom owol mọ iilhogh phọ odị ilọ imạ anạ ni.—Ps. 119:97; Isa. 48:17, 18. w24.03 2 ¶1; 3 ¶4

AZihova rangọ ghan uwaloor iigbia phọ odị buphẹ roḍighi bọ idị eḅeraạn nyodị. (Mat. 12:18) Yira otue ni opuruan loor mọ, ‘Mị marue ni raḍeenhaan ghan iniin araagharạ phọ eḍighi bọ pakirị eemhumha uwaloor iigbia phọ Enhaạn siẹn aghuḍum mọ amhị ḍughụm?’ Nạ raḍeenhaan ni bunhọn okparạm nyiidiphọ kapu mem mọ nạ k”olhegheri bọ aZihova ḍughụm? Okạr oghaạph, iduọn nạ raḍeenhaan bọ raagharạ phọ eḍighi bọ pakirị eemhumha uwaloor iigbia phọ kabughẹ kụ edị keganana esi anạ mọ nạ aḅeraạn ni aZihova! AZihova rangọ ghan suọ ekiạ etagharạn phọ buphẹ roḍighi bọ idị eḅeraạn nyodị. (1 Tim. 2:5, 6) Kuolọ kokaạph ika eḍighi maạr dị yira u/loghoma mọ yira oḅeraạn ni aZihova, ghalhamọ r’iduọn yira omhoọgh bọ ni omheeraam esi ekiạ etagharạn phọ oḅilhẹ oḍiiny muụm? Tuutughiạn mọ yira ko/tue oḍuom olhoghi ipẹ yira olhoghoma bọ, kuolọ yira kotue ni oḍuomolhoghi aZihova. Odị ramiịn ghan buphẹ omhoọgh bọ omheeraam oghị esi ekiạ etagharạn phọ idiphọ awe elhiom eḍighinhom iyaạr kụ aguanhaan osẹph abidị.—Ps. 5:12; Rom 3:26. w24.03 30 ¶15; 31 ¶17