Kaa/binyemhiom Oḍiiny Amuụm

1. Eeghe kụ iniin imạ ariphigh phọ nạ amhoọgh bọ otuạn oḍiiny amuụm?

NẠ APOMOGHIẠN ni aZihova, opọ angọ bọ nyinhạ torobọ imạ inmo ghalhamọ r’inmo aghuḍum mọ ḍughụm? Nạ rawạ ni oḍeenhaan mọ nạ apomhoghiạn ni nyodị? Emạ eten oḍighi iduọn phọ pọ oḅọgh aloor ongọ odị kụ oḍiiny amuụm. Nạ agbariọn radạ phọ iphẹn phọ, pọ nạ kaḍighom aani ni pakirị eghunotu phọ aZihova. Loor emhụ ipẹ phọ, aZihova phọ maḍighi bọ Odẹ ḅilhẹ r’Oyaghirị anạ kaaḅakị ni nyinhạ, loor esi dị nạ maḍighi aani pakirị eghunotu phọ odị. (Ps. 73:24; Isa. 43:​1, 2) Oḅọgh aloor anạ ongọ kụ oḅilhẹ oḍiiny amuụm kengọ nyinhạ eepoogh oghelhọm aghuḍum dị eekunha i/lo.—1 Pit. 3:21.

2. Yira kooḅeghiọn eeghe siẹn emhuoghaạph phọ ephẹn phọ?

² Iyaạr edi ni dị resophoghom nyinhạ oḍiiny amuụm ḍughụm? Eḍighi idiphọ, pọ legheri mọ ko/gina anạ bịn. Irubal awe monmeeghi ni roozọ ḅilhẹ r’areten iitughiạn phọ abidị orue osi omhanhanhaạm oḍiiny amuụm. Nyiidiphọ, bidị rokumu aZihova r’ibo ḅilhẹ r’oophugh. Eeghe iyaạr kụ edị nạ katuughạ esi abuniin abudị oḍiiny muụm siphẹ oḅẹl okuron asiạ phọ? Uguạ, ooḅeghiọn iniin araraạr dị bidị osoman dị mitue ni esophoghom bidị oḍiiny amuụm ḅilhẹ r’araraạr dị yira kotuughạ esi eḍeenhaan phọ abidị.

AWE ASAMERIA PHỌ UḌIINY NI MUỤM

3. Eeghe araraạr kụ mitue ni esophoghom buniin abuọ aSameria phọ oḍiiny amuụm?

³ Mem mọ aZizọs, awe aSameria phọ uḍighom aani ekụ iiḅereghị dị erọl ghan rokool aramhạ phọ eeghironhom bọ Shechem ḅilhẹ r’aSameria, epẹ esiinyọm mọ aJudea. Esi iduọn phọ, tutụ onyọ aSameria kaḍiiny muụm, iwạ ni mọ amhoọgh olhegheri iyaạr Ekpo Onhụ phọ Enhaạn. Awe aSameria phọ umheeraam ghan mọ iḅẹl oogh arinyạ aBaibul phọ emhiigh bọ Genesis kụ esi Deuteronomy, r’eeni r’aḍinyạ phọ aJoshua bịn kụ iḍighi Ekpo Onhụ Enhaạn. Toroboiperolbọ, awe aSameria phọ umheeraam mọ aMesaya phọ katu ni. Kuolọ katu idị emhoọgh muḅọph r’oguanhaan phọ Enhaạn odi bọ siphẹ Deuteronomy 18:​18, 19. (Jọn 4:25) Tutụ bidị koḍiiny muụm, iwạ ni mọ bidị omheeraam mọ aZizọs kụ aMesaya phọ oguanhaan bọ. “Ibadị awe emạ aSameria phọ” uḍighi ni iduọn phọ. (Jọn 4:39) Kuolọ iwạ ni dị abuniin awe aSameria phọ kobilhẹ eegharạ ophogh ghan oye osikị erọl bọ igbo abuọ aJu phọ r’abuọ aSameria phọ.—Luk 9:​52-54.

4. Odaphạn Iiḍighi 8:​5, 6, 14, ika kụ idị awe aSameria phọ omhegheron oghị esi iiḅi iinhaghạn phọ aFilip aghaạph ghan bọ?

