Oḍeenhaan Ghan Ogbolhomaam Resighẹ Ghan Ni Keru Ḍisẹph Kirokirọ

Odẹ aḍighi oniin okumor oye siphẹ United Church of Canada arọl ghan bo, epẹ emhạ phọ ayoor. Torobọ awiki odị arom ghan ni umaranhi amhị r’amhi oghị ituughạ aSondị skul phọ, kụ momhạn kụ yoor oḍighan nyodị 11:00 ḍiroọr ituughạ asiosị phọ. Kụ ootaany, yoor oghị ghan oteẹny Onhiin, epẹ aKindọm Họl phọ. Idughanhaan ni iyoor omhiịn ogbaranhaạn phọ odi bọ esi iyạl ekụ iiḅereghị phọ iphẹn phọ.

Kụ onhiin aghaạph ilọ omhoom omheeraam mọ odị aḅenhị Bob, Marion r’aHutcheson oḍighi bọ igbogh arighirị odị, kụ eekunha phọ bidị oru oḍighi Bugbaanhaạn AZihova. Kụ lhạ phọ 1958 umor r’umaranhi phọ Hutchesons uphạm imhị r’iraạr phọ anmụny phọ abidị oghimọm Ogbogh Ookpomhoghan Eephugh ophaanyạ aḍughulotu phọ Divine Will epẹ New York City. Mem dị mị aatughiạn ilọ iphẹn phọ, mị ramiịn ghan ni mọ bidị ulhọgh ni iboom ikuph ophạm aani amhị, kuolọ ookpomhoghan eephugh phọ opọ phọ kụ eniin emạ iyaạr dị mị ka/tue ni bịn abulha siẹn aghuḍum mọ amhị.

ABUMOR R’ABUMARANHI PHỌ ULHOGHONHAẠN NI IMHỊ ḌIGHAẠGH OBUGHẸ ARUKUMUAN PHỌ MỊ RANGỌ BỌ AZIHOVA

Mem iḍoọgh phọ amhị, mị ukạr ghan kụ aghelhọm ophogh ghan inhạm mọ epẹ araaghanhạn phọ yoor orugh bọ. Kụ mị amhiigh omhoọgh iitughiạn oghị ituughạ oḍighi oyil arookonhom inhạm. Onhiin aghaạph iphẹn phọ aḅenhị oniin okumor oye ookpomhoghan. Kụ r’eyoghoyoghọ eten odị uutughianhạm imhị mọ yira odị siḍio “aruukunha” phọ, kụ upuru imhị idị osighẹ ibadị asiạ oghimọm ogbogh askul ketue etir siya phọ amhị r’aZihova. (2 Tim. 3:1) Kụ eekunha phọ, mị asopha mọ mị ka/kị ogbogh askul.

Kuolọ ghalhamọ r’amem mọ mị amhadạn bọ sekondirị skul bịn mị uutughiạn ghan ni iyaạr dị mị kaḍighinhom ghuḍum mọ amhị. Ghalhamọ r’iduọn mị amite ghan bọ ni epẹ erugh phọ torobọ eekunha awiki, mị u/kelhọm ghan. Esi iduọn phọ, mị uu/tughiạn ghan mọ mị katue ni aḍighi okọy eten opọ oomo amem mọ. Odẹ amhị r’obạm umor odị dị u/ḍighi Bugbaanhaạn AZihova ukpaariọm ghan imhị oghị oḍigh oḍighi r’oniin ogbogh insurance kompinị epẹ Toronto. Umor odẹ phọ amhị aphạm ni egbogh esi siphẹ akompinị phọ opọ phọ, esi iduọn phọ, mị umheera ni osighẹ oḍighi phọ.

