Bakị Opoghom Mọ Ayira Zizọs

1. Eeghe kụ ogbi aZihova rodon?

RODON eḍighi ni ogbi Enhaạn mọ oghaạph iiḅi iinhaghạn ilọ Omhạr phọ oomo isiẹn ade phọ. (Mạk 13:10; 1 Tim. 2:3, 4) Ophọn phọ oḍighi aZihova, kụ odị amaghamhị maạr agey, pọ kụ iyaạr phọ odị angọ bọ Oọny phọ odị aphomhoghiạn bọ maḍiamhiom. Idiphọ odị raḍiemhiom rukumuan oghaạph iiḅi iinhaghạn phọ, yira okuphom ni owol mọ aZizọs kaḍighi ni asiemhi pạ aZihova rawạ bọ kụ eekunha phọ egbi nuụn oru.—Mat. 24:14.

2. Yira kooḅeghiọn eeghe siẹn emhuoghaạph phọ ephẹn phọ?

² Siẹn emhuoghaạph phọ ephẹn phọ yira komhiịn ipẹ aZizọs asighẹ bọ ‘Ebenhẹ phọ asụ bọ olhoghi aḅilhẹ akpẹ oḍuomolhoghi’ kụ rangoọm eḍien aruwaloor kaḅilhẹ aaḅakiọm bumatuạn phọ oḍighi oboom oḍighi dị apelom rodon, oghaạph iiḅi iinhaghạn phọ. (Mat. 24:45) Yira koḅilhẹ ni omhiịn iyaạr dị torobọ onyọ ayira kaḍighi obakị aani aZizọs r’ebenhẹ phọ.

AZIZỌS KỤ RAAḄAKỊ RUKUMUAN IIḄI IINHAGHẠN PHO

3. Ighẹn iikpọ kụ edị mongọ Zizọs?

³ AZizọs kụ raaḅakị rukumuạn oghaạph iiḅi iinhaghạn phọ. Eeghe kụ iḍighi kụ yira kokuphom bọ ni owol iphẹn phọ? Tutụ odị kakị bọ k’akẹ phọ, aZizọs aakpomoghi ni ḍiboom aḍita abumatuạn phọ odị okpẹ bọ oḍuom olhoghi phọ eeḅarạph dị erọl Galili. Kụ aḅenhị bidị mọ: “Enaạn mingọ ni imị oomo phọ iikpọ phọ epẹ k’akẹ r’isiẹn ade phọ.” Naghạn idị odị aḅilhẹ aghaạph: “ikị oomo areeIhe aḅirini phọ ekpaariọm awe phọ oḍighi bumatuạn amị.” (Mat. 28:18, 19) Esi iduọn phọ, iikpọ phọ ongọ bọ Zizọs eḅaramaạn ni ooḅakị oghaạph iiḅi iinhaghạn phọ.

4. Yira ulhegheri ika mọ aZizọs akiọm ni ghisigh raḍiemhiom oghaạph iiḅi iinhaghạn phọ?

⁴ AZizọs aḅẹm mọ oghaạph iiḅi iinhaghạn phọ r’oḍighi awe bumatuạn phọ kogbeelhom ni “oomo areelhe aḅirini phọ” kụ mọ onọ katọl li rabumatuạn phọ odị “ḍio etum ḍio tutụ eteẹny eekuna aḅirini phọ.” (Mat. 28:20) Ikpo-onhụ phọ iphẹn phọ eḍeenhaan mọ aZizọs kaḍiemhiom ni oḍighi oghaạph iiḅi iinhaghạn phọ bịn k’epẹ eekunha phọ.

5. Yira kopinhom aani ika bin omhunhenhi aPsalm 110:3?

⁵ AZizọs aḍuom ni olhoghi mọ awe komiteom ni loor ophinhom aani abin oḍighi phọ siḍio aruukunha phọ. Odị akuphom ni owol mọ imiịn okọ suọr phọ kemunughan nị, eḅẹm bọ mọ “awe phọ anạ komiteom nị loor dị ukpaariọm ḍio elephiri abumulhọgh-ḍien phọ anạ.” (Ps. 110:3) Nạ aphinhom aani bin oḍighi oghaạph iiḅi iinhaghạn phọ pọ nạ rabakị Zizọs r’ebenẹ phọ akpẹ phọ oḍuom olhoghi phọ omhunhenhi imiịn phọ ipẹ phọ. Oḍighi phọ rakị nị ghisigh kuolọ ipaanhaạn edi ni.