⁴ Eeghe kụ ilhoghonhaạn bọ ḍighaạgh we aSameria phọ oḍiiny amuụm? Mem dị aFiIip okaaphọm iiḅi iinhaghạn phọ “aghaạph ghan iIọ aMesaya phọ” aḅenhị we aSameria phọ, buniin abidị ‘umheeraam ni oghaạph phọ Enaạn.’ (Bạl Iiḍighi 8:​5, 6, 14.) Ii, aFiIip aḍighi olọ aJu, kuolọ awe aSameria phọ ulher ri rurụ ongọ nyodị. Eeni bidị uutughiạn riisi aBaibul siphẹ iḅẹl oogh arinyạ aBaibul phọ dị eghaạph mọ Enhaạn re/lọgh ghan oye iiseẹny. (Deut. 10:​17-19) Torobọ amem dị aFiIip rakaạph, bidị ulher ri rurụ “onaghanạn ipẹ aFiIip aghaạph bọ” ilọ aKraist phọ, kụ bidị omhiịn reḍeenhaan dị emạ emiteom mọ Enhaạn kụ rabakị ni Filip. AFilip aḅilhẹ kẹn ni aḍighi ibadị iiḍaạny. Odị aakonhom ni we dị u/moonhogh aḅilhẹ aphorogh ikarạph aruwaloor dị erọl loor awe.—Iiḍ. 8:7.

5. Eeghe araraạr kụ edị nạ atuughạ esi awe aSameria phọ?

⁵ Eegharạ ophogh ghan awe osikị phọ erọl bọ igbo aSameria phọ r’aJu phọ obobọ e/moọgh olhegheri iyaạr aBaibul phọ mitue ni ekikima we aSameria phọ omheeraam adom mọ. Kuolọ bidị u/ḍighi idiphọ. Abuọ aSameria phọ uu/binya oḍiiny amuụm mem mọ bidị okuphom bọ owol mọ aFilip matughemhị bidị igey phọ. ABaibul phọ aḅẹm mọ: “Kụ anmariịr r’aIephiri umeeraam ni ooḅi oghaạph phọ opọ aFiIip aghaạph bọ ilọ omạr phọ k’Enaạn r’aḍien phọ [aZizọs] Kraist, kụ [oḍiinye] bidị muụm.” (Iiḍ. 8:12) Esi iduọn phọ, nạ akuphom ni owol mọ Ekpo Onhụ phọ Enhaạn kụ igey phọ ni, ḅilhẹ Abugbaanhaạn AZihova ro/pogh ghan we kosikị, kụ rokparaghạ ghan kẹn oḍeenhaan egey ephomhoghiạn phọ eḍighi bọ elhegh abugey aKristẹn ḍughụm? (Jọn 13:35) Nạ amheeraam ni, pọ ka/kiilhaan oḍiiny amuụm. Nạ aḍighi iduọn phọ, pọ aZihova kasẹph ni nyinhạ.

