EMHUOGHAẠPH ITUUGHẠ PHỌ 30
AḌUỌR PHỌ 97 Ekpo Onhụ Phọ Enhaạn Kụ Aghuḍum
Nạ Katue Ni Aḅilhẹ Atuughạ Iyaạr Esi Ikpanhạ Itughemhị ABaibul Phọ
“Mị raa/kpukiạn oghiọm ghan anyina ologhi, ghalamọ idiphọ nyina melegheri bọ ni iphẹn phọ etene igbaany, eḅilẹ ekuạ phaghaphaghạ siphẹ igey phọ.”—2 PIT. 1:12.
EGBON
Idị ikpanhạ itughemhị aBaibul phọ yira motuugha bọ epẹ omhạn ketue eḅilhẹ ilhoghonhaạn iyira ḍighaạgh rodon.
1. Ikpanhạ itughemhị aBaibul phọ itir nyinhạ ika eḅẹl amem mọ nạ atuughạ bọ alhegheri?
IKPANHẠ itughemhị aBaibul phọ yira otuughạ bọ inme ni ghuḍum mọ ayira. Esi omaạm, mem mọ yira otuughạ bọ olhegheri mọ ḍien Enhaạn okol mọ aZihova, inyu ni iyira oḍighi arighirị odị. (Isa. 42:8) Mem mọ yira otuughạ bọ ilọ adọl abuphẹ momhuughu bọ, yira u/kiilhaan ghan mun buphẹ momhuughu bọ. (Eccl. 9:10) Ḅilhẹ mem mọ yira otuughạ bọ mọ Enhaạn ketenhe de phọ Paradaịs, yira uu/ḅaghamhiạn ghan mun loor ilo aghisigh phọ ayira. Yira ukuphom ni owol mọ yira kotue ni otọl k’agee-pọ, ke/si 70 obobọ 80 asiạ bịn.—Ps. 37:29; 90:10.
2. Ika kụ idị 2 Pita 1:12, 13 eḍeenhaan mọ ghalhamọ aKristẹn dị mosi ni omhanhanhaạm kotue ni oḅilhẹ omooghọm suọ esi ikpanhạ itughemhị aBaibul phọ?
2 R’amem r’amem, ku/peghom ephegh ikpanhạ itughemhị aBaibul phọ yira molhegheri bọ. APita agẹ ḍinyạ phọ odị emhunhenhiom bọ iyạl phọ aghiọm Kristẹn dị momhiigh ni siẹn igey phọ. (Bạl 2 Pita 1:12, 13.) Mem mọ amuphẹ phọ, ariil okpẹ dị owạ ghan olher abumor phọ utughemhị ghan ni raraạr dị i/tu inẹ. (2 Pit. 2:1-3) APita awạ ghan okparamhị abumor phọ pidị bidị ko/meel oḍighanhan riil okpẹ phọ abuẹn phọ. Orue oḍighi iduọn phọ, odị aghiọm bidị olhoghi iniin araraạr dị bidị motuughạ epẹ omhạn. Araraạr phọ iphẹn phọ keloghonhaạn bidị ḍighaạgh ophamhanhạm aḍimheerạ phọ abidị k’eekunha phọ.
3. Kaạph amaaniọm iyaạr phọ eḍighi bọ kụ oomo aKristẹn okpẹ bọ ni ogbirima ghan ilọ ikpanhạ itughemhị aBaibul phọ bidị ophụr bọ otuughạ.
3 Ghalhamọ yira morọl li obia siẹn igey phọ, yira kotue ni okiọm ghisigh otuughạ imhoom araraạr esi ikpanhạ itughemhị aBaibul phọ. Esi oghaạph omaaniọm: Oye dị amhaạr osạ eḍien r’oye dị purukụ ratuughạ osạ eḍien otue ni oḍighinhom iniin phọ araraạr phọ kosaạm bọ eḍien phọ, kuolọ opọ mamhaạr bọ osạ eḍien phọ katue ni asighẹ iniin phọ araraạr phọ ongọ bọ bidị asaạm kirokirọ ariiḍien. Iginha phọ kẹn, awe dị mokumu aZihova esi ibadị asiạ otue ni otuughạ ibadị araraạr esi eniin esi aBaibul. Eeghe kụ iḍighi? Eeni asidọl obobọ aroopoogh arukumuan phọ abidị menmia ni egbi k’amem mọ bidị oḍiiny bọ muụm. Mem dị yira osighẹ iḅẹl araraạr phọ yira otuughạ bọ epẹ omhạn kụ osighẹ oḍighinhom sidọl phọ yira osoman bọ nyiidiiphọ, yira komiịn ni imhoom areten dị kilhoghonhaạn iyira ḍighaạgh. Omhiịn idị aKristẹn dị mosi omhanhanhaạm kotue ni otuughạ esi iraạr ikpanhạ itughemhị aBaibul.