Epẹ Toronto, oḍighi phọ amhị aḍighi ni idị mị amhiigh omhooghọgh arighirị r’awe aḅirinhi phọ, eḅilhẹ kẹn eḍighi idị mị awilhẹ yogh ghan ituughạ r’omite epẹ erugh phọ. Mị urugh ghan r’ogbogh odẹ amhị dị u/ḍighi onyọ Ogbaanhaạn AZihova mem mọ opọ phọ, kuolọ mem mọ odị amhugh bọ, bịn ewạ mọ mị uwạ enhọn esi orọl.

Umor r’umaranhi phọ Hutcheson, usighẹ bọ imhị oghimọm ookpomhoghan eephugh alhạ phọ 1958, ukạr oḍighi odẹ r’onhiin amhị. Bidị umhạgh imhị orọl r’abidị kụ iphẹn phọ ilhoghonhaạn ni imhị ḍighaạgh okparamhị asiya phọ amhị r’aZihova. Kụ mị r’oọny phọ abidị John, oḍiiny muụm lhạ phọ 1960. Bịn aJohn amhiigh okọy eten, kụ ipẹ phọ inyu ni imhị obughẹ amem mọ amhị epẹ erugh phọ. Abumor r’abumaranhi phọ ulhọgh ni elhegh oghị aghisigh phọ amhị, kụ esighẹ rekị bịn umạ imhị idiphọ opoghom Ituughạ Ogboku awiki phọ.

MỊ UMHOỌGH NI OOKIẠ OḄARAMẠ R’OKỌY ETEN

Kụ lhạ phọ 1966, aRandi Berge r’amhị aalhạn ni, odị okọy eten dị amhoọgh oophugh kụ aakolhobian okumuan atorobọ ekpisi dị ewaạm mọ ebụgh. Opoghom eghir phọ ayoor akạr kụ amhoọgh ḍiḅeraạn ayoor, kụ uromha iyoor oghị olhoghonhaạn aḍighaạgh ookpomhoghan Orillia, Ontario. Yoor u/toph mem bịn yoor onyeenhe.

Yoor r’osi bọ Orillia bịn mị aḍighan Randi okọy aani eten opọ oomo amem mọ. Oophugh phọ odị akạr kụ aḍigh aani loor amhị! Mị amhiigh bọ oḍighi okọy eten phọ, mị umhoọgh ni ibo phọ reḍuạ ghan bọ keru esi otughemhị awe Baibul phọ kụ omhiịn dị bidị okạr onhaghanhạn igey phọ. P’eeghe ibo dị mị amhoọgh olhoghonhaạn aḍighaạgh omạ olom r’anhịr epẹ Orillia onmeeghi araraạr siphẹ adọl aghuḍum mọ abidị kụ oḍighi aani arebenhẹ aZihova.

OMHOOM ONHỤ AḌIAḄẠ R’ONME ETEN IITUGHIẠN

Mem dị yoor oghị Toronto, yoor uuzuanhaan ni onyọ umor dị oghol mọ Arnold MacNamara. Odị aḍighi aani oniin siphẹ abumor phọ ophogh ghan bọ olạ agadạ phọ aCanada. Odị upuru imhị mughumọ kiḅeraạn ni iyoor okumuan idiphọ abukọy eten opọ agbatanhaạn bọ. Mị uugboronhom ni aphagharanhaạn mọ: “Ii. Torobọ ekpisi, kuolọ ke/pẹ Quebec!” Iitughiạn dị awe aCanada phọ roḅạ ghan bọ onhụ aḅekeeny phọ omhoọgh ilọ aweye aQuebec phọ roḅạ ghan bọ French phọ loor iiḅaghamhị phọ edi bọ epẹ phọ ikạr kụ itir imhị. Mem mọ amuphẹ phọ awe aQuebec phọ robe ghan omhooghạ aloor.

Arnold uphagharanhaạn imhị mọ, “aQuebec bịn kụ ekpisi dị olạ agadạ phọ rowạ mọ abukọy eten dị ogbatanhaạn oghị mem mọ amuphẹ phọ.” Mị umheera ni egina amem oghị. Mị ulhegheri ni mọ eḅeraạn ni Randi anhịr phọ amhị oghị epẹ phọ okumuan. Onyebel roten, mị uru ni alhọgh elhegh mọ ophọn phọ oniin osopha ayoor dị anhighẹ apelheghiom siẹn aghuḍum mọ ayoor!