6. Nạ atuughạ eeghe siẹn eḍeenhaan phọ aRuben?

⁶ Ooḅeghiọn eḍeenhaan aRuben. Odị olọ aGermany, kụ uukonhom nyodị eghunotu Abugbaanhaạn. Toroboiperolbọ, mem dị odị aḍighi onyọ iḍoọgh odị amhoọgh ni iikia mughumọ Enhaạn akạr ri odi. Ika kụ idị odị akpạr bọ apu iikia phọ odị? Odị amhiịn mọ olhegheri iyaạr phọ odị k”obụgh ilọ oghaạph phọ ophọn phọ. Esi iduọn phọ, odị asopha owaaghị araraạr olhegheri. Odị aḅẹm mọ: “Imhoghi ni mọ mị ukpạr upu iikia phọ amhị. Esi iduọn phọ, mem ituughạ ogina amhị, mị utuughạ ni ilọ itughemhị oḅẹm mọ iyaạr eḅuạ iyaạr eten iyaạr ibadị amem.” ARuben aạl li ḍinyạ phọ Is There a Creator Who Cares About You? Aḍinyạ phọ aḍiphẹ phọ inme ni iitughiạn phọ aRuben. Kụ odị aḅenhị loor odị mọ: ‘Muạ! Enhaạn ekạr ri odi oo.’ Mem dị aRuben aghị ophogh aani emhụ agadạ phọ ayira, odị asereghiạn ni muḅọph phọ odi bọ igbo oomo abumor isiẹn aḅirinhi phọ. Odị r’oḅula Germany, odị aḍiiny ni muụm mem dị odị mamhạn 17 asiạ. Nạ amhoọgh iikia ilọ iyaạr dị nạ atuughạ, pọ waaghị raraạr siphẹ arinyạ phọ ayira. Ogey olhegheri iyaạr kalhoghonhaạn ni nyinhạ ḍighaạgh okpạr opu iikia phọ anạ. (Efẹ. 4:​13, 14) Kụ iduọn nạ ranaghạn bọ ilọ ephomhoghiạn r’amuḅọph phọ odi bọ igbo awe phọ aZihova, r’ipẹ nạ ramiịn bọ idị iphẹn phọ remite siphẹ ookpomhoghan phọ anạ, nạ kakạr kụ asereghiạn ephomhoghiạn abumor oomo isiẹn aḅirinhi phọ.

ASỌL OPỌ ATASỌS AḌIINY NI MUỤM

7. ASọl amhoọgh ghan eeghe aḍiitughiạn dị ewạ mọ aalemhi?

⁷ Ooḅeghiọn eḍeenhaan phọ aSọl opọ aTasọs. ASọl aako ghan agey eḍighinhom iyaạr r’iilhogh abuọ aJu phọ. Esi iduọn phọ, ulhegheriom ni nyodị idiphọ okpolhom oye onyọ aJu. (Gal. 1:​13, 14; Fil. 3:5) Mem mọ amuphẹ phọ, ibadị abuọ aJu phọ umhiịn Kristẹn phọ idiphọ awe dị ro/dạph mun igey phọ. Esi iduọn phọ, r’oghạgh olhoghi aSọl agbiphoghọm ghan ni bidị. Odị aatughiạn ghan ghụn mọ odị raḍighi ogbi Enhaạn. (Iiḍ. 8:3; 9:​1, 2; 26:​9-11) Tutụ aSọl kameeraam Zizọs aḅilhẹ aḍiiny muụm, pọ odị kaakolhobian kẹn osoman aani igbiphoghọm.

8. (a) Eeghe kụ ilhoghonhaạn bọ ḍighaạgh Sọl oḍiiny amuụm? (b) Odaphạn Iiḍighi 22:​12-16, ika kụ idị Ananayạs alhoghonhaạn ḍighaạgh Sọl? (Miịn kẹn afoto phọ.)

⁸ Eeghe kụ ilhoghonhaạn ḍighaạgh Sọl oḍiiny amuụm? Mem mọ aZizọs phọ moghuenhi bọ arọl bọ epẹ k’akẹ aḅaanhaạn Sọl, aḍiḅaạl isoorom ni nyodị bịn ariḍien odị eḅomoghian. (Iiḍ. 9:​3-9) Esi iraạr aḍughulotu, aSọl arọl li okoọny kụ agbirima ghan ilọ ipẹ emitenhaan bọ nyodị. Ii, aSọl maru ameeraam mọ aZizọs kụ aMesaya phọ ni ḅilhẹ abudaphạm mọ odị rodạph ni egey ekụ iiḅereghị phọ. Eeni aSọl akururu ni iboom iduọn odị aphinhomaam aani bọ ḍuugh phọ aStivin! (Iiḍ. 22:20) Kụ iraạr phọ aḍughulotu phọ r’emhunhughan, onyọ amatuạn dị oghol mọ Ananayạs aru ni ateẹny Sọl, kụ aḅariọn riḍien phọ odị eḅomoghian bọ kụ aḅilhẹ aromha nyodị mọ kuu/binyemhiom oḍiiny amuụm. (Bạl Iiḍighi 22:​12-16.) R’osooromhi aloor, aSọl anhaghanhạn ni Ananayạs bịn aḍiiny muụm aḅilhẹ amhiigh odạph emhoom eten aghuḍum.—Iiḍ. 9:​17, 18.