AZIHOVA KỤ OLEMHIẠ PHỌ
4. Olhegheri mọ aZihova kụ olemhiạ phọ mitir iyira ika?
4 “Enaạn phọ kụ ilemọgh bọ oomo araraạr phọ.” (Hib. 3:4) Yira olegheri ni mọ de phọ r’oomo araraạr phọ edi bọ siẹn ade phọ, olemhiạ dị asụ-olhoghi aḅilhẹ amhoọgh iikpọ apelheghiom kụ alhẹm. Odị kụ ulhẹm iyira kụ alegheri ni oomo ilọ ayira. Idị epelhom siẹn, odị akạr ri ruphogh ghan iyira. Odị kụ alhegheri ipẹ kinhighenhaạn bọ iyira. Olhegheri mọ aZihova kụ olemhiạ phọ itir iyira agey, kụ mengọ ghuḍum mọ ayira emhụ.
5. Eeghe igey aBaibul phọ kụ kelhoghonhaạn nyinhạ ḍighaạgh omhoọgh eegharạ osooromhi aloor? (Isaiah 45:9-12)
5 Olhegheri mọ aZihova kụ Olemhiạ phọ kitughemhị ni iyira iyaạr ilọ osooromhi aloor. Mem mọ aJob agbon bọ ogbạ ophelhạ aloor odị bịn, aZihova aatughianhạm ni nyodị mọ onọ kụ Olemhiạ phọ apelheghiom bọ. (Job 38:1-4) Ighiọm ilhoghi phọ iphẹn phọ iḍighi idị aJob amhiịn mọ areten phọ aZihova ebụgh epelheghiom ilọ awe. Idị emhoọgh muḅọph r’iphẹn phọ, oyil phọ Aizaya agẹ mọ: “Aḅạy phọ mapuru ghan ni oḅolhọm oko phọ mọ: ‘Nạ ralẹm ghan eeghẹ?’”—Bạl Isaiah 45:9-12.
6. Apụr amem kụ idị ekạr ekpeanhaạn ogbirima ghan ilọ adọl phọ aZihova idiphọ ogbogh Olemhiạ? (Miịn kẹn sifoto phọ.)
6 Onyọ aKristẹn dị mabia siẹn igey phọ atue ni amiigh obeḍenhọm olhegheri iyaạr odị bịn, kparipẹ r’owạ ghan iiḅakiọm aZihova r’Ekpo-onhụ phọ odị. (Job 37:23, 24) Eeghe asuọ kụ idị oye kamoọgh mem dị agbirima ghan ilọ osụ-olhoghi phọ r’igbogh iikpọ Olemhiạ phọ? (Isa. 40:22; 55:8, 9) Oye phọ kamoọgh eegharạ osooromhi aloor r’obeḍenhọm ghan aZihova.
Eeghe kụ kilhoghonhaạn iyira ḍighaạgh olhegheri mọ aḍituughiạn ayira kụ i/nighẹ ipu ipẹ aZihova? (Miịn ekpịgh phọ 6)d
