Asipuru Dị Ạbuen Rọbal Ghan Bọ Rịnya Phọ Ayira Opuru

Eeghe “ịitughian” kụ ẹdi a Jehova kạlogh bọ rokpom ạbuo ịtooghi areelhe phọ?

Ịdi egbolhomaam mem mọ igbogh ịiḅaghamhi phọ kemiigh bọ, Ogananami 17:16, 17 ẹḅem mọ: “Ḍioph phọ ạraphaal phọ nạ ạmiin bọ rꞌelhom ẹnham mọ kọlogh ni ḍien oliom ẹmha phọ. Bịdi kọsighiogh ni oomo ạraraar lọ ọdi ạmoogh oseere nyọdi ẹdaḅa. Bịdi kọba ni iphulupul ọdi kụ opiemiom nyọdi nịan. Ịdi eḍighi bọ Ẹnaan ẹlogh ịitughian phọ ọdi ologhi ạbidi mọ oḍighinom ịpe ọno rạwa bọ, mọ ooḍikuan, ḅịle ọngo elhom ẹnam mọ ịikpo ọtooghiom ạraraar.” Mem dị eten, ạrinya phọ ayira ịḅem ghan mọ “ịitughian” phọ a Jehova kạlogh bọ rokpom ạbuo ịtooghi areelhe phọ pọ ịitughian ophiemhi ịkaraph ạruuku ịiḅereghi.

Tọrobo ịpe ẹrol bọ, ẹwa ni mọ ooḅenhion ọnhaghanhan ạḍughum mọ ayira. “Ịituughian” phọ a Jehova kạlogh bọ rokpom ạbuo ịtooghi areelhe phọ pọ “ọngo elhom enạm mọ ịikpo ọtooghiom.” Orue ọnhaghanhan ịpe ịphen phọ kemunhughan bọ, ọoḅeghion sipuru phọ ẹdaphan bọ sịen.

Ịmiin phọ ẹkar rẹkaaph ghan ịlo ạbuo ạnhian? “Oleom ẹmha phọ” pọ “ạ Bạbịlọn Ogbogh phọ” ạmheera bọ enye oomo ịkaraph ạruuku ịiḅereghi. “Ẹtotogh elhom ẹnam” mọ rẹma ghan ookpomhoghan phọ amite bọ lhạ phọ 1919, oghol bọ mọ League of Nations, kụ nyịidiphọ oghol bọ mọ United Nations. (Ogan. 17:3-5) “Ḍioph phọ ạraphaal phọ” rẹma ghan oomo ịikpo ịtooghi dị rẹbaki elhom ẹnham mọ.

Eeghe asiya kụ ịdi oliom ẹmha phọ r’ẹtotogh elhom ẹnham mọ ọmhoogh? Oleom ẹmha phọ ‘ạtol ạnyu’ ẹtotogh elhom ẹnham mọ. Ịphen rẹma ghan mọ oleom ẹmha phọ ạbaki ẹtotogh elhom ẹnham mọ, kụ elhom ẹnham mọ reḍighi ghan ịpe oleom ẹmha phọ rạwa bọ.

Eeghe kụ kemitenhaan oleom ẹmha phọ? Elhom ẹnham mọ ḅịlhe r’aḍioph ạraphaal phọ rẹbaki bọ nyọdi, “kolọgh ni ḍien oleom emạ phọ.” Kụ oḍeenhaan ịdi bịdi ọlhogh nyọdi ḍien, bịdi kopiemhi ni oomo ạraraar dị ọdi ạmhoogh ọḅilhe ọyegheron ẹkaraph eḍighinhom ịyaar phọ ọdi. Bịdi kụ koḍighi omiteom ọoruen phọ a Jehova asophonhaan bọ oleom ẹmha phọ, ịduon phọ pọ, bịdi kopiemhi nyọdi k’agee-pọ. (Ogan. 17:1; 18:8) Ịphen phọ kụ keḍighi eekunha oomo ịkaraph ạruuku ịiḅereghi. Tọrobo ịpe ẹrol bọ, kụ ịpe phọ egbi omite, a Jehova kaḍighi ni ịyaar dị ạbuo ịtooghi areelhe phọ koḍighi ịyaar dị kémite ghan sịen ịtooghi ọmhar awe.

A Jehova kaḍighi ịdi ạbuo ịtooghi areelhe phọ koḍighi eeghe? Ọdi kạlogh ekpom ạbuo ịtooghi areelhe phọ “ịitughian phọ ọdi,” ịpe phọ pọ ịitughian ọngo “ịnyaam r’ịikpo phọ ạbidi [ẹtotogh] elhom ẹnam mọ”, eḍighi bọ United Nations. (Ogan. 17:13) Ịphen phọ rẹma ghan eeghe? Nạ ragbi mọ areelhe phọ bịn kụ kosopha ọḅogh ịnyaam r’ịikpo phọ ạbidi ọngo elhom ẹnham mọ ḍụghum? Eeye! Ịmiin phọ eḍeenhaan mọ a Jehova r’aloor kụ kạlogh ịitughian phọ ịphen phọ rokpom ạbidi. (Prov. 21:1; poghom Isaiah 44:28.) Ạbuo ịtooghi areelhe phọ kọḅogh ịikpo phọ ạbidi ọngo elhom ẹnham mọ ẹnum ẹnum ḍụghum? Eeye! Keḍighi egina amem. Imhoom ịikpo phọ kọngo bọ elhom ẹnham mọ kụ ẹdi elhom ẹnham mọ kẹsighe bọ epiemhiom oomo ịkaraph ạruuku ịiḅereghi mem bịn ḅeer ẹman ịdipho a Jehova rạwa bọ.

Yira kogon ọmhiin eeghe? Yira kógon ghan ịinhaghan dị kẹḅem ghan mọ ạbuo ịtooghi areelhe phọ momhiigh rọbaki iboom United Nations. Kpạripe ghụn, ogon mọ ekperenhom bịn, a Jehova kạlogh ni sịphe arokpom ạbuo ịtooghi areelhe phọ ịitughian ọḅogh ịikpo phọ ạbidi ọngo ẹtotogh elhom ẹnham mọ, aḍighi bọ United Nations. Remite ịduon phọ, bịn olhegheri mọ igbogh ịiḅaghamhi phọ rẹwa omhiigh. Kụolo nyịidipho “kụ́naani,” oomhanam, ogon ghan, loor esi dị onmia dị katu ekperenhom kamite ni mọony amem!—1 Tẹs. 5:6.