6. Eeghe ipaanhaạn kụ edị buphẹ rogbeelom bọ ilọ omhạr phọ rosoman rodon?

⁶ Iniin ipaanhaạn dị buphẹ rogbeelhom ghạn bọ ilọ omhạr phọ rosoman ghạn pọ isophoghom. Abuphẹ momheel bọ oḍuạ, abuḍiemhiom aruukụ iibereghị phọ, ḅilhẹ r’abuọ imirighan itooghị phọ mogbaaghị okpẹ ilọ odighị phọ ayira. Eḍighi maạr dị asiya ayira, amatuman ayira, r’abuọ oḍighi ayira omheeraam okpẹ kirokirọ phọ iphẹn phọ, pọ bidị otue ni ukpaariọm iyira owilhẹ aZihova r’oḍighi oghaạph ilọ iiḅi iinaghạn phọ. Iniin areelhe, amulhọgh-ḍien phọ ayira rozuoghom ghạn nị koḅilhẹ osiphi bunhiin ayira kodoghoḍị ikoli. Iphẹn phọ i/ḍighi iikia esi ayira. AZizọs aḅẹm mọ: “Awe oomo areeIhe kiIọgh nị inyina ḍien Ioor emụ phọ amị.” (Mat. 24:9) Iduọn aḅirinhi phọ ulhọgh bọ iyira ḍien phọ eḍeenhaan mọ yira abuọ aZihova. (Mat. 5:11, 12) Eru phọ kụ rakọm ghạn bọ oomo isophoghom mọ. Kuolọ odị o/si eraạph aZizọs! Rolhoghonaạn aḍighaạgh aZizos, iiḅi iinhaghạn phọ releeny nị we oomo isiẹn aḅirinhi phọ. Ooḅeghiọn eḍeenhaan iphẹn phọ.

7. Eeghe eḍeenhaan kụ edị nạ amhiịn siphẹ Ogananami 14:6, 7 dị remunughan?

⁷ Inhọn ipaanhaạn dị yira rosoman ghạn idiphọ abukaaphọm pọ arunhụ aḍiaḅạ. Siphẹ imiịn phọ oḍeenhaan bọ otelhedom mọ Jọn, aZizọs aḅẹm mọ oghaạph iiḅi iinhaghạn phọ k’akpạr ri apu ipaanhaạn phọ iphẹn phọ. (Bạl Ogananami 14:6, 7.) Ika? Yira rongọ ni ibadị awe eepoogh onhaghạn aanị adom omhạr phọ. Rodon, awe isiẹn oomo aḅirinhi phọ kotue ni omiin raraạr dị regbạ ghạn Baibul phọ siphẹ jw.org loor esi dị epamanham iinhaghạn runhụ dị epel li 1,000! Momheera mọ ogbạ aḍinyạ phọ Kelhọm Ghuḍum K’agee-pọ!—aḍikpanhạ aḍinyạ phọ yira rotughemiọm ghan bọ we oḍighi abumatuạn—otene runhụ dị epel 700! Momiteom ni itughemhị aBaibul esi asividio dị oḍighinhaan we dị oḅaaghạph, r’arinyạ dị oḍighinhaan budị ro/miịn ghan eten. Yira romiịn runhụ imiịn aBaibul dị remunughan. Awe “arunhụ aḍiaḅạ areelhe kirokirọ” rotuughạ ni oḅạ “oserereẹny onhụ” igey aBaibul phọ. (Zech. 8:23; Zeph. 3:9) Iphẹn phọ irue edugh loor iiḅakiọm opoghom mọ ayira Zizọs Kraist.