7. ARahela aḍighi eeghe orue odaphạn imhoom iiḅakiọm?
7 Onyọ umaranhi dị odi ghan Slovenia dị oghol mọ Rahela, amhiịn mọ ootughiạn ghan ilọ Olemhiạ phọ odị melhoghonhaạn nyodị ḍighaạgh odaphạn ghan iiḅakiọm dị ooḅenhion siẹn okpomhoghan phọ. Odị aḅẹm mọ: “Eeni amem imhị ri/dughanhaan ghan osighẹ araraạr dị ooḅenhion siẹn ookpomhoghan phọ. Esi omaạm, ghalhamọ r’iduọn mị maphogh bọ ni Omhunhenhiom 8 Iinhaghạn Dị Aloor Phọ Repogh Bọ Ongọ 2023, imhoọgh ni idị erọl esi amhị mem dị mị amhiịn dị onyọ umor r’oboom olheẹm rangọ oghaạph. Esi iduọn phọ mị uuḅereghị ni alhọm aZihova olhoghonhaạn amhị ḍighaạgh orue odaphạn onmia phọ ophọn phọ.” ARahela aru ni alhọgh elhegh mọ idiphọ Olemhiạ akẹ r’ade phọ, aZihova alegheri ni ilọ ooḅakị ookpomhoghan phọ odị eten phọ epẹ enhighẹ bọ. Eḍighi maạr dị rekparanhaạn ghan nyinhạ odaphạn omhoom onhaghạn aḍughụm obobọ imhoom iiḅakiọm, pọ ogbirima ghan ilọ igbogh iikpọ phọ r’osụ-olhoghi Olemhiạ phọ ayira kelhoghonhaạn ni nyinhạ ḍighaạgh.—Rom 11:33-36.
IYAẠR PHỌ ENHAẠN ATỤ BỌ AMHEERA MỌ IMHINHIMHIỊN ERỌL
8. Olhegheri iyaạr phọ eḍighi bọ kụ Enhaạn emheera bọ mọ imhinhimhiịn erọl mingọ iyira eeghe asuọ?
8 Enhaạn atụ eeghe kụ ameera bọ mọ imhinhimhiịn erọl? Awe dị k”olhegheri ophagharanhaạn aḍipuru phọ aḍiẹn phọ, okaghạm olhoghi Enhaạn, abuniin oḅẹm bịn mọ Enhaạn i/lo ghan! (Prov. 19:3) Kuolọ nạ matuughạ alegheri mọ ikarạph phọ yira olhe bọ erua r’e/munughan phọ kụ ikọm bọ imhinhimhiịn, k/aZihova. Nạ matuughạ kẹn mọ okparạm mọ aZihova mangọ ibadị eepoogh orue olhegheri odị r’ipẹ odị agbiighi bọ osiemhi eekunha imhinhimhiịn k’agee-pọ. (2 Pit. 3:9, 15) Igey phọ iphẹn phọ mengọ nyinhạ oḍuomolhoghi kụ eḅilhẹ eḍur nyinhạ etumeriom Enhaạn.
9. Apụr amem kụ edị ekạr emhoghi ogbirima ghan iyaạr phọ eḍighi bọ kụ aZihova amheera bọ mọ imhinhimhiịn erọl?
9 Yira momhiịn iyaạr phọ ewạ bọ mọ okparạm tutụ aZihova asiemhi eekunha imhinhimhiịn. Ghalhamọ r’iduọn phọ ni, mem dị yira obobọ oye ephomhoghiạn ayira asoman iiḅaghamhị, ekeeny ooruẹn, obobọ oye amhughanhaan, yira otue ni omiigh ookia iyaạr phọ eḍighi bọ kụ aZihova raa/gboronhom bọ osiemhi eekunha imhinhimhiịn. (Hab. 1:2, 3) Idọ phọ asimem mọ iphẹn phọ, kenighẹ ni ogbiran ghan iyaạr phọ eḍighi bọ kụ aZihova amheera bọ mọ awe elhiom eḍighinhom iyaạr omhiinhọm.a (Ps. 34:19) Yira kotue ni kẹn ogbirima ilọ ogbi phọ aZihova osiemhi eekunha imhinhimhiịn k’agee-pọ.
10. Eeghe kụ ilhoghonhaạn ḍighaạgh Anne orue okparạm mem mọ onhiin phọ odị amhugh bọ?
10 Olhegheri iyaạr phọ eḍighi bọ kụ imhinhimhiịn edi bọ ketue ni ilhoghonhaạn iyira ḍighaạgh okparạm. Onyọ umaranhi dị oghol mọ Anne, dị arugh ekpu ogbo aMayotte, epẹ Abazị phọ India, aḅẹm mọ: “Aḍuugh onhiin phọ amhị ikạr kụ ingọ imhị e/ḅaạl olhoghi. Kuolọ mị ugbor ghan ni aatughianhạm loor amhị mọ aZihova kụ ra/kọm ghan imhinhimhiịn. Kụ r’ikpukpụ odị rawạ ni osiemhi eekunha oomo imhinhimhiịn r’oḅerion awe ephomhoghiạn phọ ayira momhuughu bọ. Ogbirima ghan ilọ igey phọ iphẹn phọ ringọ ghan imhị eephọ olhoghi dị mị u/seere olhoghi.”