Mem dị mutughemhị iyoor onhụ aFrench esi oogh awiki, aRandi r’amhị ḅilhẹ r’oniin olom r’anhịr uḍuạ ni oghị epẹ Rimouski, ekpisi dị aḍidoọny phọ rekị omhạn 336 itobi epẹ esiinyọm mọ, epẹ erumuḍio phọ remite ghan bọ epẹ Montreal. Ghalhamọ r’iduọn phọ ni, yoor uḅilhẹ ni omhoọgh iboom araraạr otuughạ siphẹ onhụ aFrench phọ, iphẹn phọ ikạr kụ eganana mem dị yoor oghị ituughạ kụ ungọ imhị igbeelhom aạl. Mị aạl mọ ookpomhoghan eephugh phọ ratu bọ, abuboom “awe kụ koḍuạ ni epẹ ostrich otu” kparipẹ dị mị kabạl mọ abuboom “awe kụ koḍuạ ni epẹ Austrilia otu.”

Epẹ Rimouski phọ, inya abumaranhi dị k/aạl ilhom dị omhoọgh oophugh ḅilhẹ r’umor phọ Huberdeau r’anhịr odị ḅilhẹ r’iyạl anmanyaạn abidị uru ni oḍighan inya phọ ayoor. Umor r’umaranhi phọ Huberdeau uwạ ni otu oḍual iisoph dị bidị kụ okpẹ ogbogh opol ikpoki otu phọ kụ abukọy eten phọ okpẹ aani ghan iịny ikpoki. Kụ ughol esi phọ mọ White House, loor esi dị arokọ r’arisigh otu phọ ugbul ophalhaḅaạl agbạ. Yoor ugbor ghan omhoọgh 12 obobọ 14 awe dị orọl ghan siphẹ otu phọ. Idiphọ abukọy eten dị ogbatanhaạn, aRandi r’amhị umite ghan ni epẹ erugh phọ ḍiroọr, ootaany r’aḍulhe, esi iduọn phọ yoor usereghiạn ni omhoọgh awe dị kudạph aani ghan iyoor omite epẹ erugh phọ—ghalhamọ r’amem eephoọm.

Yoor r’abukọy eten phọ abuẹn phọ ukạr kụ omhoọgh siya dị ekpạr idiphọ abuọ eniin eghunotu. Kụ yoor omhoọgh ḍio dị yoor ookpomhoghan ghan eniin esi oḅophoghạn ghan osạ oḅilhẹ olhe. Oniin onyọ umor phọ amhaạr agey omhoọr asuọr, esi iduọn phọ, yoor uukpomhoghan ghan ni torobọ aḍughul aSatodee omhoọr suọr oḅilhẹ oghẹr iḅạ.

Ibadị epẹ Rimouski uḍeenhaan ni ḍiḅeraạn otuughạ aBaibul phọ! Olhoghi ayoor akạr kụ aḅaạl omhiịn mọ esi oogh asiạ bịn ibadị abuphẹ yoor otughemhị ghan bọ Baibul phọ oḍiiny muụm. Kụ onhụ abạl abukaaphọm mọ aphoph asi 35.

Epẹ Quebec, utughemhị ni iyoor ilọ oḍighi abugey abukaaphọm. AZihova akạr kụ ulhoghonhaạn ghan iyoor ḍighaạgh epẹ erugh phọ r’isiphẹ adọl aghuḍum mọ ayoor. Kụ edị eḅarạm iphẹn phọ, yoor urue ni otuughạ ilọ ophomhoghiạn onhụ phọ, we phọ, r’iḍighinhom araraạr abuọ aFrench phọ—kụ iphẹn phọ iḍighi kẹn idị yoor orue ophomhoghiạn aani iḍighinhom araraạr awe inhọn arikpisi.—2 Kọr. 6:13.