8. Eeghe kụ meḍuạ emite esi oḍighi iphelhegbeel phọ?

⁸ Rodon, awe dị ropel li 8,000,000 esi 240 areelhe kụ moḍigh siẹn ookpomhoghan phọ aZihova, kụ torobọ alhạ asimuunịr awe kụ roḍiiny ghan muụm! Idị emhạn maạr epelhom onhụ abạl awe phọ pọ aroozọ aKristẹn phọ, “imoom aroozọ” phọ bidị momhoọgh bọ. (Kọl. 3:8-10) Ibadị mowilhẹ iḅoriạ aroozọ, iigamaniạn, ophogh abunhọn osooromhi, ḅilhẹ r’oḅẹm mọ ephẹn eelhe ayoor. Imiịn phọ ogẹ bọ siphẹ Isaiah 2:4 remunughan; bidị ‘u/tuughạ mun ilọ eghạm.’ Iduọn yira olhọgh bọ ikuph okpolhoghiạn imhoom aroozọ phọ, yira rologhonhaạn ghan ḍighaạgh we oḍuraan oḍigh isiẹn ookpomhoghan phọ Enhaạn, kụ reḍeenhaan ghan kẹn mọ yira rodạph ni opoghom mọ ayira Zizọs Kraist. (Jọn 13:35; 1 Pit. 2:12) Iphẹn phọ i/gạ bịn emite. AZizọs rungọ ni iyira olhoghonhaạn aḍighaạgh phọ ewạ bọ.

AZIZỌS MAMẠ EBENHẸ

9. Odaphạn Matiu 24:45-47, eeghe kụ edị oghaạph mọ kemite mem eekunha phọ?

⁹ Bạl Matiu 24:45-47. AZizọs aghaạph ni mọ mem eekunha phọ onọ kamạ ni ‘ebenhẹ phọ asụ bọ olhoghi aḅilhẹ akpẹ oḍuomolhoghi’ ongọ ghan eḍien aruwaloor. Kụ iḍighi kụ yira rogon ni omhiịn dị ebenhẹ phọ ophọn phọ kalọgh inyaạm siẹn amem mọ ayira. Iphẹn phọ mekạr kụ etu inẹ. Opoghom mọ ayira masighẹ ebạm egu awe dị osagharạn uwaloor rangoọm eḍien aruwaloor we phọ Enhaạn r’abunhọn dị oḍeenhaan ḍiḅeraạn “mem lọ ekpẹ ongọ.” Awe phọ abuẹn phọ u/miịn siloor abidị idiphọ aruw-emhoọgh omheeraam abunhọn. (2 Kọr. 1:24) Kparipẹ ghụn, bidị olọgh elhegh mọ aZizọs Kraist kụ “oḍiemhiom r’oye itọ” awe phọ odị.—Isa. 55:4.

10. Aḍighẹn aḍinyạ siẹn afoto phọ oḍeenhaan bọ kụ ilhoghonhaạn bọ nyinhạ ḍighaạgh omhiigh orelhe eten aghuḍum mọ?

¹⁰ Egbi k’a1919, ebenhẹ phọ asụ bọ olhoghi aḅilhẹ akpẹ oḍuomolhoghi mamiteom ni rinyạ kirokirọ dị engọ eepoogh we dị omhoọgh aani ḍiḅeraạn otuughạ Ekpo Onhụ phọ Enhaạn. Lhạ phọ 1921, ebenhẹ phọ amiteom ḍinyạ dị oghol mọ The Harp of God oḍighi idị awe dị oḍeenhaan ḍiḅeraạn kolegheri ikpanhạ itughemhị aBaibul phọ. Esighẹ rekị bịn oḅilhẹ omiteom inhọn arinyạ. Aḍighẹn aḍinyạ kụ edị nạ atuughạ bọ alhegheri aḅilhẹ aphomhoghiạn Odẹ k’akẹ phọ ayira? Iḍighi “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, What Can the Bible Teach Us?, obobọ Kelhọm Ghuḍum K’agee-pọ!, okạr aḍimhoom mọ? Uukolhobian rinyạ phọ iphẹn phọ oteenyọm aḍiniin aḍiigbu mem mọ omiteom bọ.