11. Olhegheri ipẹ eḍighi bọ kụ aZihova amheera bọ mọ imhinhimhiịn erọl rinyu ghan iyira osighẹ ika oḍighi iphelhegbeel phọ?
11 Olhegheri iyaạr phọ eḍighi bọ kụ Enhaạn amheera bọ imhinhimhiịn erọl ketue ni inyu iyira oghiọm aghisigh oghaạph iiḅi iinhaghạn phọ. Mem mọ otelhedom mọ aPita aghaạph bọ mọ okparạm mọ aZihova mangọ we eepoogh okiton kụ omhoọgh apelieẹny, odị aḅarạm mọ: “Itọl dọl aruukuan eḅọgh ghuḍum mọ anyina elọgh ḍighaạgh Enaạn.” (2 Pit. 3:11) Oḅọgh aghuḍum mọ ayira olhọgh aḍighaạgh Enhaạn eḅarạm ni omite ghan epẹ erugh phọ oghaạph iiḅi iinhaghạn phọ. Idiphọ Odẹ phọ ayira, Zihova, yira opomoghiạn we. Yira okạr kụ rowạ mọ bidị oḍigh aani siphẹ omhoom aḅirinhi phọ. Okparạm mọ aZihova mangọ eepoogh we ekool arukumuan phọ anyinha oru ooḅereghị aani aZihova. P’eeghe emạ eepoogh dị nạ amhoọgh oḅọph oḍighi r’Enhaạn, olhoghonhaạn aḍighaạgh ibadị awe oru olhegheri ilọ odị kụ eekunha phọ egbi oru!—1 Kọr. 3:9.
YIRA ODI SIḌIO “ARUUKUNA PHỌ”
12. Olhegheri mọ yira odi siḍio aruukuna phọ mingọ iyira eeghe asuọ?
12 ABaibul phọ akạr ri akaạph idị aroozọ awe ketọl siḍio “aruukuna phọ.” (2 Tim. 3:1-5) Torobọ ekpisi lọ yira okiton ophogh yira romiịn ni dị imiịn aBaibul phọ iphẹn remunughan. Iduọn yira romiịn bọ dị aroozọ awe rebeeph ghan bịn kelhoghorị, ringọ ghan iyira akpọ oḅio mọ Ekpo Onhụ phọ Enhaạn ekpẹ ni oḍuom olhoghi.—2 Tim. 3:13-15.
13. Odaphạn oghaạph omaaniọm mọ aZizọs siphẹ Luk 12:15-21, eeghe asipuru kụ idị yira kopuruan loor?
13 Olhegheri mọ yira odi siḍio aruukunha phọ kilhoghonhaạn iyira ḍighaạgh ogbon araraạr phọ ipẹ emhạn bọ maạr. Lọgh elhegh iyaạr dị yira kotue otuughạ esi aḍidogh phọ aZizọs edi bọ Luk 12:15-21. (Bạl.) Eeghe kụ iḍighi kụ omhạgh bọ oolạ phọ mọ “uwo elologhi”? Ka/loor eelạ phọ oye phọ amhoọgh bọ, kuolọ aloor iduọn odị asighẹ bọ raraạr emhoọgh kụ aḍighi eḅẹl siphẹ aghuḍum mọ odị. Oye phọ “aseerean eelạ loor odị, kụ aḍighi uwekulom ghisigh Enaạn.” Uḍighi ika kụ iphẹn phọ i/ḍighi bọ osụ olhoghi? Enhaạn iḅenhị oye phọ mọ: ‘Ḍughul phọ aḍiẹn phọ bidị rowạ ghuḍum mọ anạ.’ Rodon, iduọn eghimoghọm araraạr phọ resi bọ eekunha, opuruan loor mọ: ‘Asiigbu phọ amhị eḍeenhaan ni mọ mị agbon ni raraạr phọ ipẹ emhạn bọ maạr ḍughụm? Eeghe asiigbu kụ idị mị raloghonhaạn ḍighaạgh ibạm anmụny phọ amhị ophorogh? Mị raḍighinhom ni inyaạm amhị, mem mọ amhị, ḅilhẹ r’araraạr emhoọgh phọ amhị okpolhom eelạ loor amhị obobọ okpol eelạ epẹ k’akẹ ḍughụm?’
