Ilọ Orue Okpạr Opu Ipaanhaạn Dị Retọl Ghan Mem Dị Oye Phọ Aghị Omhoom Ookpomhoghan

ANicolas r’aCéline usoman ni ipaanhaạn dị egbatanhaạn. Olạ agadạ phọ aFrance uḅenhị bidị oḍuạ ookpomhoghan phọ abidị oghị onhọn ookpomhoghan. Bidị uḅẹm mọ: “Eḅẹl amem mọ olhoghi ayoor aḅaạl li, kuolọ esighẹ rekị bịn inyaam arighirị phọ ayoor emhiigh osiph ayoor. Kụ arighirị phọ ayoor r’abuẹn odi bọ omhoom ookpomhoghan phọ ayoor ke/kpạr agey.”a Loor esi ipaanhaạn phọ iphẹn phọ edi bọ, eeghe kụ keloghonhaạn ḍighaạgh oye dị aḍuạ aghị omhoom ookpomhoghan omhoọgh ekol r’oḅaạl olhoghi? Ighẹn areten kụ edị abunhọn kologhonhaạn ḍighaạgh? Kụ ika kụ edị nạ katue akparamhị bunhọn kụ abunhọn oḅilhẹ okparamhị aani nyinhạ?

INYA ARARAẠR DỊ KELHOGHONHAẠN NYINHẠ ḌIGHAẠGH OGHELHỌM OMHOOM OOKPOMHOGHAN PHỌ

1. Beḍenhọm aZihova. (Ps. 37:5) AKazumi, epẹ Japan, awilhẹ ni ookpomhoghan dị odị marọl li iyạl-dị asiạ aghị ookpomhoghan dị akelhạn, mem dị otu oḍighi olom mọ odị osighẹ olom mọ oghị enhọn ekpisi. Ika kụ edị odị “aḅọgh bọ eten [odị] angọ aZihova”? Odị aḅẹm mọ: “Mị ugbor ghan ni aḅenhị aZihova idị oghiilhaan phọ r’adọl iginhi phọ itir imhị. Mị uḅenhị kẹn ni nyodị ooḅaghamhiạn aloor phọ mị amhoọgh bọ. Torobọ amem lọ mị aḍighi iduọn phọ, aZihova ungọ ghan ni imhị inyaạm mọ mị amhoghi bọ.”

Ika kụ edị nạ katue akuamhị abeḍenhọm aZihova? Idiphọ iizuphạ rewạ ghan bọ ni muụm r’enhuụm ade phọ orue oḍum, kụ edị omheeraam mọ ayira awạ ni muụm r’enhuụm orue obụgh. ANicolas, oghaạph bọ oghol epẹ omhạn, agbirima ghan ni reḍeenhaan awe dị ophinyọn ibadị arikiạ orue oḍighi ogbi phọ Enhaạn, idiphọ Abraham, Zizọs, r’aPọl. Kụ iphẹn phọ iḍighi idị odị akuamhị aḍuomolhoghi mọ aZihova kaloghonhaạn ni nyodị ḍighaạgh. Ogbor ghan ophạm ituughạ aBaibul ilọ oghinha oye phọ, keloghonhaạn oye phọ ḍighaạgh orue omerenyạn torobọ onmia dị kamite ghuḍum oye phọ. Kụ oye phọ aḅilhẹ atuughạ raraạr dị oye phọ kasighẹ akparamhiọm bunhọn awe siphẹ omhoom ookpomhoghan phọ.

