Kparaghạ Otuughạ Imhoom Araraạr

Mem dị yira rookolhobian otuughạ, yira otue ni opuruan loor mọ, ‘Eeghe iyaạr kụ edị mị ragon otuughạ?’ Toroboiperolbọ, ekpẹ ni ogona aloor obọ ipẹ yira rogon bọ otuughạ phọ ke/ḍighi idị yira ko/tue omiịn inhọn araraạr dị aZihova rawạ otughemhị ayira. Eeghe kụ ketue elhoghonhaạn nyinhạ ḍighaạgh oseere olhoghi otuughạ imhoom araraạr?

Ḅeeḅereghị alhọm osụ olhoghi. Lọm aZihova alhoghonhaạn nyinhạ ḍighaạgh orue onhaghanhạn ipẹ odị rawạ bọ mọ tuughạ mem mọ amuphẹ phọ. (Jems 1:5) Kparipẹ r’obeḍenhọm ghan igbaany araraạr dị nạ alhegheri, kiọm ghisigh atuughạ imhoom araraạr.—Prov. 3:5, 6.

Lọgh eegu iikpọ Ekpo Onhụ phọ Enhaạn. Ekpo Onhụ phọ Enhaạn ‘reḅạ ni eye.’ (Hib. 4:12) Ketue ni itir iyira kirọ eten obobọ itughemhị iyira emhoom iyaạr torobọ amem dị yira otuughạ—kuolọ iphẹn phọ ketue edugh mem dị yira ookolhobian otuughạ imhoom araraạr kụ omhooghọm asuọ ipẹ yira otuughạ bọ.

Sereghiạn ni torobọ iyaạr dị aZihova amiteom otughemhiọm ayira. Araraạr phọ aZihova amiteom bọ okparamhiọm omheeraam mọ ayira eḍighi “male eyaạl dị eḍien phọ ekạr emhunhughan.” (Isa. 25:6) Ka/pel ghan aạl arumhuoghaạph dị nạ aatughiạn mọ nạ ra/kelhọm. Nạ ka/mooghọm suọ bịn kuolọ nạ kakạr kụ amoọgh ḍiḅeraạn esi ipẹ Enhaạn amiteom bọ!