Ḅilhẹ Aaḅula Ikpanhạ Araraạr Phọ

Mekparanhaạn ghan ni nyinhạ ootughiạn araraạr dị purukụ nạ atuughạ ni ḍughụm? Ipẹ phọ remitenhaan ghan ni oomo ayira eeni amem. Eeghe kụ kelọgh ḍighaạgh? Buuḅula ghan ikpanhạ araraạr phọ.

Iduọn nạ ratuughạ bọ, tọ ghan mem asophe aatughiạn ikpanhạ araraạr phọ nạ matuughạ bọ. Lọgh elhegh idị aPọl alhoghonhaạn ḍighaạgh buphẹ aạl bọ ḍinyạ phọ odị agẹ bọ orue oḍighi iduọn phọ. Odị aḅẹm mọ: “Emụ iphẹn yoor rokaạph ghan bọ iduọn.” (Hib. 8:1) R’ikpo-onhụ phọ ipẹ phọ, odị alhoghonhaạn ḍighaạgh buphẹ ronaghạn bọ orue odaphạn etẹn iitughiạn phọ odị, ḅilhẹ r’olhegheri idị ekpanhạ iyaạr phọ emhoọgh muḅoọph r’emhuoghaạph phọ.

Nạ atue ni asugheeny mem, eeni ḍioph ikalhạ otuughiạn ghan ikpanhạ araraạr phọ nạ atuughạ bọ. Eḍighi maạr dị nạ u/tue uutughiạn, pọ pogh ibạm arumhuoghaạph phọ obobọ ḅilhẹ aạl iḅẹl igẹ atorobọ ekpịgh phọ, pidị nạ arue aatughiạn ipẹ nạ aạl bọ. Nạ atuughạ emhoom iyaạr, sighẹ ikpo-onhụ ilọ anạ aghaaphọm ipẹ nạ anhaghanhạn bọ. Nạ aaḅula ghan ikpanhạ araraạr phọ nạ atuughạ bọ, kelhoghonhaạn nyinhạ ḍighaạgh ootughiạn ghan araraạr dị nạ atuughạ kụ nạ aḅilhẹ amiịn ipẹ nạ kasighẹ bọ aḍighinhom.