Ịyal Abumhoom Abumor Dị Moḍighi Aani Pạkiri Aloor Phọ Repogh Bọ

UGBEELHOM ni ịinhaghan dị ẹgbatanhaan ụnwanyu October,5 2024, dị ẹḅem mọ: Mọma umor phọ Jody Jedele r’umor phọ Jacob Rumph oḍighi aani ạpakiri Aloor Phọ Repogh Bọ Bụgbaanhaan a Jehova. Ịyal phọ ạbumor phọ ạbuen phọ momhiigh ni okumu a Jehova eten dị ẹkpe oḍuom olhoghi k’ạsia dị mebia ni.

Ụmhar umor phọ Jedele ẹpe Missouri, U.S.A. kụ uukonhom nyọdi sịen igey phọ. Eghun otu phọ ạbidi urugh ghan otuman ekpisi dị rógbor ghan kọghi ọghaaph iiḅi ịinhaghan phọ. Esi ịduon phọ, ọdi ạmhiin ghan ni bumor kịrokiro dị oru ghan ekpisi phọ ẹpe phọ ọlhoghonhaan ạḍighaagh ọghaaph iiḅi ịinhaghan phọ. Ẹphomhoghian phọ r’ạmuḅoph phọ ạbuen phọ itir ri nyọdi agey. Ọdi aḍiiny mụum ụnwanyu October 15, 1983. Oḍighi iphelhegbeel phọ ạkar kụ ạḅeraan nyọdi. Ọdi rọmhadan sẹkọndịrị skul bịn amhiigh ọkoy eten ọpo oomo amem mọ ụnwanyu ạ September 1989.

Mem dị umor phọ Jedele aḍighi ọḍoogh ọony, ọde r’onhiin ọdi ụpham ghan ni nyọdi r’umaranhi ọdi ọghimom Bẹtẹl. Ịphen phọ inyu ni bịdi ophighi aḍiigbu ọghi aani ạ Bẹtẹl, kụ bịdi ụghi ni. Umor phọ Jedele ạghi Bẹtẹl a Wallkill ụnwanyu ạ September 1990. Ọdi ạghi bọ Bẹtẹl amhiighom okumuan Ẹku Ạbuphe Roḅeerogh ghan bọ riisi, kụ onyebel roten ọsighe ọghi Ẹku Ạbuo Arookonhom mọ.

Mem mọ ạmuphe phọ, arookpomhoghan dị etuman bịdi kụ repoph agey dị rọḅa ghan ọnhu a Spain umhoghi ni bumor dị kọloghonhaan ḍịghaagh. Esi ịduon phọ, umor phọ Jedele amhiigh ni ọghi aani oniin ookpomhoghan phọ ọpo phọ, kụ ạmhiigh ọtuugha ọnhu a Spain. Íbia bịn ọdi aazuanhaan ọnyo umaranhi dị oghol mọ Damaris dị rạkoy aani eten eniin phọ eghir phọ. Ekureriom mọ bịdi ạalhan ni, kụ a Damaris amhiigh aani rukumuan a Bẹtẹl.

Lhạ phọ 2005, bịdi ụwilhe ni rukumuan ạ Bẹtẹl phọ ogheel ọghi ophogh ọde r’onhiin ạbidi. Mem mọ ạmuphe phọ bịdi ụkoy ghan eten ọpo oomo amem mọ. Umor phọ Jedele ạlhoghonhaan ghan ḍịghaagh ọtughemhi Askul Ạbukoy Eten Oomo Amem mọ, kụ akumuan ghan kẹn rạ Hospital Liaison Committee ḅịlhe rạ Regional Building Committee.

Lhạ phọ 2013, ụḅilhe ni ọmhagh Umor phọ r’Umaranhi phọ Jedele oḅulha ạ Bẹtẹl okumuan aani r’abumor phọ rodoghoḍi bọ ruutu phọ epẹ Warwick. Egbi k’amem mọ ạmuphe phọ, bịdi mokumuan kẹn ẹpe Patterson rạ Wallkill. Umor phọ Jedele makumuan kẹn r’Ẹkpigh Ọmaka R’odoghoḍi Aruutu ekpisi ạbidi ḅịlhe rạ Hospital Information Services. Ụnwanyu a March 2023, ụma ni nyọdi ịdipho ọdi rạloghonhaan ḍịghaagh Ẹku Ạbuphe Ropogh Bọ Rukumuan phọ. Mem dị ọdi ạatughian iiḍighi phọ ọdi mạpham bọ, ọdi ạḅem mọ: “Mem dị ọngo oye phọ omhoom oḍighi, eeni amem oghiilhaan kaḅogh ni oye phọ. Kụolo ọpo kụ ạmem dị ẹwa mọ bẹḍenhom a Jehova loor esi dị ọdi katue ni atu tọrobo ịyaar omhunhenhi ogbi phọ ọdi.”