9. Eeghe araraạr kụ edị nạ atuughạ esi aSọl?

⁹ Yira otuughạ ni raraạr esi aSọl. Eḅẹl phọ, odị mutue ni bịn amheera mọ ophoophe aloor obobọ oghiilhaan oye akikima nyodị oḍiiny amuụm. Kuolọ odị o/mheera ipẹ phọ emite. R’osooromhi aloor, aSọl aakolhobian ni onme eten aghuḍum mọ odị pidị odị atue adạph aani Kraist. (Iiḍ. 26:​14, 19) ASọl amheera ni oḍighi onyọ aKristẹn ghalhamọ r’iduọn odị alhegheri bọ ni mọ kogbiphoghọm ni nyodị. (Iiḍ. 9:​15, 16; 20:​22, 23) Mem mọ odị aḍiiny bọ muụm, odị aghiọm ni ghisigh abeḍenhọm aZihova olhoghonhaạn odị ḍighaạgh okparaghạm odẹgh ophogh kirokirọ. (2 Kọr. 4:​7-10) Mem dị nạ aḍiiny muụm idiphọ oniin onyọ Ogbaanhaạn, nạ kasoman ni iiḅaghamhị obobọ kodẹgh ni opogh omheeraam mọ anạ, kuolọ nạ kamoọgh ni olhoghonhaạn aḍighaạgh. Kuphom ni owol mọ Enhaạn r’aKraist kobakị ni nyinhạ.—Fil. 4:13.

10. Eḍeenhaan phọ Anna etughemhị nyinhạ eeghe?

¹⁰ Uukonhom Anna eghunotu abuọ aKurdish epẹ Eastern Europe. Iduọn onhiin Anna aḍiiny bọ muụm, bịn Anna amhiigh otuughạ aBaibul phọ mem dị odị amhạn 9 asiạ, kụ odẹ odị amheera ni. Toroboiperolbọ, iphẹn phọ ikọm ni iiḅaghamhị elhọgh igbo eghunotu abuọ Anna r’abuọ asiya phọ abidị odi aani ghan bọ r’abidị. Asiya phọ abidị umhiịn mọ eḍighi roofolha dị oye kabilhẹ ekụ iiḅereghị aburudẹ aburudẹ abidị kụ akị onhọn asiosị. Mem dị Anna amhạn 12 asiạ, odị aḅenhị ni odẹ phọ odị m’onọ rawạ oḍiiny amuụm. Odẹ phọ awạ ghan olhegheri mughumọ onyanhị phọ odị kụ akạr ri asopha iphẹn phọ obobọ oye kụ akpaariọm. Onyanhị phọ odị aphagharanhaạn mọ, “mị apomhoghiạn aZihova.” Kụ odẹ phọ amheeraam mọ Anna aḍiiny ni muụm. Kụ roḍiiny muụm mọ, kụ asiya phọ odị omhiigh ogilaạm odị idọ kirokirọ areten. Oniin onyọ asiya phọ odị aḅenhị nyodị mọ, “Minighẹ ghụn nạ aḍighi oleom emhạ obobọ opughọl sigrẹt kparipẹ r’oḍighi oniin onyọ AZihova.” Ika kụ idị Anna akaran iiḅaghamhị phọ iphẹn phọ? Odị aḅẹm mọ, “aZihova ulhoghonhaạn ni imhị ḍighaạgh orue okpạr ḅilhẹ kẹn onhiin r’odẹ amhị ubakị ni imhị agey.” Anna ragẹ ghan kalhọgh ḍinyạ reten kirokirọ phọ aZihova raloghonhaạn ghan bọ nyodị ḍighaạgh. Mem emhạn mem, odị rapogh ghan ni siphẹ aḍinyạ phọ pidị odị ka/bula reten phọ aZihova malhoghonhaạn bọ nyodị ḍighaạgh. Eḍighi maạr dị nạ rakiilhaan isophoghom, pọ legheri mọ aZihova kalhoghonhaạn aani ni nyinhạ ḍighaạgh.—Hib. 13:6.