14. Odaphạn eḍeenhaan phọ aMiki, eeghe kụ iḍighi kụ enhighẹ bọ ni ootughiạn ghan mọ yira odi siḍio aruukunha phọ?
14 Ootughiạn ghan ilọ araraạr phọ eḍeenhaan bọ mọ yira kụ odi siḍio aruukunha phọ ketue ni ilhoghonhaạn iyira ḍighaạgh osopha ghan ogey osopha. Iphẹn kụ imitenhaan onyọ umaranhi dị oghol mọ Miki. Odị aḅẹm mọ: “Mem mọ mị amhadạn bọ sekondrị skul, mị uwạ ghan oghị ogbogh askul otuughạ ilọ inhạm. Mị uḅilhẹ ni kẹn amhoọgh ḍiigbu okọy eten oomo amem ḅilhẹ r’oghị ekpisi dị ewaạm mọ ebụgh. Buniin arighirị amhị uromha ni imhị mọ mị umiigha loor uutughiạn mughumọ mị katue ni aḅaraghiạn. Bidị uutughianhạm imhị mọ aḅirinhi phọ ophọn kasi ni eekunha moọny amem. Kụ siphẹ omhoom aḅirinhi phọ, mị kamoọgh ni eepoogh otuughạ ilọ inhạm bịn k’agee-pọ. Kparipẹ r’osaḅạr ghụn askul dị mị kakị ibadị asiạ, mị ughị ghụn obạm askul dị mị kamoọgh oḍighi aḍighaạgh obakiọm aloor amhị kụ okọy eten oomo amem mọ. Onyebel roten, bịn mị aḅuạ aghị Ecuador ekpisi dị ewaạm mọ ebụgh.” Nyiidiphọ aMiki r’olom odị odi oḍighi opoghom eghir eelhe phọ epẹ phọ.
15. Ika kụ idị awe dị eḅẹl amem mọ u/meera usighẹ dom Omhạr phọ kotue ni oḅilhẹ omegheron ghisigh? Ngọ eḍeenhaan. (Miịn kẹn sifoto phọ.)
15 Ku/ḅonyonhu ghan uzuan eḍighi maạr dị awe oghel dom iiḅi iinhaghạn phọ. Awe kotue ni onmia. Ooḅeghiọn eḍeenhaan aJems oọny onhiin phọ aZizọs. Odị amhiịn ni Zizọs dị aphoph amhanhạm aḍighi aMesaya phọ. Odị amhiịn kẹn mọ oye o/lho dị amhaạr itughemhị idiphọ aZizọs. Ghalhamọ r’iduọn phọ ni, esi ibadị asiạ aJems o/dạph Zizọs. Amem mọ aZizọs mamhugh bọ kụ oḅilhẹ bọ oḅeton kụ edị aJems agbi oḍighi aani onyọ amatuạn aZizọs—kụ akạr amhoọgh oophugh!b (Jọn 7:5; Gal. 2:9) Esi iduọn phọ, iyira ki/phẹr oḅilhẹ ghan oghaaphạn siya ayira dị k”oḍeenhaan ḍiḅeraạn adom Omhạr phọ, r’oḅilhẹ ghan oḅulha oteẹny abuphẹ u/sighẹ bọ dom Omhạr phọ eḅẹl amem mọ. Legheri mọ yira odi siḍio aruukunha phọ kụ ewạ ni mọ oogboronhom oghaạph iiḅi iinhaghạn phọ. Adom iiḅi iinhaghạn phọ yira roḅenhị bọ bidị rodon etue ni etir bidị ghisigh, ghalhamọ r’amem dị igbogh iiḅaghamhị phọ memhiigh.c
Eeghe kụ keḍighi idị iyira ki/phẹr oghaạph ghan adọm Omhạr phọ oḅenhị asiya ayira dị k”omheeraam aani? (Miịn ekpịgh phọ 15)e