Kụ ekperenhom, bịn olạ agadạ phọ oḅẹm mọ yoor oḍuạ ogheel emhạ dị oghol mọ Tracadie, epẹ New Brunswick. Kuolọ ipaanhaạn irọl li, loor esi dị mị makpẹ ikpoki otu, ageeghiạn rinyạ ilọ otu phọ, aḅilhẹ amiịn oḍighi otughemhị ghan otu askul dị kụ ungọ imhị mem. Kụ oḅarạm isiẹn phọ, abuniin ayoor abuphẹ otughemhị ghan bọ Baibul phọ purukụ oḍighi bukaaphọm, kụ kẹn yoor rookolhobian ghan olhọgh omhoom aKindọm Họl.

Yoor usighẹ ni oomo eekunha awiki phọ ooḅereghị ilọ eḍuạ phọ, kụ yoor oghị Tracadie omhiịn idị ekpisi phọ erọl, kụ ikạr kụ egbatanhaạn r’aRimouski. Kuolọ yoor usopha mọ loor iduọn aZihova rawạ bọ mọ yoor ukị, pọ yoor kokị ni. Yoor udẹgh ni aZihova ophogh kụ omhiịn idị odị asighiọgh torobọ iyaạr dị egbororian eten phọ ayoor. (Mal. 3:10) Loor iḍuọn aRandi amhoọgh bọ igey asiya r’aZihova, ra/wạ ghan bọ ilọ aloor, kụ ramaạr ghan bọ oḍighi ilọ areẹgh eḍuạ phọ idughanhaan ni iyoor.

ARobert Ross bịn kụ ogina okumor oye dị arọl ghan omhoom ookpomhoghan phọ yoor oghị bọ. Odị makọy ni eten epẹ phọ r’anhịr odị Linda, kụ bidị osopha ogboton orọl epẹ phọ mem mọ bidị omhạr bọ oḅẹl obumoọny phọ abidị. Ghalhamọ r’iduọn bidị r’ookonhom bọ obumoọny phọ abidị, bidị ughị ni ghisigh ukparamhị ghan iyoor esi oghuraam ghan ayoor ḅilhẹ r’esi oophugh phọ abidị epẹ erugh phọ.

YOOR UMHOOGHỌM GHAN NI IBO OKUMUAN ATOROBỌ EKPISI DỊ EMHOGHI OLHOGHONHAẠN AḌIGHAẠGH

Kụ yoor mokọy eten esi iyạl asiạ epẹ Tracadie, bịn oḅilhẹ ungọ iyoor eepoogh dị olhoghi yoor u/seere—umhạgh iyoor oghị oḍighi opoghom eghir. Yoor urọl eghir dị roḅạ ghan Aḅekeeny esi oḍual asiạ, kụ ipẹ reten kụ usighẹ iyoor oghị eghir dị roḅạ ghan French epẹ Quebec. Opoghom eephugh phọ ayoor epẹ Quebec, umor phọ Léonce Crépeault, asereghiạn ghan ni raghaạph phọ mị angọ ghan bọ. Kuolọ o/wilhẹ ghan opuru amhị mọ, “Ika kụ edị awe phọ kotue osighẹ ipẹ nạ aghaạph bọ oḍighinhom siphẹ adọl aghuḍum mọ abidị?”a Ogbolhomaam mọ odị ophọn phọ ulhoghonhaạn imhị ḍighaạgh odughe eten itughemhị phọ amhị pidị awe orue onhaghanhạn.