AKONILIỌS AḌIINY NI MUỤM

11. Eeghe araraạr kụ mitue ni eḍighi idị aKoniIiọs muubinya oḍiiny amuụm?

¹¹ Yira kotue ni otuughạ raraạr dị emhạn maạr esi eḍeenhaan phọ aKoniIiọs. Odị aḍighi oḍiemhiom awe eghạm. Odị aphogh ghan egu awe eghạm aRom dị omhạn ni 100. (Iiḍ. 10:1) Loor iduọn phọ, odị aḍighi ni ominighạn oye siphẹ aḍita awe eghạm mọ, aḅilhẹ kẹn aḍighi oye dị awe olhegheri. Odị “anmo ghan ni inmo” we. (Iiḍ. 10:2) AZihova arom ni otelhedom mọ Pita oghị oghaạph iiḅi iinhaghạn phọ oḅenhị odị. AKoniIiọs aabinyemhiom ni oḍiiny amuụm loor iduọn odị aḍighi bọ okpolhom oye eghạm ḅilhẹ awe olhegheri bọ nyodị ḍughụm?

12. Eeghe kụ ilhoghonhaạn ḍighaạgh aKoniIiọs oḍiiny amuụm?

¹² Eeghe kụ ilhoghonhaạn bọ ḍighaạgh KoniIiọs oḍiiny amuụm? ABaibul phọ uḅenhị iyira mọ “odị r’oomo otọ k’odị uḍighi ni we aruukuan dị olọgh ni eegu Enaạn.” Ḅilhẹ kẹn, aKoniIiọs o/soph ghan mem ooḅereghị Enaạn. (Iiḍ. 10:2) Mem mọ aPita agbeelhom bọ iiḅi iinhaghạn phọ aḅenhị KoniIiọs, odị r’eghunotu phọ odị uugboronhom ni osighẹ dom mọ oḅilhẹ omheeraam Kraist kụ oḍiiny muụm. (Iiḍ. 10:​47, 48) Iikia i/lo, aKoniIiọs anyaaghiạn ni onmeeghi araraạr siphẹ aghuḍum mọ odị orue oḍighi ipẹ ewạ bọ, pidị odị r’eghunotu phọ odị otue ooḅereghị aZihova eten phọ epẹ rewạ bọ.—Josh. 24:15; Iiḍ. 10:​24, 33.

13. Eeghe araraạr kụ edị nạ atuughạ esi aKoniIiọs?

¹³ Idiphọ aSọl, aKoniIiọs o/mheera mọ aḍigbogh adọl phọ odị ekikima nyodị oḍighi onyọ aKristẹn. Emoghi ni mọ nmeeghi raraạr siphẹ aghuḍum mọ anạ pidị nạ atue aḍiiny muụm ḍughụm? Eḍighi idiphọ, pọ aZihova kalhoghonhaạn ni nyinhạ ḍighaạgh. Odị kasẹph ni ikuph phọ nạ ralọgh bọ okumu odị eten phọ epẹ emhoọgh bọ muḅọph r’asinhị iilhogh aBaibul phọ.

14. Eeghe asuọ kụ edị nạ kamoọgh eḍighi maạr dị nạ adaphạn eḍeenhaan phọ aTsuyoshi?

¹⁴ Iwạ ni dị aTsuyoshi, olọ aJapan, kanme oḍighi phọ odị orue osianhaan oḍiiny amuụm. Odị aḍighi otum uw-emhụ askul dị oghol mọ Ikenobo dị rotughemhị ghan ilọ odeeghị asifalawạy mem amaḍi. Mem dị uw-emhụ askul phọ u/tue ghan ukị maḍi dị omhạgh nyodị, aTsuyoshi kụ amheerạ ghan enye odị aḍighi yogh iinhuạ asiosị aBuddha phọ mem amaḍi. Toroboiperolbọ, mem dị aTsuyoshi atuughạ bọ igey phọ ilọ adọl awe dị momhuughu, odị alhegheri ni mọ odị ka/tue aḍiiny muụm eḍighi maạr dị odị aghiọm ghisigh iḍighinhom araraạr phọ ipẹ phọ. Odị asopha ni owilhẹ oḍighi ghan araraạr phọ ipẹ phọ. (2 Kọr. 6:​15, 16) ATsuyoshi aḅaanhaạn ni uw-emhụ phọ odị ilọ iphẹn phọ. Imite ika? U/porogh nyodị oḍighi phọ, ungọ ghụn onhọn oḍighi dị i/ḅarạm oḍighi yogh ghan iinhuạ asiosị phọ. Odị amhiigh bọ otuughạ aBaibul phọ remhạn lhạ, bịn aḍiiny muụm.a Eḍighi maạr dị emhoghi ooḅenhion araraạr siphẹ oḍighi phọ anạ orue oḍighi idị keḅeraạn aZihova, pọ kuphom ni owol mọ aZihova kangọ ni nyinhạ r’eghunotu phọ anạ raraạr orolhọm mọ nyinha emhoghi bọ.—Ps. 127:2; Mat. 6:33.

