Asipuru Dị Abuẹn Robạl Ghan Bọ Rinyạ Phọ Ayira Opuru
Abuọ anhiạn kụ “aruukpaạny phọ Enaạn esaḅạr bọ” oghaạph bọ oghol siphẹ 1 Timoti 5:21?
Otelhedom mọ Pọl agẹ ni ḍinyạ aghiọm Timoti aḍighi aani bọ oniin okumor oye kụ aḅẹm mọ: “Mị asighẹ ḍien Enaạn [r’aZizọs Kraist] r’aruukpaạny phọ Enaạn esaḅạr bọ kụ raghiremi nyinạ iyọ mọ naghanạn ikpo onhụ oroma phọ iphẹn phọ, kụ torobọ ilọ nạ raḍighi, ka/seeghị ghan we.”—1 Tim. 5:21.
Omhiịn ophagharanhaạn aḍipuru phọ, ophụr oghaạph ilọ aruukpaạny dị u/ḍighom aani egu phọ ephẹn phọ. Esi omaạm, eegholhaan ni mọ 144,000 abuphẹ kokeel bọ epẹ k’akẹ phọ u/ḍighom aani egu phọ ephẹn phọ, loor esi dị mem mọ aPọl agẹ bọ ḍinyạ phọ aghiọm Timoti, ko/ḅeton r’oniin onyọ abuẹn phọ oghimọm k’akẹ. Abutelhedom mọ r’abunhọn awe dị omhoọgh aani oḍuomolhoghi ogheel k’akẹ ko/ḍighi ruukpaạny, esi iduọn phọ bidị ko/tue oḍighi ‘ruukpaạny phọ Enaạn esaḅạr bọ’.—1 Kọr. 15:50-54; 1 Tẹs. 4:13-17; 1 Jọn 3:2.
Oḅarạm isiphẹ, “aruukpaạny phọ Enaạn esaḅạr bọ” ko/tue oḍighi ruukpaạny phọ abuphẹ aZihova u/naghanhạn bọ mem Amuụm-aḍigho phọ aNoa. Aruukpaạny phọ abuphẹ phọ uḍighan Setan bịn oḍighi ikarạph aruwaloor. Esi iduọn phọ, bidị uḍighi mulhọgh ḍien aZizọs. (Gen. 6:2; Luk 8:30, 31; 2 Pit. 2:4) Ghisigh aZizọs kasumeeny bidị ooni dị eekunha i/lo, kụ bidị otọl siphẹ phọ esi oniin oonịr asiạ. Kụ ipẹ reten, kụ oḅạr bidị r’aSetan opiemhi.—Jud 6; Ogan. 20:1-3, 10.
Esi iduọn phọ “aruukpaạny phọ Enaạn esaḅạr bọ,” oḍighi ruukpaạny dị odi epẹ k’akẹ phọ dị obakị “Enaạn [r’aZizọs Kraist].”
Aruukpaạny dị oḅạr Enhaạn oḍighi ni simuonịr asimuonịr. (Hib. 12:22, 23) Kụ mem emhạn mem, aZihova rangọ ghan ni bidị iiḍighi kirokirọ. (Ogan. 14:17, 18) Esi omaạm, aZihova arom ni oniin ookpaạny oghị ozẹ 185,000 awe eghạm Asiria. (2 Ki. 19:35) Eeni aZihova malhọgh buniin aruukpaạny dị kokị siphẹ “Omạr phọ [aZizọs] ookpomoghi oomo asinị ikarạph r’abuḍighinom ikarạph osighẹ.” (Mat. 13:39-41) Kụ eeni otom ni bunhọn “ookpomoghi abuphẹ dị masaḅạr bọ” oghimhọm k’akẹ. (Mat. 24:31) Kụ eeni Enhaạn angọ kẹn ni bunhọn oḍighi ‘oghoph ayira esi oomo areten phọ ayira.’—Ps. 91:11; Mat. 18:10; poghom Matiu 4:11; Luk 22:43.
“Aruukpaạny phọ Enaạn esaḅạr bọ,” oghaạph bọ oghol siphẹ 1 Timoti 5:21 umhoọgh oḍighi dị agbatanhaạn ophogh awe phọ odị. Siphẹ phọ aPọl, aghaạph ghan ipẹ ikumor awe phọ kopạm bọ iiḍighi phọ abidị, ḅilhẹ mọ ookpomhoghan phọ olhọgh eegu ikumor awe phọ. Pakirị phọ opọ abidị, ikumor awe phọ kopạm iiḍighi phọ abidị eten dị ‘ko/seeghị ghan we,’ ḅilhẹ ko/sopha ghan osopha obobọ osoph iiruẹn dị u/pụr uutughiạn. APọl amạ ni amiteom ekpanhạ ephigh phọ ewạ bọ ni dị ikumor awe phọ kodaphạn oromha phọ odị, odị aḅẹm mọ, “Enaạn [r’aZizọs Kraist] r’aruukpaạny phọ Enaạn esaḅạr bọ” ropogh ni ipẹ bidị roḍighi bọ iiḍighi phọ abidị. Kụ iḍighi kụ, eegholhaan ni mọ ongọ ni buniin aruukpaạny iiḍighi dị egbolhomaam ookpomhoghan phọ, idiphọ oghoph ghan ayira, ophogh oḍighi oghaạph iiḅi iinhaghạn phọ, kụ oghaạph ghan oḅenhị aZihova ipẹ rekị bọ.—Mat. 18:10; Ogan. 14:6.