Eniin eepoogh arukumuan dị ungọ imhị dị mị ka/tue ni bịn abula pọ amem mọ ophạm bọ Ogbogh Okpomhoghan Eephugh phọ “Victorious Faith” lhạ phọ 1978, epẹ Montreal. Mị urọl gạ iikolhobian ilọ ariiḍien phọ. Yoor uukolhobiạn ongọ eḍien 80,000 awe, r’osighẹ oḍighinhom emhoom eten phọ omiteom bọ ookolhobian ariiḍien phọ. Oomo araraạr phọ iḍighi imhoom: araraạr phọ kosaạm bọ, ariiḍien phọ, ḅilhẹ areten phọ kosạ bọ riiḍien phọ. Yoor umhoọgh 20 asifrige, kuolọ eeni amem ingọ ghan ni iiḅaghamhị. Yoor u/tue umiigh iikolhobian ḍughul phọ eḅaạl komiigh bọ ookpomhoghan eephugh phọ, loor esi dị uphạm ephegh esi phọ. Esi iduọn phọ, yoor u/tue uḍighi iyaạr tutụ kogbo aḍughul. Kụ iwạ mọ yoor usuughị oven phọ kosaạm bọ riiḍien phọ kụ aḍiroọr egbi oḅaạl, orue ookolhobian eḍien aḍiroọr! Aloor ayoor medugh mem mọ opọ phọ, kuolọ mị utuughạ ni iyaạr iboom esi ikuph phọ, akpọ olhoghi, ḅilhẹ r’ilọ areẹgh phọ abuphẹ omiteom bọ loor. Yoor uḍigh ni righirị, kụ asiya arighirị phọ ipẹ phọ edi ni k’aḍio arodon. P’eeghe ibo dị mị amhoọgh orọl aani isiphẹ ogbogh ookpomhoghan eephugh phọ opọ, epẹ Quebec, ekpisi dị igbiphoghọm dị ebụgh ni iboom erọl igbo alhạ phọ 1940 r’1960!

Mị utuughạ ni iboom araraạr esi abueriphọ abupoghom mọ siphẹ ookpomhoghan eephugh phọ epẹ Montreal. Ḍiniin alhạ, aDavid Splane, opọ nyiidiphọ aḍighi bọ oniin siphẹ Aloor Phọ Repogh bọ kụ aphogh buphẹ ophạm bọ iiḍighi ookpomhoghan eephugh phọ. Kụ mem dị ophạm onhọn ookpomhoghan eephugh, kụ uḅenhị imhị ophạm oḍighi phọ opọ phọ, aDavid Splane ubakị ni imhị.

Yoor mokumuan esi 36 asiạ siphẹ oḍighi opoghom eghir phọ, bịn lhạ phọ 2011 umhạgh imhị oḍighi otughemiạ Askul Ikumor Awe Arokpomhoghan. ARandi r’amhị umhinhạ 75 arimhinhạ esi iyạl asiạ, kuolọ arikiạ phọ yoor ophinyọn bọ ikpeanhaạn ni. Eekunha atorobọ awiki, olhoghi ikumor awe phọ abuphẹ orọl bọ askul phọ akạr ghan kụ aḅaạl loor ogbolhomaam mọ Aloor Phọ Repogh bọ omhoọgh bọ ilọ asiya phọ abidị r’aZihova.

Ipẹ reten, kụ mị amhiigh otughemhị School for Kingdom Evangelizers. Aloor anmụny askul phọ ikạr ghan kụ edugh loor edeọm ituughạ phọ: orọl ghan ekụ oḍual awạ torobọ aḍio, osighẹ ghan iraạr awạ aalhạm aḍinyạ torobọ aḍughul, r’ophạm ghan inya obobọ oogh asaimẹnt torobọ awiki. Ophoriphọ otughemhiạ phọ r’amhị uḅenhị ni nmụny askul phọ mọ bidị ko/tue oḍighi oomo phọ iphẹn phọ dị aZihova kụ u/lọgh ḍighaạgh. Mị ka/bulha idị eḍighi ghan iikia esi anmụny askul phọ mem dị bidị omhiịn iikiạ araraạr phọ aZihova alhoghonhaạn ghan bọ bidị ḍighaạgh oḍighi.