AWE AKORỊNT PHỌ UḌIINY NI MUỤM

15. Eeghe kụ mitue ni ekikima buọ aKorịnt phọ oḍiiny amuụm?

¹⁵ Awe aKorịnt iḍiodi phọ uḍighi we dị ophomhoghiạn ruphua ḅilhẹ omhoọgh roozọ dị i/ḅaạl. Ibadị abidị urọl dọl dị i/ḅeraạn Enhaạn. Dị eegholhaan ni adọl ekpisi phọ ephẹn pho ketue ni eḍighi iyaạr dị kekparanhaạn oye okumu aZihova. Ghalhamọ r’iduọn phọ ni, mem mọ otelhedom mọ aPọl asi bọ Korịnt kụ aghaạph bọ ooḅi oghaạph phọ ilọ aKraist, ibadị awe “aKorịnt dị onaghạn bọ dom mọ umeeraam aani ni, kụ [oḍiinye] bidị muụm.” (Iiḍ. 18:​7-11) Kụ aZizọs Omoọgh we phọ amitenhaan Pọl uḍien kụ aḅenhị nyodị mọ: “Ibadị awe amị odi ni siẹn emạ phọ ephẹn.” Esi iduọn phọ, aPọl aghiọm ni ghisigh aghaạph ghan iiḅi iinhaghạn phọ epẹ phọ esi alhạ r’egbem.

16. Eeghe kụ ilhoghonhaạn ḍighaạgh buniin abuọ aKorịnt phọ okpạr opu araraạr dị mitue ni ekikima bidị oḍiiny amuụm? (2 Korịnt 10:​4, 5)

¹⁶ Eeghe kụ ilhoghonhaạn bọ ḍighaạgh we aKorịnt phọ oḍiiny amuụm? (Bạl 2 Korịnt 10:​4, 5.) Ekpo Onhụ phọ Enhaạn ḅilhẹ r’iikpọ uwaloor iigbia phọ kụ ilhoghonhaạn bọ bidị ḍighaạgh onmeeghi araraạr siphẹ aghuḍum mọ abidị. (Hib. 4:12) Abuọ aKorịnt phọ abuphẹ omheeraam bọ iiḅi iinhaghạn phọ ilọ aKraist urue ni owilhẹ yogh ikarạph araagharạ r’iḍighinhom araraạr idiphọ ophughọl amiim otenhom okụ, imhi, ḅilhẹ r’omhinhiạn ariiniọm.—1 Kọr. 6:​9-11.b

17. Nạ atuughạ eeghe esi abuọ aKorịnt phọ?

¹⁷ Lọgh elhegh mọ ghalhamọ r’iduọn abuniin abuọ aKorịnt phọ omhoọgh bọ ni ikarạph araagharạ dị ekpạr ri owilhẹ, bidị u/kureri mọ bidị ko/tue oḍighi aani Kristẹn. Bidị ulhọgh ni ikuph owilhẹ yogh ikarạph araagharạ phọ, pidị bidị otelhe aani siphẹ ekololoọny eten aghuḍum mọ. (Mat. 7:​13, 14) Nạ amoọgh ni eegharạ obobọ eḍighinhom iyaạr dị ekparanhaạn nyinhạ owilhẹ ḍughụm? Pọ nyinhạ ki/phẹr eenhan kụ okpạr opu! Lọm aZihova angọ nyinhạ uwaloor iigbia phọ olhoghonhaạn anạ ḍighaạgh okpạr opu aruuphuạ oḍighi araraạr dị i/nighẹ.