2. Ka/sighẹ ogbaany ookpomhoghan phọ anạ atomaạm omhoom mọ. (Eccl. 7:10) Mem dị aJules aḍuạ Benin aghị United States, odị amhiịn mọ oboom ogbaranhaạn odi ni esi eḍighinhom araraạr phọ. Odị aḅẹm mọ, “Ighịgh mudị mị kakaạph ghan ilọ amhị aḅenhị torobọ oye dị mị ateẹny.” Loor iduọn eḍighinhom araraạr phọ egbatanhaạn bọ r’ogbaany ookpomhoghan phọ odị, iḍighi ni iyaạr dị odị amhiigh orọl ghan asạm siphẹ omhoom ookpomhoghan phọ. Kuolọ eten iitughiạn phọ odị inmia ni mem dị odị akuamhị alegheri bumor r’abumaranhi phọ. Odị aḅẹm mọ: “Mị mamhiịn mọ awe siẹn oomo aḅirinhi phọ oḍighi ni buniin. Eten phọ bidị roḅạ ghan bọ koḅilhẹ oḍighi raraạr kụ igbaranhaạn. Emạn ni maạr oghuraam atorobọ oye ghalhamọ eḍighinhom araraạr phọ abidị egbatanhaạn ni r’ipẹ ayira.” Loor esi iphẹn phọ, ka/sighẹ ogbaany ookpomhoghan phọ atomaạm omoom mọ. Oniin onyọ umaranhi dị aḍighi okọy eten dị oghol mọ Anne-Lise, aḅẹm mọ, “Mị u/kị emhoom ekpisi phọ owaaghị igbaany araraạr phọ erọl bọ egbaany ekool phọ amhị. Mị ughị owạ r’otuughạ imoom.”

Emoghi kẹn ni dị ikumor awe ookpomhoghan phọ ko/tomaạm ogbaany ookpomhoghan abidị r’omoom mọ. Kotue ni osighẹ kirokirọ areten kụ oḍighinhom eniin iyaạr. Esi iduọn phọ, kaa/tughiạn mọ eten phọ omhoom ookpomhoghan phọ roḍighi ghan bọ raraạr i/nighẹ. Keḍeenhaan ni osụ-olhoghi omhaạr olhegheri ipẹ roḍighi ghan bọ raraạr siphẹ omhoom ookphomhoghan phọ anạ, kụ ogbi osogh aḍiitughiạn anạ. (Eccl. 3:1, 7b) Enighẹ ghụn dị abumor phọ kotuughạ iyaạr esi imạ araghaarạ phọ anạ, kparipẹ rokpaariọm abidị oḍighi araraạr ipẹ nạ rawạ bọ.—2 Kọr. 1:24.

3. Ḍiiḍikuan r’abumor r’abumaranhi ookpomhoghan phọ. (Fil. 1:27) Onme adọl resighẹ ghan ni mem r’inyaạm, kuolọ ekpeanaạn ni dị oye phọ kakị ghan ituughạ r’aloor. Eḍighi iyaạr dị edugh ni, pọ oye phọ aghị ghan ituughạ r’aloor kemiighom mọ. Okạr oghaạph, amem dị nạ agbor ghan aghị ituughạ siphẹ omhoom ookpomhoghan phọ kụ edị abumor r’abumaranhi phọ kolegheri nyinhạ oḅilhẹ otuman nyinhạ, kụ owạ reten olhoghonhaạn anạ ḍighaạgh mem lọ ewạ. ALucinda, dị aphạm iyạl anmanyaạn odị aghimọm egbogh emhạ epẹ South Africa, aḅẹm mọ: “Arighirị amhị uromha imhị oḍuraan otuman we omoom ookpomhoghan phọ ayoor, ogbor ghan omite epẹ erugh phọ, r’oḅilhẹ ghan ophagharanhaạn aani aḍipuru mem ituughạ. Yoor uḅilhẹ kẹn ni omiteom marugh phọ ayoor mọ eḍighi esi dị kopạm ghan ruupuruan omite epẹ erugh phọ.”