Ụmhar umor phọ Rumph ẹpe California, U.S.A. Mem mọ ọdi aḍighi bọ ni ọbumoony, onhiin phọ ọdi ạaphoom ni sịen igey phọ, kụolo ạlhogh ni ikuph ọtughemhi ọdi igey ạ Bạịbul phọ. Ḅịlhe kẹn, tọrobo ạlha ọdi ạghi ghan ni aphogh ogbogh onhiin ọdi dị aḍighi ọnyo Ọgbaanhaan. Ogbogh onhiin phọ ọdi ạlhoghonhaan ni nyọdi ḍịghaagh ọosa ạḍiḅeraan phọ ọdi ịlo igey phọ, kụ mem dị ọdi ạmhan 13 ạsia, ọdi asopha ni mọ ọtughemhi aani nyọdi Bạịbul phọ. Kụ ụnwanyu a September 27, 1992, ọdi aḍiiny mụum. Onhiin phọ ọdi ạḅilhe ni ạasa siya phọ odị ra Jehova, kụ oomo abumor phọ ọdi ophoph ọghi ghisigh ọḅilhe oḍiiny mụum.

Mem ịḍoogh ọdi, umor phọ Rumph ạmhiin ni ọḅaal olhoghi phọ ạbukoy eten rọmoogh ghan bọ. Esi ịduon phọ, ọdi rọmhadan sẹkọndịrị skul bịn amhiigh ọkoy eten ụnwanyu a September 1995. Lhạ phọ 2000, ọdi ạḅua ạghi Ecuador okumuan ekpisi dị ẹwaam mọ ẹbugh. Ẹpe phọ kụ ịdi ọdi aazuanhaan ọnyo umaranhi ọlo a Canada dị oghol mọ Inga dị rạkoy ghan eten, kụ ekureriom mọ bịdi ạalhan ni. Bịdi umhiigh dọl ạbidi ịdipho olom r’ạnhir ẹmha Ecuador dị ịyal ikpo ạbukaaphom bịn kụ ọrol ghan. Rodon, ookpomhoghan phọ mạbugh.

Ẹsighe rẹki, bịn ọma umor phọ r’umaranhi phọ Rumph ịdipho ạbukoy eten ọpo ạgbatanhaan bọ. Onyebel roten, a Rumph aḍighi opoghom eghir. Lhạ phọ 2011, ụmhagh ni bịdi ọghi aani askul a Gilead phọ amhunhenhiom bọ 132. Kụ bịdi r’ọmhan, bịdi ọghiighi rikpisi kịrokiro sịen oomo aḅirinhi phọ okunuan, kụ ọghelhom kẹn kịrokiro arukumuan ịdipho arukumuan ạ Bẹtẹl, rukumuan a misọnạrị r’arukumuan eghir. Umor phọ Rumph ạmhoogh ni kẹn eepoogh ọtughemhi Askul Ạbukaaphom Iiḅi Ịinhaghan Phọ.

Loor ẹzegh a COVID-19 phọ, umor phọ r’umaranhi phọ Rumph uḅulha ni ẹpe United States. Ụmhagh ni bịdi ọghi ạ Bẹtẹl a Wallkill, ẹpe phọ kụ ịdi ọtughemhi umor phọ Rumph okumuan aani Ẹku Ạbuphe Ropogh Bọ Rukumuan phọ. Ekureriom mọ, ụḅilhe ni ọsighe bịdi oḅulhemhi ọla ạgada Ecuador kụ ẹpe phọ umor phọ Rumph akumuan ghan r’ạbuphe ropogh bọ ọla ạgada phọ. Lhạ 2023 ụḅilhe ni ọsighe bịdi oḅulhemhi ẹpe Warwick. Kụ ụnwanyu a January 2024, ụma ni umor phọ Rumph ịdipho oniin ọdi rạloghonhaan ghan ḍịghaagh Ẹku Ạbuphe Ropogh Bọ Rukumuan phọ. Ọdi rạkaaph bọ ịlo iiḍighi phọ ọdi mạpham bọ, ọdi ạḅem mọ, “Esi phọ oye phọ odi bọ kụ rakumuan kụ réḍighi ghan ịdi oḍighi phọ ạgbatanhaan, kụolo awe phọ r’oye phọ roḍighi bọ kụ reḍighi ghan ịdi oḍighi phọ ạgbatanhaan.”

Yira ọkar kụ rọsereghian iiḍighi abumor phọ ạbuen phọ, kụ yira kọkiom ni ghisigh ọlogh ghan eghuan ọdo awe phọ ạbuen phọ.—Fil. 2:29.