18. Nạ atuughạ eeghe esi eḍeenhaan phọ aMonika?

¹⁸ Onyọ umaranhi dị oghol mọ Monika, epẹ Georgia, alhọgh ni ikuph owilhẹ eegharạ oḅạ ghan ikarạph ikpo onhụ ḅilhẹ r’ozaamiạn aloor dị u/kpeanhaạn, pidị odị atue asianhaan oḍiiny amuụm. Odị aḅẹm mọ: “Mem dị mị aghom, inyaạm amhị pọ iiḅereghị. AZihova alhegheri ni mọ mị rawạ ni oḍighi ipẹ enhighẹ bọ, kụ oomo amem odị ulhoghonhaạn ni imhị ḍighaạgh aḅilhẹ uuḅakị imhị.” AMonika aḍiiny ni muụm mem dị amhạn 16 asiạ. Araagharạ r’iḍighinhom araraạr edi ni dị ewạ mọ bilhẹ pidị nạ arue akumu aZihova eten phọ epẹ ekpeanhaạn bọ ḍughụm? Eḍighi idiphọ, pọ kiọm ghisigh alhọm ghan nyodị inyaạm orue onmeeghi araraạr. AZihova raa/kpukiạn ghan ongọ uwaloor iigbia phọ odị we phọ odị.—Jọn 3:34.

OMHEERAAM MỌ ANẠ KATUE NI ATUPHURON EEḄARẠPH

19. Eeghe kụ kelhoghonhaạn nyinhạ ḍighaạgh oruphuron araraạr dị eghịgh eeḅarạph dị rewạ osophoghom anạ oḍiiny amuụm? (Miịn kẹn afoto phọ.)

¹⁹ Kuphom ni owol mọ aZihova aphomhoghiạn ni nyinhạ, kụ kẹn rawạ mọ ḍighi aani pakirị eghunotu phọ odị, etigheri torobọ ipaanhaạn dị nạ asoman oḍiiny amuụm. AZizọs aḅenhị egu abumatuạn odị mọ: “Eḍighi iyaạr dị nyina emoọgh omeeraam dị aghom idiphọ ekpo amustạd kụ eḅenị eeḅarạph phọ ephẹn mọ ‘Tuphuronu aghị enọn esi,’ bịn ketuụgh ni idiphọ eḍighi. Iyaạr dị kikparanaạn inyina i/lo.” (Mat. 17:20) Abuphẹ onhaghạn bọ iphẹn aZizọs aghaạph bọ morọl r’odị iyạl ikpo asiạ bịn, esi iduọn phọ omheeraam mọ abidị k”okạr obụgh. Kuolọ aZizọs angọ ni bidị okuphom owol mọ eḍighi maạr dị bidị omhoọgh omheeraam dị abụgh, pọ aZihova kaloghonhaạn ni bidị ḍighaạgh okpạr opu araraạr dị resophoghom bidị oḍiiny amuụm. AZihova kalhoghonhaạn kẹn ni nyinhạ ḍighaạgh!

20. Ika kụ idị areḍeenhaan aKristẹn iḍiodi phọ r’arodon yira ooḅeghiọn bọ siẹn emhuoghaạph phọ ephẹn phọ kelhoghonhaạn nyinhạ ḍighaạgh?

²⁰ Eḍighi maạr dị iyaạr rekikima nyinhạ oḍiiny amuụm, pọ gbariọn ni radạ omhiịn mọ nạ akpạr ri apu dị nạ uu/binya. Areḍeenhaan aKristẹn iḍiodi phọ r’ilọ arodon yira ooḅeghiọn bọ, ketue ni eedereghị nyinhạ eḅilhẹ ekparamhị nyinhạ. Ḅilhẹ kẹn, kenyu nyinhạ oḅọgh aloor anạ ongọ aZihova kụ oḍiiny amuụm. Oḍiiny amuụm kụ osopha dị anhighẹ apelheghiom dị nạ kasopha!