Ooḅughonhaan ghan r’abumor r’abumaranhi ookpomhoghan phọ keloghonhaạn ḍighaạgh okparamhị omheeraam mọ anạ r’omheeraam abunhọn. Ilọ Anne-Lise, oghaạph bọ oghol epẹ omhạn, ikumor awe ookpomhoghan phọ uromha nyodị mọ akparaghạ orelhean atorobọ oye siphẹ ookpomhoghan phọ. Kụ eeghe asuọ kụ aḅuạ amite? Odị aḅẹm mọ: “Ephẹn phọ ekạr eten dị keloghonhaạn oye phọ ḍighaạgh oḍighom awe ookpomhoghan phọ.” Renighẹ ghan kẹn ni omiteom aloor oye phọ oḍighi aani oḍighi mem dị roḍighi oḍighi siphẹ aKindọm Họl phọ. Epẹ phọ eten omạ omiteom mọ nyiidiphọ nạ masighẹ omoom ookpomhoghan phọ idiphọ olọ anạ. Iphẹn phọ keloghonhaạn ḍighaạgh dị abumor r’abumaranhi phọ kosighẹ nyinhạ idiphọ apakirị eghun otu phọ.

4. Ḍigh imhoom arighirị. (2 Kọr. 6:11-13) Oḍigh arighirị r’abumor r’abumaranhi phọ eḍighi emạ eten oḍeenhaan mọ nạ amoọgh ni ogbolhomaam abidị. Esi iduọn phọ, kenighẹ ni dị nạ kaḅon ghan akị ituughạ, kụ atolhọm enụm mem dị ituughạ phọ memiteghu pidị nạ amoọgh mem oghaaphạn r’abumor r’abumaranhi phọ. Kparaghạ olhegheri asiḍien abidị. Mem dị nạ aatughiạn ghan siḍien awe kụ aghaaphạn ghan bidị idiphọ arighirị, keḍighi ni idị nyinha keḍighi igey arighirị.

Ḍeenhaan bumor r’abumaranhi phọ okạr oye phọ nạ aru bọ, pidị bidị okạr olhegheri nyinhạ. ALucinda aḅẹm mọ, “Loor iduọn yoor omhạgh ghan bọ bumor r’abumaranhi oru k’ayoor olhe eḍien r’ayoor, yoor mokạr omoọgh igey arighirị nyiidiphọ.”

‘ONIIN ALHOGHOMẠ GHAN NYONIIN’

Eeni amem, oḅio oye phọ rakaph ghan ni orelhe oḍigh aKindọm Họl dị awe phọ oye phọ u/legheri. Esi iduọn phọ, nạ kaḍighi eeghe orue olhoghonhaạn aḍighaạgh we dị purukụ oru ookpomhoghan anyinha? Otelhedom mọ Pọl aromha mọ: ‘Oniin aIoghomạ nyoniin idiphọ aKraist miloghomạ bọ inyina.’ (Rom 15:7) Mem dị ikumor awe phọ otuughaạny Kraist, bidị kotue ni ologhonhaạn ḍighaạgh oḍighi idị abumoom awe dị oru ookpomhoghan phọ kokelhọm. (Miịn igbe phọ “Ilọ Oghelhọm Emhoom Ekpisi Dị Oye Phọ Aghị.”) Toroboiperolbọ, ghalhamọ r’ibạm anmụny siphẹ ookpomhoghan phọ kotue ni ologhonhaạn ḍighaạgh bumoom awe dị oru oghelhọm ookpomhoghan phọ.

Iniin areten oḍeenhaan mọ oye phọ aloghomạ ni oye pọ omhạgh aani oye phọ oru olhoghi otu olhe aani oọny iyaạr, rongọ olhoghonhaạn aḍighaạgh dị akpeanhaạn. Esi omaạm, oniin onyọ umaranhi alhoghonhaạn ni ḍighaạgh onhọn onyọ umaranhi dị purukụ aghị ekpisi abidị olhegheri ariisi ekpisi phọ, r’araraạr dị ketue esaạny nyodị eḍighi maạr dị odị rawạ oghị esi. Eḍighinhom iyaạr onyọ umaranhi phọ ophọn phọ itir ri onyọ umaranhi phọ kụ elhoghonhaạn nyodị ḍighaạgh oghelhọm ekpisi phọ.