OḌEENHAAN GHAN OGBOLHOMAAM RESIGHẸ GHAN NI KERU ḌISẸPH KIROKIRỌ

Ogbolhomaam mọ onhiin phọ amhị aḍeenhaan ghan bọ bunhọn ilhoghonhaạn ni ḍighaạgh buphẹ odị ratughemhị ghan bọ Baibul phọ ophoph oghị aghisigh, kụ eḅilhẹ enme ephoghom mọ odẹ phọ amhị amhoọgh bọ aghị esi igey phọ. Onhiin phọ amhị amhugh bọ iraạr aḍughulotu kụ iten, bịn odẹ arelhẹ aḍigh Kindọm Họl onhaghạn oghaạph ogbo, kụ odị aghiọm ni ghisigh esi 26 asiạ. Kụ ghalhamọ r’iduọn odị u/ḍiiny bọ muụm, ikumor awe ookpomhoghan phọ uḅẹm mọ odị kụ aḍighi ghan oḅẹl oye ophụr ghan oru ituughạ torobọ awiki.

Onhiin phọ amhị akạr kẹn aḍighi egey eḍeenhaan ungọ iyoor anmụny phọ odị. Oomo iraạr abumaranhi phọ amhị r’aburulom mọ abidị okị ni ghisigh rokumu aZihova. Iyạl phọ abumaranhi phọ amhị rokumuan ghan epẹ ilạ agadạ phọ—aPortugal r’aHaiti.

ARandi r’amhị rokumuan ghan nyiidiphọ idiphọ abukọy eten opọ agbatanhaạn bọ epẹ Hamilton, Ontario. Mem mọ yoor odi bọ rokumuan opoghom eghir phọ, yoor ughelhọm ni odạph ghan abumor r’abumaranhi phọ oghị omhiịn awe dị bidị oguan oḅilhẹ oḅula r’awe dị bidị rotughemhị ghan Baibul. Kuolọ nyiidiphọ olhoghi ayoor raḅaạl ghan omhiịn dị buphẹ yoor rotughemhị bọ Baibul phọ oghị ghisigh rokparamhị siya phọ abidị r’aZihova. Idiphọ asiya arighirị phọ yoor omhoọgh bọ r’abumor r’abumaranhi phọ rekpạr bọ, rikparamhị ghan iyoor omhiịn idị aZihova rabakị bidị simem dị enhighẹ r’asimem dị eeph.

Mem dị yoor ophogh omhạn, yoor rosereghiạn ghan ni ogbolhomaam mọ ibadị abumor r’abumaranhi phọ uḍeenhaan ghan bọ iyoor. Ḍieriphọ aḍighaạgh phọ, yoor mokparaghạ ni “ophẹl ghan” abunhọn, okparamhị abidị dị bidị kotue okumu aZihova eten phọ epẹ bidị kotue bọ. (2 Kọr. 7:6, 7) Esi omaạm, eniin eghunotu, anhịr phọ, oọny phọ, ḅilhẹ r’onyanhị phọ moḍigh rukumuan oomo amem mọ. Mị upuru ni odẹ phọ iyaạr phọ eḍighi bọ kụ odị ko/mhiigh aani bọ okọy eten opọ oomo amem mọ. Odị uphagharanhaạn imhị m’onọ raloghonhaạn ghan ḍighaạgh iraạr abukọy eten. Kụ mị apuru nyodị mọ, “Nạ katue ni aloghonhaạn bidị ḍighaạgh apu aZihova ḍughụm?” Mị uromha ni nyodị okọy aani eten kụ oghelhọm aani idiphọ bidị rokelhọm bọ. Odiiny arunwanyụ reten bịn odị aḍighi okọy eten.

ARandi r’amhị kokiọm ni ghisigh “ogbeelhom iikpọ r’igbogh” phọ aZihovạ “oḅenhị oghiil phọ ratu bọ,” kụ yoor oḍuom ni olhoghi mọ bidị kokelhọm ni rukumuan phọ aZihova eten phọ ephẹn yoọr moghelhọm bọ.—Ps. 71:17, 18.