Araraạr Dị Kenighemhị Ruupuruan Omite Epẹ Erugh Phọ

Idiphọ ipheriphọ ituughạ phọ ayira, ookpomhoghan oopuruan ilọ omite epẹ erugh phọ eḍighi ni iikolhobian aZihova dị keḍighi idị oniin kakolhogholhomhị ghan nyoniin esi ephomhoghiạn r’iiḅi iiḍighi. (Hib 10:24, 25) Aruupuruan phọ esighẹ ghan oogh kụ esi oḍual ikalhạ, mem mọ amuẹn phọ kụ edị kodiighi we phọ, ongoọm rokool arukumuan, oḅilhẹ ooḅereghị. (Kuolọ amem mọ eghom epu siẹn eru maạr dị ropạm ruupuruan phọ mem dị purukụ ituughạ emiteghu.) Opọ kaḍiemhiom bọ aakolhobian oghaạph iyaạr dị keloghonhaạn ḍighaạgh rukumuan erugh phọ ḍio phọ aḍiphẹ phọ. Esi omaạm, eḍighi iyaạr dị ibadị dị omite erugh Satodee u/mite erugh siḍughul otu epẹ omạn, pọ kenighẹ ni ooḅeghiọn ilọ oghaạph epẹ erugh phọ. Ighẹn kụ inhọn araraạr dị kelọgh ḍighaạgh dị kotue ni okaaphọm?

• Eḍeenhaan ilọ oghaạph phọ edi bọ siphẹ Aḍinyạ Ituughạ—Adọl Aghuḍum Onyọ Akristẹn r’Oghaạph Ilọ Omhạr Phọ

• Ilọ osighẹ iyaạr dị emite omhiighom oghaạph

• Ilọ ophagharanhaạn ikpo-onhụ isophoghom dị eetura ni

• Ilọ ophagharanhaạn oye dị Enhaạn u/meeraam, odị amheeraam mọ iyaạr iḍuạ iyaạr kụ eten iyaạr, oye dị raḅạ ghan onhọn onhụ, obobọ odị rakị ghạn enhọn ekụ iiḅereghị dị ii/tura ekool phọ anyinha

• Ilọ oḍighinhom iyaạr dị edi osoph intanẹt ajw.org, JW Library^® app, obobọ Baibul

• Ilọ oḍighinhom eniin iyaạr dị edi siphẹ Igbe Araraạr Otughemhiọm Mọ

• Ooḅeghiọn eniin eten dị yira rosighẹ ghan ni koghaaphọm iiḅi iinhaghạn phọ, idiphọ oḍighinhom afon, ogẹ aḍinyạ, oghaạph esi ogbo, oḅilhẹ oḅula, obobọ ilọ otughemhị aBaibul

• Oghaạph ilọ iromoghiom ogonha aloor, ilọ odaphạn ghan asidọl phọ, ophamanhạm emạ ezọ, omhoọgh egey ephoghom, obobọ inhọn idị eghịgh iphẹn phọ

• Ophogh eniin Esi Ituughạ obobọ avidio abrosọ phọ Kuọm Loor Esi Ibạl r’Itughemhị

• Ilọ okparamhị r’olhoghonhaạn aḍighaạgh opọ r’anạ retelhian bọ

• Ophogh esi Baibul dị eghaạph ilọ iiḅi iinhaghạn phọ obobọ eḍeenhaan dị emite dị kakparamhị we phọ