11. Uḍighi ika kụ emhạn bọ maạr dị oomo ayira kotuughạ oḅilhẹ olhegheri ilọ aZihova r’aBaibul phọ?

¹¹ Abumhoom awe dị omhoọgh ḍiḅeraạn bịn kụ k/awe dị ewạ mọ omhoọgh olhegheri iyaạr dị aḍiinyan ilọ aZihova r’aBaibul phọ. Oomo phọ ayira ni. Otelhedom mọ aPọl agẹ mọ: “Buphẹ momanạm bọ . . . kụ role ghan eḍien lọ ekpạr.” APọl aḅarạm mọ osighẹ oḍighinhom ipẹ yira otuughạ bọ siphẹ aBaibul phọ kilhoghonhaạn iyira ḍighaạgh “oonemạ olegheri ilọ eru igey r’ikarạph.” (Hib. 5:14) Siẹn amem mọ amuẹn aroozọ awe elhegheri bọ bịn reloghorị, ekpạr ri odaphạn asiigbu phọ aZihova. Kuolọ aZizọs kaḍighi ni oomo ipẹ odị katue bọ omhiịn mọ yira otuughạ ni olegheri raraạr phọ ipẹ kekparamhị bọ omheeraam mọ ayira. Azin itughemhị phọ iphẹn phọ pọ Ekpo Onhụ phọ Enhaạn, aBaibul phọ. Ebenhẹ phọ asụ bọ olhoghi phọ raakolhobian ghan kaḅilhẹ adiighi itughemhị phọ iphẹn phọ dị eego esi iiḅakiọm mọ aZizọs.

12. Idiphọ aZizọs, ika kụ idị yira osighẹ ḍien phọ Enhaạn?

¹² Idiphọ aZizọs, yira moghuenhi ni ḍien phọ Enhaạn ipẹ ekpeanhaạn bọ. (Jọn 17:6, 26) Esi omaạm, lhạ phọ 1931 yira umhiigh ni omheera mọ Abugbaanhaạn AZihova, bịn eḍighi idị yira oḅạr r’Odẹ k’akẹ phọ ayira. (Isa. 43:10-12) Kụ egbi k’unwanyụ October lhạ phọ aḍiphẹ phọ, rogẹ ghan ni ḍien phọ Enhaạn siphẹ oḅẹl opoḍi atorobọ amagazin phọ ophọn phọ. Oḅarạm isiphẹ, aNew World Translation of the Holy Scriptures apamanhạm ni ḍien phọ Enhaạn riisi phọ ipẹ erọl ghan bọ siphẹ aBaibul phọ. P’eeghe idị ophọn phọ agbatanhaạn r’ipẹ abuọ asiosị mogbuurogh bọ ḍien phọ aZihova osighẹ!

AZIZỌS MAAKPOMHOGHI BUDAPHẠM MỌ ODỊ

13. Uḍighi ika kụ nạ akuphom bọ owol mọ aZizọs raḍighinhom ni ‘ebenhẹ phọ asụ bọ olhoghi aḅilhẹ akpẹ oḍuomolhoghi’ phọ rodon? (Jọn 6:68)

¹³ AZizọs masighẹ ‘ebenhẹ phọ asụ bọ olhoghi aḅilhẹ akpẹ oḍuomolhoghi,’ apighiom ookiạ ookpomhoghan siẹn ade phọ olhọgh ophophe iserereẹny iiseeny. Nạ aloghoma aani ika ilọ ookpomhoghan phọ ophọn phọ? Eeni nạ aloghoma aani iphẹn otelhedom mọ Pita alhoghoma kụ aḅenhị bọ Zizọs mọ “Yoor koḅilẹ okị k’anhiạn? Nạ kụ amoọgh bọ oghaạph iIọ aghuḍum k’agee-pọ phọ.” (Jọn 6:68) Yira muḍighi eeghe awe mọ yira mu/ḍigh bọ ookpomhoghan phọ aZihova? Dị eego esi ookpomhoghan phọ ophọn phọ, aKraist runyaamhị ghan ni iyira r’araraạr phọ ipẹ ewạ bọ okparamhiọm omheeraam mọ ayira. Odị rutughemhị ghan iyira kẹn osilor oḍighi iphelhegbeel phọ. Opumom isiphẹ, odị rulhoghonhaạn ghan iyira ḍighaạgh okpolhoghiạn “imoom aroozọ,” pidị yira oḅeraạn aZihova.—Efẹ. 4:24.