EEPOOGH OPHOPH OGHỊ AGHISIGH

Tutụ igurubia kepeẹph, renmeeghian ghan ni raphaaph phọ abidị ibadị amem kụ egbi omhoọgh idị kesighẹ epeephọm. Eniin phọ eten phọ kẹn, mem dị oye phọ aghị omhoom ookpomhoghan, enighẹ ni otebeneghi oomo araraạr dị ke/meera mọ oye phọ aphoph aghị ghisigh. ANicolas r’aCéline uḅẹm mọ: “Onme ookpomhoghan rengọ ghan oye phọ eepoogh otuughạ iboom araraạr. Ooḅukuan r’abumoom awe r’emoom ekool reloghonhaạn ghan ḍighaạgh oye phọ omhoọgh imhoom araagharạ.” Jean-Charles, oghaạph bọ oghol epẹ omhạn, aghaạph ni suọ dị eghunotu odị momhoọgh. Odị aḅẹm mọ: “Siẹn yoor onme bọ ookpomhoghan phọ, ibạm anmụny phọ ayoor mokạr okị ghisigh omoọgh siya dị ekpạr r’aZihova. Iyạl ikpo arunwanyụ reten, bịn onyanhị phọ ayoor amiigh ni ophạm apakirị siphẹ ituughạ ogbo awiki phọ. Kụ oọny phọ ayoor maḍighi okaaphọm dị muụm ko/ḍiiny.”

Nạ kaḍighi ika eḍighi maạr dị adọl phọ anạ i/meera onme ookpomhoghan phọ anạ obobọ oghị ekpisi dị ewaạm mọ ebụgh? Nạ atue ni aḍighi idị ookpomhoghan phọ nạ odi bọ kakịgh omoom ookpomhoghan esi osighẹ oḍighinhom raraạr phọ omaaghị bọ siẹn phọ. Iduọn nạ abeḍenhọm bọ aZihova, kạr aphinhom aani bin oomo araraạr phọ roḍighi ghan bọ siphẹ ookpomhoghan phọ, aakolhobian ghan idị nạ katelhean bumor r’abumaranhi kirokirọ epẹ erugh phọ. Ḅilhẹ ḍigh imoom arighirị obobọ kparamhị siya igbaany arighirị phọ anạ. Nạ atue ni awạ reten dị nạ kaloghonhaạn ḍighaạgh bumoom awe dị purukụ oru aani obobọ we dị omhoghi olhoghonhaạn aḍighaạgh siphẹ ookpomhoghan phọ. Loor iduọn ephomhoghiạn kụ eḍighi bọ elhegh abugey aKristẹn, nạ aḍighi ghan iduọn phọ keloghonhaạn ḍighaạgh dị asiya anạ r’aZihova kegbiphạn. (Jọn 13:35) Nạ katue ni akuphom owol mọ iphẹn phọ arikiạ dị ‘reḅaalhamhị ghan ologhi Enhaạn.’—Hib. 13:16.

Etigheri ipaanhaạn phọ retọl ghan bọ, ibadị aKristẹn dị moghị imhoom arookpomhoghan momhooghọm ni suọ oḅilhẹ rokelhọm, kụ nạ kakelhọm aani kẹn ni! Anne-Lise aḅẹm mọ: “Oghị omhoom ookpomhoghan phọ milhoghonhaạn imhị ḍighaạgh dị mị malhegheri ibadị abumor r’abumaranhi.” Kazumi aḅẹm mọ: “Nyiidiphọ kụ edị mị akạr alhegheri mọ oghị onhọn ookpomhoghan phọ keloghonhaạn ḍighaạgh dị oye phọ kamiịn olhoghonhaạn aḍighaạgh aZihova reten dị oye phọ olhoghi u/seere.” Kụ kokaạph aani ika ilọ aJules? Odị aḅẹm mọ: “Imoom arighirị phọ mị mamhoọgh bọ mekạr eḍighi idị mị maḍighi pakirị omoom ookpomhoghan phọ. Nyiidiphọ omoom ookpomhoghan phọ amhị muḅeraạn imhị asi esi dị kikparanhaạn ni imhị oḍuạ.”