KIỌM GHISIGH ASEREGHIẠN GHAN IGHIỌM ILHOGHI PHỌ AZIHOVA
16. Ika kụ idị nạ mamhooghọm suọ ighiọm ilhoghi phọ aZihova? (Miịn kẹn igbe phọ “Sighẹ Alhoghonhaạn Ḍighaạgh Bunhọn.”)
16 Iniin ariiḍien aruwaloor phọ yira rokelhọm ghan bọ ookolhobianhaan we dị k”onhaghạn ghan ikpanhạ itughemhị aBaibul phọ. Esi omaạm, oghaạph ogbo phọ, iniin arumhuoghaạph r’asividio dị edi jw.org, r’asimagazin phọ yira rokimọm ghan bọ epẹ erugh phọ, ookolhobianhaan we dị u/ḍighi Bugbaanhaạn. Kuolọ yira romooghọm aani ghan ni suọ. Rebughẹ ghan ephomhoghiạn phọ ayira esi aZihova, kekparamhị omheeraam mọ ayira esi Ekpo onhụ phọ odị, r’osilor amem dị yira rotughemhị bunhọn ikpanhạ igey aBaibul phọ.—Ps. 19:7.
17. Ighẹn asidọl kụ idị kemoghi ogbirima ghan ikpanhạ itughemhị aBaibul?
17 Idiphọ Abugbaanhaạn AZihova, olhoghi ayira raḅaạl ghan ni mem dị oogholhomhi onhaghạn aḍughụm ayira ilọ iniin itughemhị aBaibul phọ. Kuolọ, yira okiọm ni ghisigh rosereghiạn ghan ikpanhạ itughemhị aBaibul phọ iḍur bọ iyira etumeriom aZihova. Eḍighi maạr dị eegharạ olhom ghan ogheelhom aḍiitughiạn ayira rewạ okọm idị yira ko/dạph iiḅakiọm mọ oḍighom mọ aZihova, pọ osooromhi loor ootughiạn oye phọ raaḅakị bọ ookpomhoghan phọ—Olemhiạ phọ amhoọgh bọ oomo osụ olhoghi aḅilhẹ amhoọgh iikpọ dị epelheghiom. Mem dị yira obobọ oye ephomhoghiạn ayira asomhan iiḅaghamhị, okparạm ghan kụ ogbirimha ghan iyaạr phọ eḍighi bọ kụ aZihova amheera bọ mọ imhinhimhiịn erọl. Kụ mem dị yira rowạ osopha ipẹ yira koḍighinhom bọ mem mọ ayira r’araraạr emhoọgh phọ ayira, ootughiạn ni mọ yira odi siḍio aruukunha phọ. Eḍighi idị ighiọm ilhoghi phọ aZihova kekiọm ghisigh ikparamhị ghan iyira, ingọ iyira ibuọm, ḅilhẹ eḍighi idị yira kosụ olhoghi.
AḌUỌR PHỌ 95 The Light Gets Brighter
a Miịn emhuoghaạph phọ “Why All Suffering Is Soon to End” siphẹ Watchtower aMay 15, 2007, ipoḍi phọ 21-25.
b Miịn esi ituughạ phọ 8 siphẹ abrosọ phọ Pomhoghiạn We—Aḍighi Bidị Bumatuạn.
c Miịn emhuoghaạph phọ “Eeghe Kụ Edị Yira Olhegheri Ilọ Iiruẹn Phọ AZihova Kasophonhaan Bọ We Epẹ Ghisigh?” edi bọ Watchtower aMay 2024 ipoḍi phọ 8-13.
d ILỌ AFOTO: Okumor oye ookpomhoghan asogh ḍiitughiạn dị abueriphọ aḍita ikumor awe phọ u/sighẹ. Onyebel roten, mem dị odị rapogh raanhaạn phọ ḍughul, odị aru ni amhiịn mọ iitughiạn Olemhiạ phọ apelheghiom bọ kụ imhạn maạr epu ḍiitughiạn phọ odị.
e ILỌ AFOTO: Onyọ umaranhi aaḅeghiọn ni amhiịn raraạr dị eḍeenhaan mọ yira odi siḍio aruukunha phọ mem ituughạ oginha odị. Kụ iphẹn phọ inyu ni nyodị omhạgh umaranhi odị ongọ ogbaanhaạn.