14. Nạ mamhooghọm ika suọ loor iduọn nạ aḍighi aani bọ olọ ookpomhoghan phọ aZihova mem ezẹgh aCOVID-19 phọ?

¹⁴ AZizọs rangọ ghan iiḅakiọm osụ olhoghi mem iiḅaghamhị. Asuọ iiḅakiọm mọ iphẹn phọ iganana ni mem mọ ezẹgh aCOVID-19 emhiigh bọ. Mem dị ibadị siẹn aḅirinhi phọ u/lhegheri ilọ oḍighi, aZizọs aḍighi ni idị yira komoọgh iiḅakiọm dị kilhoghonhaạn iyira ḍighaạgh okoronhaan. Uḅenhị ni iyira olhoghạ yogh asimạsk mem dị yira odi esi ogbo awe r’ookelheghạn ghan asiloor. Uḅenhị ni ikumor awe phọ ogbor ghan oghaaphạn r’abuọ ookpomhoghan phọ abidị olhegheri ilọ adọl phọ abidị ḅilhẹ r’asiya phọ abidị r’aZihova. (Isa. 32:1, 2) Uromhoghiom ghan ni iyira oḅilhẹ ukparamhị iyira dị eego esi iinhaghạn phọ Aloor Phọ Repogh Bọ ongọ ghan bọ.

15. Eeghe iiḅakiọm kụ idị ongọ ilọ ophạm ituughạ r’oghị epẹ erugh phọ mem ezẹgh aCOVID-19 phọ, kụ ikọm eeghe kụ emiteom?

¹⁵ Mem ezẹgh aCOVID-19 phọ, ungọ ni iyira iiḅakiọm ilọ ipẹ yira kopạm ghan bọ ituughạ r’oghaạph iiḅi inhaghạn phọ. I/mạn mem bịn yira omhiigh ophạm ituughạ, ookpomhoghan eghir, ḅilhẹ r’ilọ eephugh dị eego esi asividio r’azoom. Yira oḅilhẹ kẹn omhiigh oghaạph iiḅi inhaghạn esi afon r’ogẹ arinyạ. AZihova asẹph ni ikuph phọ ayira. Ibadị ilạ agadạ mongọ ni iinhaghạn ilọ idị onhụ abukaaphọm mabụgh iboom epẹ abidị. Okạr oghaạph, imạ raraạr okparamhị memiteghunhaạn ni ibadị siẹn amem mọ amuẹn phọ.—Miịn igbe phọ “AZihova Asẹph Ni Oḍighi Iphelhegbeel Phọ Ayoor.”

16. Eeghe kụ edị yira okuphom owol?

¹⁶ Eeni abuniin uutughiạn ni m’ookpomhoghan phọ oḅarạm eepuph oghaạph ezẹgh aCOVID-19 phọ. Kuolọ amem emhạn mem, reegholhaany ghan ni mọ iiḅakiọm mọ rungọ ghan bọ iyira eḍighi ilọ osụ-olhoghi. (Mat. 11:19) Kụ mem dị yira ogbirima ilọ emạ eten ephomhoghiạn phọ aZizọs raḍiemiom bọ we phọ odị, yira okuphom ni owol mọ, etigheri ilọ erọl, aZihova r’Oọny phọ odị kurolạn ni iyira.—Bạl Hibru 13:5, 6.

17. Nạ alhoghoma ika iduọn aZizọs kụ aḍighi bọ opoghom anạ?

¹⁷ Olhoghi ayira akạr kụ aḅaạl iduọn aZizọs kụ aḍighi bọ opoghom ayira! Yira oḍighi aani pakirị ookpomhoghan dị oḅophoghạn etigheri iḍighinhom araraạr, r’areelhe, ḅilhẹ r’arunhụ dị egbaranhaạn. Yira ole ni epẹr eten aruwaloor ḅilhẹ r’osighẹ ghan kẹn itughemhị phọ ewạ bọ oḍighinhom oḍighi ogbeelhom iiḅi iinhaghạn phọ. Torobọ onyọ ayira ramoọgh ghan ni olhoghonhaạn aḍighaạgh okpolhoghiạn omhoom oye phọ, ḅilhẹ r’utughemhị ghan kẹn iyira ophomhoghiạn oniin atụm nyonhiin. Yira omoọgh ni oomo ariphigh oghol oobagaam opoghom mọ ayira Zizọs!